Баһаартан сэрэхтээх буолуу ирдэбиллэрин тутуһаргытыгар ыҥырабыт!

Ааспыт нэдиэлэҕэ өрөспүүбүлүкэ үрдүнэн барыта 3 ойуур баһаара умуруоруллубута, ол иһигэр Бүлүүгэ 2000 га иэннээх сиргэ 1 ойуур баһаара, Кэбээйигэ 3922 га иэннээх сиргэ 1 ойуур баһаара, Өлүөхүмэҕэ 11 га иэннээх сиргэ 1 ойуур баһаара турбутун Ойуурга сыһыаннаһыыларыгар департамент иһитиннэрбитэ.
От ыйын 26 күнүнээҕи туругунан өрөспүүбү­лүкэ үрдүнэн 40979 га иэннээх сиргэ 11 ойуур баһаарын умуруоруу үлэтэ ыытыллар. 7 ойуур баһаарын умуруора иликтэр, ол иһигэр Горнайга 2 ойуур баһаара 22 005 га иэннээх сиргэ, Кэбээйигэ 2 ойуур баһаара — 6 372 га иэннээх сиргэ, Намҥа 2 ойуур баһаара — 7 900 га иэннээх сиргэ, Ньурбаҕа 1 ойуур баһаара — 540 га иэннээх сиргэ. 4 ойуур баһаара: Үөһээ Бүлүүгэ 2 ойуур баһаара 4 045 га иэннээх сиргэ, Бүлүүгэ 1 ойуур баһаара 85 га иэннээх сиргэ, Ньурбаҕа 1 ойуур баһаара 32 га иэннээх сиргэ умуруоруллубут.
Барыта уоту умуруорууга 604 киһи үлэлээтэ, ол иһигэр Авиалесоохрана сулууспатын 327 парашютист-баһаарынайа уонна десантник-баһаарынайдар, 72 сиринэн сылдьан ойууру харыстыыр сулууспа үлэһиттэрэ, 21 ыксаллаах быһыы-майгы сулууспа байыаһа уонна 184 олохтоох нэһилиэнньэ эдэр ыччата. Маны таһынан барыта олохтоох нэһилиэнньэттэн 54 техника туһанылынна. Бу сылга баһаартан сэрэхтээх кэм саҕаланыаҕыттан 91477,79 га иэннээх сиргэ 163 ойуур баһаарын умуруоруу үлэтэ ыытылынна.
Санатар буоллахха, өрөспүүбүлүкэ үрдүнэн ойуурга регионнааҕы суолталаах ыксаллаах-быһыы майгы биллэриллибитэ.

Муниципальнай оройуоннар баһылыктара ыксаллаах быһыы-майгы хамыыһыйатын салайар үлэлэрэ өссө эбии күүһүрэрэ ирдэниллэр, тус эппиэтинэс кытаатта. Санатар буоллахха, судаарыстыба баһаары утары сулууспатын уонна ыксаллаах быһыыны-майгыны сэрэтэр уонна ол содулун туоратар хамыыһыйа сүрүн соруктара — уоттан нэһилиэнньэлээх пууннары харыстааһын.
Маны таһынан Госдумаҕа Россия Сирин кодексыгар уларытыылары уонна көннөрүүлэри киллэрэргэ докумуон оҥоһуллан киирдэ. Докумуону Россиятааҕы ыксаллаах быһыы-майгы биэдэмистибэтэ бэлэмнээтэ. Көҕүлээһин быһыытынан оттуур ходуһа бас билээччилэриттэн, маны таһынан тыа хаһаайыстыбатыгар анаммыт сирдээх биирдиилээн бас билээччилэртэн ойуур баһаарын умуруорарга эбэһээтэлистибэ ылыналлара ирдэнэр. Көҕүлээһин ааптардара бэлиэтииллэринэн, Россиятааҕы Ойуур кодексын быһыытынан, ойууру баһаартан харыстааһын сэрэтэр уонна умуорар үлэлэри ыытары уонна ылары ирдиир. Сүрүн кыһалҕанан оттуур ходуһалар, ону таһынан тыа хаһаайыстыбатыгар ананан бэриллибит сирдэр араас мастарынан, талахтарынан уонна сыыс отунан өлгөмнүк үүнэллэрэ буолар. Бу кыһалҕаны туоратыыга биирдиилээн сирдэри бас билээччилэр ойуур баһаара турбатын туһугар эрдэттэн сөптөөх миэрэлэри ылбаттара бэлиэтэнэр. Ойуур баһаардара турбут сирдэрин үөрэтии түмүгэр ойуур баһаарын умуруорууга ыксаллаах быһыы-майгы биэдэмистибэлэрэ, анал федеральнай сулууспалар үлэлииллэрэ ыйыллар, ол түмүгэр тустаах ойуур баһаара турбут улуус нэһилиэнньэлээх пууннарыгар уоттан харыстааһын дьаһаллара ылыллыбаттар. Россия үрдүнэн баһаартан сэрэхтээх буолуу быраабылаларын кэһии түмүгэр административнай ыстараап уонна эппиэтинэс үрдүүрүн туһунан сокуон барыла оҥоһуллан Госдумаҕа көрүллүө.
Ойуурга баһаартан сэрэхтээх буолуу ирдэбиллэрин тутуһаргытыгар ыҥырабыт!