Бары күргүөмүнэн охсуулаах үлэҕэ турунуоҕуҥ!

Саха Өрөспүүбүлүкэтин Бырабыыталыстыбатын дьаһалынан  өрөспүүбүлүкэ үрдүнэн 492,032  тыһ. тонна оту, 22,171 тыһ. тонна сиилэһи уонна 11,183 тыһ. тонна сенаһы бэлэмнииргэ сорудах тиэрдиллэн турар. Ол курдук, от ыйын 12 күнүнээҕи туругунан ходуһаҕа барыта 6007 киһи, 2155 техника, 2012 звено үлэлии таҕыста. Былырыыҥҥы от ыйын 17 күнүнээҕи көрдөрүүнү кытта тэҥнээтэххэ туһааннааҕынан 896, 354, 676-нэн элбэх көрдөрүү бэлиэтэнэр. Өрөспүүбүлүкэ үрдүнэн  барыта 9532 га оттуур ходуһа охсулунна, 3539,2 тонна от бэлэмнэннэ, сыл анараа өттүгэр көрдөрүү 116% тэҥнэстэ.

Билиҥҥи туругунан СӨ тыа хаһаайыстыбатын управлениеларынан от бэлэмнээһинигэр нуорма туолуута Саха сиригэр 99,6% сыаналанар. От үлэтэ, биллэн турар, күн-дьыл туругуттан улахан тутулуктаах. Тыа хаһаайыстыбатын специалистара бэлиэтииллэринэн, кураан күн-дьыл от бэлэмнээһинигэр ордук Ньурба, Нам, Уус-Алдан, Бүлүү, Горнай, Кэбээйи, Орто Халыма уонна Чурапчы улуустарыгар улахан харгыстары үөскэттэ. Сөҥүү түспэт түгэнигэр бу үөһэ ыйыллыбыт улуустарга, ону таһынан Мирнэйгэ, Муомаҕа, Өймөкөөҥҥө тиэрдиллибит сорудах көрдөрүүтэ үрдүгүнэн,  ыйыллыбыт былаан туолбат кутталлааҕа  сабаҕаланар. Кыстыыр аһы-үөлү соҕотуопкалааһын эриэ-дэхси буолбатах. От быйыл Мэҥэ-Хаҥалас, Хаҥалас, Амма, Үөһээ Бүлүү, Чурапчы, Таатта улуустарыгар өлгөм үүнүүлээҕин бэлиэтииллэр. Күнү-дьылы кэтээн көрөөччүлэр билгэлииллэринэн, атырдьах ыйыгар сөптөөх ардах түһэрэ сабаҕаланар. Билигин ардах бычык-ычык түһэрэ элбээтэ.

От үлэтэ тэтимнээхтик ыытыллар улуустарынан ылан көрдөххө: Хаҥаласка — 924 тонна, Мэҥэ-Хаҥаласка — 427 тонна, Үөһээ Бүлүүгэ — 261 тонна, Аммаҕа — 255 тонна, Уус Алдаҥҥа — 464 тонна  от бэлэмнэннэ. Мобильнай механизированнай Дьокуускайдааҕы тыа хаһаайыстыбатын устудьуоннарын бөлөҕө 5 тыраахтырынан Хатас нэһилиэгэр 15 тонна оту туруорда, 30 га иэннээх ходуһаны оҕуста.

Саха Өрөспүүбүлүкэтин Бырабыыталыстыбатын 2018 сыллааҕы былаанын быһыытынан от ыйын 15 күнүттэн атырдьах ыйын 15 күнүгэр диэри өрөспүүбүлүкэ нэһилиэктэригэр “охсуулаах” ый  биллэриллиэхтээх, оттон атырдьах ыйын 15 күнүттэн улуустарынан ходуһаларга көҥүл-босхо от охсуута ыытыллыахтаах.

Ынах сүөһү ахсаанын аҕыйаппат сыалтан, кыстыкка бэлэмнэнии үлэлэри ыытарга отчуттары, чуолаан хоту улуустар олохтоохторун техника көмөтүн таһынан, илиинэн охсууну күүһүрдэллэригэр ыҥырабыт. Билиҥҥи техника үйэтигэр күн-дьыл туран биэрдэҕинэ нэдиэлэ иһинэн от үлэтин түмүктүөххэ сөп. Ыһыахтар бүттүлэр, онон күүс-сэниэ ылынан бары күргүөмүнэн ходуһаҕа охсуулаах үлэҕэ оттуу турунуоҕуҥ!

Василий Прокопьев.

СӨ тыа хаһаайыстыбатын Министиэристибэтин дааннайдарынан. Хаартыскалар Интернет ситимиттэн туһанылыннылар.