Ил Түмэн уонна Кёнсанбук-до провинция парламена бииргэ үлэлиэхтэрэ

Саха сирин парламеныгар бэс ыйын 29 к. СӨ Судаарыстыбаннай Мунньаҕын (Ил Түмэн) уонна Корея Өрөспүүбүлүкэтин Кёнсанбук-до провинциятын Парламенын икки ардыларыгар бииргэ үлэлиир санаалаахтарын туһунан Меморандумҥа илии баттааһын сиэрэ-туома буолан ааста.

Бу бэлиэ тэрээһиҥҥэ Саха сирин народнай депутаттара, Кёнсанбук-до провинциятын парламенын делегацията уонна Ил Түмэн аппараатын үлэһиттэрэ кытыннылар.
Бииргэ үлэлиир санаалаахтарын туһунан Меморандумҥа СӨ Ил Түмэнин Бэрэссэдээтэлин бастакы солбуйааччы Александр Жирков уонна Корея Өрөспүүбүлүкэтин Кёнсанбук-до провинция парламенын Бэрэссэдээтэлэ Чан Гён Сик илии баттаатылар.
Өрүттэр тэҥ бырааптаныы уонна хардарыта барыстаах буолуу бириинсиптэрин төрүтүгэр бииргэ үлэлээһини сайыннарар санаалаахтар. Чуолаан, сокуону таһаарар мунньахтар икки ардыларыгар икки өрүттээх бииргэ үлэлээһини бөҕөргөтөргө бэлэмнэрин, эрэнсии уонна хардарыта өйдөһүү төрүтүгэр доҕордуу сыһыаннары бөҕөргөтүүгэ үлэлиир санаалаахтарын туһунан этиллэр.
Александр Жирков иһитиннэрбитинэн, Корея Өрөспүүбүлүкэтин делегациятын бэрэстэбиитэллэрэ Саха сиригэр үһүс күнүн ыалдьыттыыллар. Бу күннэргэ кинилэр кэккэ бэлиэ миэстэлэри көрбүттэр уонна Туймаада ыһыаҕар сылдьыбыттар.
«Саха Өрөспүүбүлүкэтин уонна Соҕуруу Корея Кёнсанбук-до провинциятын икки ардыларыгар доҕордуу сыһыаннаһыыларга олугу 90-с сыллар саҥаларыгар Саха сирин бастакы Президенэ Михаил Николаев уурбута. Бүгүн биһиги экономика, бырамыысыланнас, үөрэх, гуманитарнай наукалар салааларыгар бииргэ үлэлиирбитигэр улахан кэскиллээх былааннар бааллар. Ону таһынан, Кёнсанбук-до провинция парламена экология, тулалыыр эйгэни харыстааһын боппуруостарыгар улахан уопуттаах. Бу биһиэхэ – норуоттар икки ардыларынааҕы уопуту атастаһыыга бэриллэр ураты кыах. Биһиги кэккэ хайысхалары дьүүллэстибит уонна кэлэр өттүгэр этиилэр пакеттарын бэлэмнииргэ бэлэммит», – диэн бэлиэтээтэ Саха сирин парламенын бастакы вице-спикерэ.
Тойон Чан Гён Сик Александр Николаевичка уонна норуот депутаттарыгар сылаастык көрсүбүттэрин иһин ис сүрэҕиттэн махтанна. Кини икки норуот олоҕун укулаатыгар уонна үгэстэригэр уопсай майгыннаһар өрүттэри көрбүтүн, кэриэй дьоно тас да көрүҥнэринэн саха норуотун бэрэстэбиитэллэригэр олус майгынныылларын иһитиннэрдэ.
