“Ил Түмэн” парламент хаһыатын суруналыыстарын “Уһун Дьурантаайы -2019” күрэххэ кыайыыларынан эҕэрдэлиибит!

1907 с. от ыйын 1 күнүгэр (саҥа ааҕыынан от ыйын 14 күнүгэр) сахалыы тыллаах бастакы «Саха дойдута» хаһыат аан бастаан күн сирин көрбүтэ.

2017 сыл балаҕан ыйын 21 күнүгэр ыытыллыбыт үөрүүлээх мунньахха бу күнү сахалыы тыллаах хаһыаттар күнүнэн бэ­лиэ­тиир буолуохха диэн сү­бэлэспиппит. Ол чэрчитинэн, бу күнү бэлиэтээн, Бэчээт дьиэтин «Сахамедиа» АУо медиакиинигэр сахалыы тыллаах сонуну киэҥник тарҕатар тэрилтэлэр үлэлэрин-хамнастарын, саха бэчээтин инникитин сүбэлэһэр, ырытыһар уонна “Уһун Дьурантаайы-2019” күрэх түмүгүнэн кыайыылаахтары уонна кыттыылаахтары бэлиэтиир «төгүрүк остуол» ыытылынна.
СӨ Суруналыыстарын со­йууһа, Арассыыйа Национальнай СМИ-лэрин ассоциацията уонна Култуура үлэһиттэрин идэлээх сойуустарын Саха сиринээҕи кэмитиэтэ саха тылынан суруйар суруналыыстар ортолоругар көҥүл тиэмэҕэ суруналыыстыка жанрдарынан аһаҕас күрэҕэр биһиги “Ил Түмэн” хаһыаппыт үлэһиттэрэ: Василий Прокопьев “Бастыҥ кэпсээччи” (отчуот, репортаж, кэмэнтээрий, чинчийии) номинацияҕа 1-кы миэстэни, “Бастыҥ суоллааҕы бэлиэтээһин” номинацияҕа Людмила Ноговицына 1-кы уонна Наталья Попова 2-с миэстэлэри ыланнар I, II истиэпэннээх дипломнарынан, анал бириистэринэн наҕараа­даланнылар!

БЫҺААРЫЫ: Уһун Дьу­рантаайы — олоҥхоҕо кэпсэнэр Айыы халлааныгар олорор суруксут. Аҕыс кырыылаах аалыы дьэҥкир таас баҕанатыгар Үрдүк Айыылар ыйаахтарынан аан дойду олоҕун тутулун уонна Орто дойду дьонун дьылҕаларын суруйар.

Биир идэлээхтэрбитин ис сүрэхпититтэн эҕэрдэлиибит! Үлэ­ҕитигэр үрдүк ситиһиилэри, саҥаттан саҥа сонун темалары сырдатаргытыгар, тус олоххутугар дьолу баҕарабыт!

Хаһыат кэлэктиибэ.