Тыыннаах муусука ураты тыына, абылаҥа

Эстрада тыйаатыра кэлиҥҥи кэмҥэ сонун бырайыактары толкуйдуур буолла. Көрөөччүлэр да инньэ дииллэрин элбэхтик истэбит. Ураты хабааннаах бырайыактарыттан биирдэстэринэн 2016 сыл сааһыттан саҕаламмыт «Ырыам кута» диэннэрэ буолар. Бу бырайыактара түөрт сыл устата көрөөччүлэргэ тыыннаах муусука ураты дьүрүлгэнэ хайдаҕын-тугун көрдөрөн-иһитиннэрэн кэллэ.

Ырыаны тыыннаах муусуканан доҕуһуоллатан кэнсиэртиир идиэйэни ол кэмҥэ эстрада тыйаатырын уус-уран салайааччыта Ульяна Ли-Фу эппитэ. Маҥнайгы кэнсиэри  Өркөн Егоров оҥорбута. Ол кэмҥэ Егор Ефимов, Валентин Парфенов уонна Герасим Павлов тыыннаах муусуканан хааччыйбыттара. Бырайыагы көрөөччүлэр тута ылынан сөбүлээбиттэрэ.

Бырайыак ирдэбилэ, быраабылата диэххэ дуу,  бэрт судургу. Кыттааччылар икки саҥа ырыаларын, бииргэ үлэлии сылдьар үөлээннээхтэрин уонна Арассыыйа эбэтэр  омук дойдуларын биллэр толорооччуларын репертуардарыттан (биирдиини) уонна бэйэлэрин саамай биллибит үс ырыаларын тыыннаах муусука доҕуһуолунан ыллыыллар. Уопсайа сэттэ ырыаны   көрөөччүлэргэ анаан толороллор.

Манна даҕатан эттэххэ

“Оргуһуохтаах кыыс” спектакль

Саха тыйаатырын сонун бырайыагынан саха норуотун алыптаах остуоруйаларыгар олоҕуран «Оргуһуохтаах кыыс” оҕолорго аналлаах музыкальнай остуоруйаны бэлэх уунар. Туруорааччы режиссер: Павел Ченянов. Оруолларга оонньуохтара Умсуура, Александр Бурнашов, Сахаайа, Чыскыырай, Николай Гоголев, Айгылаан, Константин Степанов, Амгаяна, Алексей Гольдеров. Музыкальнай спектакль тохсунньу 31 уонна олунньу 1,2 күннэригэр буолар.

 

Бырайыагы түмүктүүр кэнсиэр

Ааспыт нэдиэлэ бүтүүтү­гэр «Ырыам кута» быра­­йыак түөрт сыллааҕы үлэтин түмүктүүр дьоро киэһэ Эстрада тыйаатырын  камернай саалатыгар олус ураты истиҥник буолан ааста.   Көрөөччүлэр биллэр-көстөр ырыаһыттарбыт иккилии, үстүү буолан ылбаҕай кэрэ ырыалары толорууларын,   кыттыбыт ырыаһыттар саҥа ырыаларын ирэ-хоро, астына-дуоһуйа иһиттилэр. Уонна, саамай сүрүнэ,  «Ый суола» (Андрей Босиков – гитара, Айсен Федоров – гитара, Семен Алексеев – бас гитара, Алексей Ефимов – ударнай, Кирилл Васильев – клавишнай), «Туман» (Эллэй Васильев – соло гитара, Роберт Гаврильев – гитара, Семен Окоемов – бас гитара, Кирилл Васильев – клавишнай, Илья Бурнашев – ударнай) уонна «Дорҕоон дойду»  (Герасим Васильев – гитара, Дмитрий Готовцев  —баян, Сандаара Семенова – скрипка, Алексей Абрамов – флейта) бөлөхтөр ураты тыыннаах муусуканан, тыаһынан-ууһунан хас биирдии ырыалары доҕуһуоллаатылар.  Санатар буоллахха, «Ый суола» бөлөх  былырыын күһүҥҥүттэн бырайыакка кыттыһан үлэлээбит. Инники өттүгэр күүскэ ылсан үлэлээтэхтэринэ, сотору кэминэн баалларын биллэрэр буолуохтаахтар диэн бүччүм  санаа киирэр.

