Эдьиий Дора: «Биир холумтан тула түмсэр күн-дьыл үүннэ»

Кэм-кэрдии түргэнэ, аныгы үйэ дьалхаана барыбытын халаан уутун курдук хаһыйан ханна илдьэр диэн саастаах дьонтон элбэхтэ истибитим. Олохпут тэтимэ түргэтээн, майгыбыт-сигилибит айгыраан иһэрин Эдьиий Дора маннык этэн турардаах: «Сир-дойду үрдүнэн балаһыанньа тыҥаата. Дьон-сэргэ ыгылыйда. Бу балысхан сайдыы содула. Киһи аймах сыыһа дьаһанан олорон кэлбитин содула. Кини сайда, байа эрэ охсор үлүскэнигэр ылларан айылҕаттан тэйбитинэн, кини баайын кэрээнэ суох наар ылар, сомсор эрэ ухханыттан тахсыбыт көстүү”…

Эдьиий Дора үбүлүөйдээх биэчэрэ дьону-сэргэни түмэ тарта

Опера уонна балет тыйаатырыгар дьон лыык курдук муһунна. Эдьиий Дора 60 сааһын туолар үбүлүөйдээх күнүн бүтүн норуот үөрэ көрүстэ. Норуокка дириҥник ытыктанар эмчиппит, алгысчыппыт дьоро күнэ олус истиҥ-иһирэх быһыыга-майгыга ааста.
Биэчэргэ өрөспүүбүлүкэ салалтата, норуот дьокутааттара, өрөспүүбүлүкэ бас-көс дьоно истиҥ эҕэрдэлэрин тиэртилэр.
Өрөспүүбүлүкэ Ил Дарханын махтал суругун информационнай бэлиитикэ департаменын салайааччыта Афанасий Ноев туттарда: “Улахан талааныҥ, муударай санааҥ, эмтиир күүһүҥ уонна дьоҥҥо-сэргэҕэ көмөлөһөр ураты дьоҕуруҥ бар дьонуҥ ытыктабылын ылыан ылар. Дэлэҕэ Эдьиий диэн ытыктыы ааттыахпыт дуо. Хоту сир уйан айылҕатын харыстыырга, сыаналыырга, сир-дойду иччилэригэр сүгүрүйэргэ үөрэтэҕит. Төрүт норуоккун өрүү көмүскүү, араҥаччылыы сылдьаргыт, ыарахан түгэҥҥэ күүс-көмө, сүбэ-ама буоларгыт, өбүгэ үгэһин, итэҕэлин, сиэрин-майгытын илдьэ сылдьар үтүө киһи буоларгыт иһин дириҥ махталбын тиэрдэбин”, —диэн эттэ.
Парламент аатыттан Ил Түмэн ыччат, физическэй култуура уонна спорт дьыалаларыгар сис кэмитиэтин бэрэссэдээтэлэ Михаил Гуляев, олимпийскай чемпион Павел Пинигин уонна норуот дьокутаата Мичил Николаев эҕэрдэ тылларын эттилэр.
«Ытыктабыллаах Эдьиий Дораны норуот дьокутааттарын уонна Ил Түмэн салалтатын аатыттан кэрэ бэлиэ күҥҥүнэн итиитик-истиҥник эҕэрдэлиибит. Айылҕаттан айдарыылаах киһи буолаҥҥын, норуотуҥ сайдарын туһугар күүскэ үлэлэһэҕин. Маннык киэҥ саала толору дьон мустубута эйиигин төрөөбүт дойдуҥ дьоно хайдахтаах ытыктыырын кэрэһилиир. Сахабыт сиригэр ыытыллар араас улахан тэрээһиннэр эн алгыскынан бараллар», — диэн туран норуот дьокутаата Михаил Гуляев Ил Түмэн Бочуоттаах кыраамататын туттарда.
«Саха» НКИК аатыттан генеральнай дириэктэр Олег Марков эҕэрдэлэргэ кыттыһан туран, Эдьиий Дора мантан инньэ YouTube туспа ханааллаах буолар диэн сэргэх иһитиннэрии оҥордо: “Аныгы олох тэтимигэр уйдаран маннык ханаалы астыбыт. Оччотугар норуот эмчитин үтүө алгыһын өссө элбэх киһи истиэ-сэргэҕэлиэ, олоҕор туһаныа”, — диэн эттэ.

