Дьон-сэргэ албыннаппатын туһугар

/ Олорор дьиэни өлүүлэһэн тутуу /

Кулун тутар 27 күнүгэр норуот дьокутаата Хоту сир аҕыйах ахсааннаах төрүт олохтоох норуоттарын боппуруостарыгар уонна Арктика дьыалаларыгар Ил Түмэн сис кэмитиэтин бэрэссэдээтэлэ Елена Голомарева албыннаппыт олорор дьиэни өлүүлэһэн тутууга кыттыгастаах (дольщик) дьону кытта көрүстэ.

Маннык кыһалҕалаах өрөспүүбүлүкэ үрдүнэн 600-тэн тахса киһи баар.
Үгүс өттүгэр бу маннык түөкүннээһиҥҥэ биэнсийэлээх, элбэх оҕолоох, улуустартан сылдьар дьон киирэн биэрэллэр. Өр кэмҥэ дьиэ тутуллубакка, сороҕор букатын да банкрот барбыт тэрилтэлэр ыытар тутууларыгар кыттыгастаахтар ытыс соттон хааланнар, айманаллара кэмнээх буолуо дуо.
Көрсүһүүгэ албыннаппыт дьон, ситэриллибэтэх дьиэлэр бэрэстэбиитэллэрэ, прокуратура үлэһиттэрэ, тустаах уорганнар кэлэн бу сытыы боппуруос тула кэпсэттилэр.
Биллэн турар, дьиэ-уот тутуутугар отоойкоҕо олордон баран сиик буолан симэлийбит саарбах тутааччыларга сокуон өттүттэн кытаанах миэрэ ылыллара хайаан да наада диэн мустубут дьон бары бэлиэтээтилэр. Ол эрээри тэрилтэ дьоҥҥо туһалаах буоллун диэн үлэтин саҕалаан баран, кыаҕа тиийбэккэ, олуйтарбыт түгэнигэр төттөрүтүн бу тэрилтэҕэ көмө көрүллэрин эмиэ ситиһиэххэ баара диэн этии киирдэ.

Маны таһынан, манна майгынныыр түбэлтэҕэ киирэн биэрбэттэрин туһугар сырдатар, өйдөтөр үлэ нэһилиэнньэҕэ күүскэ ыытыллыахтаах диэн мустубут дьон санаатын эттэ.
«Норуот дьокутаата дьон-сэргэ кыһалҕатыттан туора туруо суохтаах, хас биирдии киирэр этиилэрин, туруорсууларын быһа гыммакка, хайаан да болҕомтоҕо ылабыт. Онон бу киирбит суруктары наардаан, бэрээдэктээн, сөптөөх быһаарыыны ылыныахтарыгар диэри хонтуруолга тутабыт”, — диэн Елена Голомарева түмүктээтэ.

Ирина Ханды