Дьоро киэһэни биллэр-көстөр ыытааччы Николай Гоголев иилээн-саҕалаан ыытта. Кэнсиэр  саха эстрадатыгар ураты суоллаах-иистээх Аскалон Павлов “Ол эрэн” диэн ырыаны толоруутунан саҕаланна. Салгыы Надина Эльпис “Халлаан  күөх» диэн  саҥа ырыатын бэлэхтээтэ.

Амикан, Айгылаан уонна Анатолий Горохов үһүөн ыллаабыттара олус сонуннук көһүннэ. «Бу киэһэ» диэн ырыаны кыайа-тута ыллаатылар. Салгыы Арассыыйа эстрадатыгар киэҥник биллэр-көстөр «А студия» бөлөх репертуарыттан «Джулия» диэн ырыаны үһүөн уратытык толорбуттарын көрөөччүлэр олус астынан иһиттилэр. Василий Еремеев уонна Андреана  «Таабырын таптал» диэн былырыын  дьон сэҥээриитин ылбыт «Сүлүһүннээх таптал» диэн киинэ-сэрийээлгэ ылламмыт ырыаны эмиэ олус истиҥник, дьону уйадытардыы ис-истэриттэн иэйэн-куойан толордулар. Салгыы Байбал Сэмэнэп «Ыйдаҥа», Анастасия Готовцева «Ырыаһыкка», Умсуура Лэгэнтэйдиин «Көрсүөм» диэн ырыалары  ыллаатылар. Манна биири бэлиэтиэххэ наада. Ырыаһыттар сыанаҕа тахсан баран, туох сонуннаахтарыттан саҕалаан ырыаларын туһунан кэпсииллэрэ, инники өттүгэр туох былааннаахтарын   көрөөччүлэри кытта  үллэстэллэрэ эмиэ уратытык көһүннэ. Итинник ньыма саха көрөөччүлэригэр  олус барсар, чугас эбит, били, үүттээх итии чэйи сыпсырыйан иһэ-иһэ кэпсэтэ-ипсэтэ олорору  санатта.

Бырайыак  салгыы үлэлиир

Эстрада тыйаатырын уус-уран салайааччыта Мария Герасимова: «Бу «Ырыа кута» бырайыакпытын салгыы  ыытабыт. Ол эрээри, бу сырыыга артыыстар хамаанданан кыттыахтара. Ол курдук, билиҥҥи быһаарыынан Анастасия Готовцева, Лэгэнтэй, Умсуура, Амикан, Анатолий Горохов, Надина Эльпис, Олимпия  хамандыырдарынан буоллулар. Кинилэр хамаандаларыгар  ырыаһыттары ыҥырыахтара.  Быйыл «Ырыам кута» бырайыак чэрчитинэн, сэттэ  анал кэнсиэр буолуоҕа», — диэн кэпсээтэ.

Эстрада сулуһа кэпсиир

Василий Еремеев, эстрада тыйаатырын артыыһа:
— Бу бырайыагы бастаан Өркөн Егоров саҕалаабыта. Эстрада ырыа­һыттара үксүбүт кэриэтэ кытынна. Саамай сүрүн уратытынан тыыннаах доҕуһуолугар сытар уонна көрөөччүлэри кытта ирэ-хоро кэпсэтии буолар. Көрөөччүлэр ырыаһыттарга ыйытыылары биэриэхтэрин сөп
Бырайыак өссө саҥардыллан, аны хамаанданан кыттар буоллубут. Хамандыырдар кими ыҥыралларын бэйэлэрэ билэллэр. Ыҥырдахтарына кыттыаҕым.

Александр ТАРАСОВ