Күн курдук ытыктыыр киһибит түптээх сүбэтин-аматын олохпутугар-дьаһахпытыгар хото туттабыт. Маннык дьон баар буолан олохпут суолун торумнуурга, сиэрдээх буоларга дьулуһабыт. Өссө төгүл үөрүүлээх күҥҥүнэн эҕэрдэлиибит!

Эдьиий Дора саха норуотун инники кэскилин, доруобуйа, эт-хаан, сиэр-туом, ыал холумтанын, оҕо иитиитин туһунан уо.д.а. элбэх ыйытыктарга хоруйдуур. Олох араас түгэнигэр сиэри-туому тутуһарга, ордук маннык ыктарыылаах быыһык кэмҥэ Эдьиий Дора соргулаах сүбэтэ үгүс дьоҥҥо күүс-көмө буолара саарбахтаммат.

Эдьиий Дора алгыһынан

Ирина Харитонова, Дьокуускай куорат: “Бэҕэһээ Эдьиий Дора үбүлүөйдээх биэчэригэр сырыттым. Чахчы санаалыын дуоһуйан, арчыланан, ыраастанан кэллим. Олус элбэх туһалаах сүбэни эттэ. Араас быһылааны, куһаҕаны кэпсэтимэҥ, куруук бэйэ-бэйэҕитигэр көмөлөһүҥ, аймахтаргытын кытта куруук үтүө сыһыаны тутуҥ – уруурҕаһыы суолтата улахан диэтэ. Дьиэҕитигэр төрүт кыыһырсымаҥ, кын­чыаттаһымаҥ, аһыы олорон айдаарсымаҥ – куһаҕаны тардар эбит. Аныгы үйэ гаджеттара, төлөпүөн, көмпүүтэр аһыыр сиргэ туруо суохтаах – ыарыы төрдө буолар диэн оруннаахтык эттэ”.

Роман, Амма улууһа: “Эдьиий Дора улаханнык ытыктыыр киһим буолар. Ырааҕынан аймахпыт — кэргэним эдьиийин аймахтара Кэбээйи Тыайалара. Чахчы күүстээх алгысчыт, ураты дьоҕурдаах киһи. Ардаҕы тохтоппутун илэ харахпынан көрбүтүм, сөхпүтүм”.

Уяндина Татаринова, Дьокуускай куорат: “Эдьиий Дора кэргэним биир дойдулааҕа. Урут кэргэним холостуой эрдэҕинэ, бииргэ үлэлиир кыыскын кэргэн ылыаҥ диэн эппит. “Сардаана” фабрикаҕа тириини таҥастыыр салааҕа үлэлии сылдьан билсибиппит, ыал буолбуппут. Бастакы оҕобун оҕолонон баран тириим бааһырар буолан эрэйдэммитим аҕай. Ону Эдьиий Дора төлөпүөнүн кэргэммиттэн ыламмын сүбэлэттэрбитим. Майгыгын сымнат, кыыһыра-тымта сылдьарыҥ иһин тирииҥ бааһырар диэбитэ. Кини олус күүстээх эмчит, киһини өтө көрөр, олус таба сүбэлиир-амалыыр”.

Бу кэпсэппит дьонум, соһуйуом иһин, бары Эдьиий Дора биир дойдулаахтара, алтыспыт дьоно буолан биэрдилэр. Бэл, санаабар, кини бэйэтинэн булларда дуу диэн санаан аһардым.

Ирина Ханды