Владимир Прокопьев: “Утарсыылар бааллар, салгыы үлэлэһиэхпит”

Ил Түмэн депутаттара Госдума таһымыгар үлэлэрэ салҕанар. Норуот депутаттара РФ сокуонугар регион ураты килиимэтин уонна сирин-уотун учуоттуур этиилэрин киллэрэллэр. Ол курдук, алтынньы 8 күнүгэр Ил Түмэн сир сыһыаннаһыыларыгар, айылҕа ресурсаларыгар уонна экологияҕа сис кэмитиэтин бэрэссэдээтэлэ Владимир Прокопьев, Хоту сир аҕыйах ахсааннаах төрүт норуоттарын боппуруостарыгар уонна Арктика дьыалаларыгар Ил Түмэн сис кэмитиэтин бэрэссэдээтэлэ Елена Голомарёва Россия парламенын айылҕа ресурсаларыгар, бас билиигэ уонна сир сыһыаннаһыыларыгар кэмитиэтин төгүрүк остуолугар кыттыыны ылан кэллилэр. Биһиги Владимир Прокопьевтан кэпсэтии хайдах ааспытын туһунан ыйыталастыбыт.

— Алтынньы 4 күнүгэр Мос­кваҕа дойду үрдүнэн буолан ааспыт “Ойуур форумун” түһүмэхтэрин тула кэпсэтии буол­ла. Санатар буоллахха, биһиги өрөспүүбүлүкэбитигэр бэс ыйын 2-3 күннэригэр ойуур салаатын форумун биир түһүмэҕэ буолан ааспыта. Ойуур салаатын кыһалҕатын маннык үрдүк таһымҥа кэпсэтэ илик этибит. Тэрээһин олус көдьүүстээхтик ааспыта, өрөспүүбүлүкэ ураты сирин-уотун учуоттуур кэккэ этиилэри киллэрбиппит. Бу этиилэрбит форум тиһэх докумуонугар киирэригэр үлэлэспиппит. Форум да кэнниттэн тустаах судаарыстыбаннай тэрилтэлэри кытта көрсөммүт эмиэ дьүүллэстибит. “Ойуур форума” үс сыл устата буолла. Сэтинньи 5 күнүгэр бу үс сыллаах үлэ түмүгүнэн Судаарыстыбаннай Дума таһымыгар дьүүллэһии буолуохтаах. Онно ойуур хаһаайыстыбатын кыһалҕаларын, сайдар саҕах­тарын тула кэпсэтии барыахтаах уонна парламент истиитин рекомендацияларыгар киирэн, сорудах быһыытынан барыахтаах.Онно биһиги кыттыахпыт уонна баар кыһалҕаларбытын көтөҕүөхпүт. Ол курдук кыһал­ҕабыт элбэх. Холобур, балык хаһаайыстыбатын үбүлээһин, ойууру харыстааһын, баһаары кытта охсуһуу, өртөөһүн, бу салааны техниканан уонна үлэһиттэринэн хааччыйыы боппуруостара, нормативнай докумуоннары чопчулааһын, о.д.а. элбэх кыһалҕалар бааллар диэххэ наада .
Өссө биир улахан тэрээ­һининэн алтынньы 8 күнүгэр РФ Судаарыстыбаннай Думатын айылҕа ресурсаларыгар, бас билиигэ уонна сир сыһыаннаһыыларын кэмитиэтигэр “Сир аннын туһунан сокуону тупсарыы хайысхалара” диэн тиэмэҕэ төгүрүк остуолга кыттыыбыт буолла. Манна сир баайын туһунан сокуоҥҥа уларытыылары, эбиилэри киллэрии туһунан кэпсэтии буолла. РФ Бырабыыталыстыбатын өттүттэн кэккэ этиилэр бааллар, 7-8 көннөрүүлэр бэлэмнэммиттэр. Ол тула кэпсэтиигэ Саха сирэ эмиэ этиилээх таҕыста. 294 №-дээх федеральнай сокуон 12-16 ыстатыйаларыгар уларытыыны киллэрэр уолдьаспытын туһунан этиилээхпит. Ол курдук сир баайын кытары үлэлэһэр тэрилтэлэргэ лицензия биэриигэ биир сүрүн боппуруоһунан сир баайын туһанар хампаанньа үлэлиир территориятын социальнай-экономическай сайдыытыгар кыттыыны ылыахтаах диэн усулуобуйаны киллэриэххэ диэн туруорсабыт. Бу боппуруос тула үлэлэспиппит ыраатта. Ол эрээри боппуруос уустуктардаах, РФ ситэриилээх былааһын уонна сокуону таһаарар былааһын өттүттэн утарсыыллар бааллар диэн аһаҕастык этиэххэ наада. Салгыы этиилэрбит олоххо киирэллэригэр үлэлэһиэхпит.
Төгүрүк остуолга көтөхпүт иккис боппуруоспутунан сир баайа хостонор сиригэр геологическай чинчийиини уонна хонтуруолу ыытар туһунан этэ. Ол курдук биһиги этэбит: сир баайын хостооһун кэмигэр судаарыстыба өттүттэн геологическай хонтуруол уонна надзор суоҕун кэриэтэ. Тоҕо диэтэххэ 294№-дээх федеральнай сокуонунан туһааннаах уорганнар хонтуруоллуур, бэрэбиэркэ ыытар боломуочуйалара хааччахтаммыта. Биһиги бу боломуочуйаларын төнүннэриэххэ, сокуоҥҥа уларытыыны киллэриэххэ, сир баайын хостооһуну хонтуруоллуохха диэн туруорсабыт. Маныаха араас санаалар этилиннилэр. Сорохтор итини бизнеһи хааччахтааһын курдук көрөллөр. Билигин Госдумаҕа сокуон барылын оҥорон киллэрдибит. Бу докумуон олоххо киирэрин туһугар салгыы үлэлэһиэхпит. Оттон “Этнологическай экспертиза туһунан” сокуону этэр буоллахха, Елена Голомарева үөһэ этиллибит Госдума кэмитиэтин төгүрүк остуолугар “РФ аҕыйах ахсааннаах төрүт олохтоохторун туһунан” РФ сокуонун аҕыйах ахсааннаах норуоттар олорор уонна үгэс үлэлэринэн дьарыктанар сирдэригэр бырамыысыланнай хампаанньа үлэтин саҕалыан иннинэ этнологическай экспертизаны оҥоруу туһунан пууну киллэрэр наадалааҕын ыйбыта. Бу боппуруоска салгыы эмиэ үлэлиэхпит.

Сардаана КУЗЬМИНА

Уважаемые читатели!

1. Покупая электронную версию Издания, вы осознаете, что покупаете ее исключительно для личного (семейного) пользования. Перепродажа или любая другая передача купленного вами номера газеты третьим лицам запрещается и может преследоваться по закону.
2. Обязанности продавца, в качестве которого выступает Издание, считаются выполненными с момента отправки Покупателю ссылка на скачивание купленного и оплаченного им номера газеты.
3. Стоимость газеты в розницу 30 руб.

ВАЖНО! Иногда, по независящим от Издания причинам, спам-фильтры Покупателя перебрасывают письмо с заказанной вами ссылкой в папку «Спам». Поэтому если вы не получили от нас автоматически сгенерированного письма со ссылкой, для начала проверьте папку «Спам». Если его нет и там — обращайтесь в нашу редакцию.