Кини ааспыт сыл сэтинньитигэр Кёнсанбук-до провинция Бухан куоратыгар регионнар икки ардыларынааҕы бастакы Россия-Корея форума ыытыллыбытын, ол төрүтүгэр үөрэх, наука, култуура уонна туризм эйгэлэригэр Россия уонна Корея Өрөспүүбүлүкэтин икки ардыларыгар хардарыта бииргэ үлэлээһиҥҥэ былаһаакка үөскээбитин кэпсээтэ. Бу форум чэрчитинэн кини Саха сирин бырабыыталыстыбатын бэрэссэдээтэлэ Владимир Солодовы кытта билсибит уонна бииргэ үлэлээһин кэскилин көрбүт.
«Кëнсанбук-до Корея Өрөспүүбүлүкэтин 17 провинциятын ортотугар биир бөдөҥ административнай-территориальнай единица буолар. Кини дойду сирин-уотун 20 бырыһыанын кэриҥин ылар. Нэһилиэнньэтэ – 2,7 мөлүйүөн киһи. Провинция өрөспүүбүлүкэҕэ бырамыысыланнас уонна тыа хаһаайыстыбатын биир киининэн, дойдуга бюджетын кээмэйинэн 4-с буолар, ордук электроннай, текстильнай, химическэй бырамыысыланнас, туризм, инновация эйгэлэрэ сайдыбыттар. Манна аан дойдуга биллэр POSCO, Samsung, LG хампаанньалар бааллар, 42 университекка 150 тыһ. тахса устудьуон үөрэнэр. Кëнсанбук-до провинция Корея тыһыынчанан сыллардаах историята үөскээбит биһигинэн, саамай элбэх ахсааннаах култуура сыаннастара баарынан биллэр, олортон сорохторо ЮНЕСКО култуураҕа нэһилиэстибэтин шедеврынан билиниллибиттэрэ», – диэн Корея делегациятын салайааччыта бэлиэтээтэ.
Кëнсанбук-до провинциятын парламенын спикерин кытта Саха сиригэр култуураҕа, тыа хаһаайыстыбатыгар уонна балыктааһыҥҥа, тутууга, үөрэххэ кэмитиэттэрин бэрэстэбиитэллэрэ, ону сэргэ Хотугулуу-Илиҥҥи Азия дойдуларын регионнардааҕы администрацияларын Ассоциациятын (АРАССВА) генеральнай сэкирэтээрэ уонна үлэһиттэрэ кэлбиттэр. Ааспыт сылга бу тэрилтэ салайааччытынан Саха Өрөспүүбүлүкэтин Баһылыга Айсен Николаев талыллыбыта.
«Саха сирэ туризм эйгэтэ, экономика, атыы-эргиэн сайдыыларыгар, айылҕа баайын туһаҕа таһаарыыга сүүнэ кыахтардаах. Бииргэ үлэлиир санаа туһунан Меморандумҥа илии баттааһын биһиги регионнарбыт икки ардыларыгар норуоттар икки ардыларынааҕы бииргэ үлэлээһини сайыннарыыга историяҕа киирэр хардыынан буолар итиэннэ парламеннар икки ардыларыгар доҕордуу сыһыаннары салгыы бөҕөргөтүүгэ бигэ тирэҕинэн буолуоҕа», — диэн Чан Гён Сик эрэнэрин биллэрдэ.
Сиэр-туом түмүктэнэригэр өрүттэр өйдө­бүнньүк сувенирдары атастастылар. Кёнсанбук-до провинция парламенын спикерэ Саха сиринээҕи кэллиэгэлэригэр Корея былыргы Силла династиятын, сабаҕалааһын быһыытынан 771 сылга кутуллубут “Эмиле” куолакалын кыра куопуйатын бэлэхтээтэ. Билигин бу куолакал Корея Өрөспүүбүлүкэтин национальнай баайынан буолар. Тыһыынча сылтан ордук кэм устатыгар куолакал саамай сүрүн фестивалларга уонна бырааһынньыктарга туһаныллан кэллэ, ол эрээри 2003 сылтан кинини харыстаан, охсон тыаһаппаттар эбит.