Егор Борисов 65 сааһын туолла

Егор Борисов өрөспүүбүлүкэ былааһыгар 1991 сылга, Сэбиэскэй Сойуус ыһыллар кэмигэр кэлбитэ уонна Саха сирин салалтатыгар, быстах тохтооһуннары аахсыбатахха, 2018 сылга диэри үлэлээбитэ. Кини быйыл атырдьах ыйын 15 күнүгэр 65 сааһын туолла, бу күн “Егор Борисов: вместе с народом” киинэ премьерата буолар.

Бу хартыына дьон олоҕор улахан уларыйыылары таһаарбыт, үгүс чаҕылхай, мөлтөх уонна кыайыылаах да түгэннэринэн баай кэрдиис кэм туһунан көрдөрөр. Ити таҥнары түһүү уонна чөлүгэр түһэ­рии, бутуллуу уонна бэрээдэги хааччыйыы, сиэр-майгы сыаннастара уларыйыытын уонна уопсастыба өйүгэр-санаатыгар тосту уларыйыылар кэмнэрэ этэ.
«Егор Борисов өрөспүүбүлүкэ былааһын үрдүкү эшелоннарыгар, Михаил Николаев бириэмэтигэр да, Вячеслав Штыров үлэлиирин да саҕана уонна бэйэтин кэмигэр туһааннаах быһаарыылар хайдах уонна тоҕо ылыллыбыттарын ситэ дьиҥнээхтик билэр», — диэн бэлиэтииллэр лиэнтэни оҥорооччулар.
Бу киинэ атырдьах ыйын 15 к. көрдөрүллэр. Киинэ саҕаланыыта: “Саха” НКИХ ханаалыгар — 20:45, «Якутия 24» ханаалга — 21:00.
Судаарыстыбаннай уонна политическай деятель, экономическай наука доктора Егор Борисов өрөспүүбүлүкэ тыатын хаһаайыстыбатын туһунан билиитэ-көрүүтэ киэҥ, ол курдук ити салаа бары хайысхаларын үчүгэйдик билэр. СӨ Национальнай библиотекатын электроннай каталогар “Егор Борисов: По пути созидания и развития” диэн тематическай коллекцияны көрөн баран, онно чахчы итэҕэйэҕин.
Бу коллекцияҕа Егор Борисов үлэлэрэ, 1996 сылтан саҕалаан кини олоҕун уонна үлэтин сырдатар кинигэлэр уонна хаһыаттартан ыстатыйалар киирбиттэр.
«Тыа хаһаайыстыбатын миниистирин, бырабыыталыстыба бэрэссэдээтэлин, Саха сирин баһылыгын дуоһунастарыгар үлэлии сылдьан, кини регион агропромышленнай комплексын сайдыытын стратегиятыгар хайдах курдук болҕомтону уурбутун, кэскиллээх салаалары буларга кыһаллыбытын, билигин баар балаһыанньаны ырытан-ырыҥалаан көрбүтүн билэр кыахтанаҕын. Ити коллекция салгыы да толорулла туруоҕа, кини политик быһыытынан Федерация Сэбиэтигэр салгыы актыыбынайдык үлэлиир», — диэн СИА-ҕа “Электроннай библиотека” Киин контены үөскэтии отделын сэбиэдиссэйэ Лилия Левчикова бэлиэтээтэ.
Үөһэ ыйыллар коллекцияҕа саҥа библиографическай ыйынньыгы кытта билсиэххэ сөп. Манна Егор Борисов 2014 сыл муус устарыттан 2019 сыл бэс ыйыгар диэри үлэтин сүрүн кэрдиис кэмнэрэ тыктарыллаллар итиэннэ 4222 докумуон аата киирбит. Санатар буоллахха, 1987 сылтан 2014 сыл кулун тутарыгар диэри кэми хабар “Егор Афанасьевич Борисов” биобиблиографическай ыйынньык 2014 сылга таһаарыллыбыта.