237
08 февраля 2019 в 11:46
Саха сирин роботтара — Астанаҕа
Олунньу 4 күнүгэр «Нурсултан Назарбаев» норуоттар икки ардыларынааҕы аэропорка Саха сириттэн «VeDroid» хомуйар роботтары көрдөрдүлэр. «Якутия» технопарка резиденэ – “Автономные технологии” аччыгый инновационнай тэрилтэ 100 экземпляр роботы атыылааһыҥҥа бастакы бөдөҥ сөбүлэһиигэ илии баттаата, диэн иһитиннэрдэ СИА.
Саха сиригэр оҥоһуллубут хомуйар роботтары бу иннинэ Startup Kazakhstan акселерацияҕа билиһиннэрбиттэрэ. Норуоттар икки ардыларынааҕы бырагыраамаҕа кыттыыларын түмүгэр бырайыак автордара Казахстаҥҥа бастакы бөдөҥ сакаасчыттары ылаллара кыалынна.
«Казахстан хампаанньаларыгар 100 экземпляры атыылааһыҥҥа сөбүлэһии илии баттанна. Бу Саха сирин оҥорон таһаарааччыларын бастакы ситиһиитэ. Билигин “Автономные технологии” иннигэр маассабай оҥорон таһаарыы итиэннэ салгыы аан дойду ырыынагар тахсыы соруга турар», – диэн СИА-ҕа интервьютугар технопаарка директорын э.т. Петр Габышев үллэстибитэ.
Муостаны сууйар автономнай «VeDroid» массыына 70х60х60 кээмэйдээх. Кини валик суоккалар көмөлөрүнэн сууйар. Робот бэйэтэ киниэхэ баар микрокомпьютердар салайыыларынан “хаамар”. Маныаха кини ууну кэмчилиир, хаттаан туһанарыгар анаан ис резервуарыгар ыраастыыр. Салайыытыгар искусственнай интеллект элеменнэрэ киллэриллибиттэр, онон биир дьиэҕэ хас да робот, бэйэ-бэйэлэригэр мэһэйдэспэккэ эрэ көдьүүстээхтик үлэлэһэллэр.
Вероника Аммосова,
СИА
