Дьокуускайга Россияҕа Саха Сирин аҕыс улууһа Арктика састаабыгар киирбитин бэлиэтээтилэр

Ыам ыйын 21 күнүгэр, Дьокуускайга, Бүтүн Россиятааҕы Полярник күнэ уонна Россияҕа 8 улуус Арктика састаа­быгар киирбитин «Арктика – территория развития» кэнсиэринэн бэлиэ­тээтилэр. Тэрээһиҥҥэ «Аар аартык» норуот, «Аюлна» этнофольклорнай ансаамбыллара уонна «Түйэркэн» устуодьуоннар театра кыттыыны ыллылар. Бу үөрүүлээх түгэнинэн киин куорат олохтоохторун аҕыс Арктика улуустарын бэрэстэбиитэллэрэ, айар кэлэктииптэрэ уонна өрөспүүбүлүкэ үрдүкү салалтатын салайааччылара эҕэрдэлээтилэр.

Санатар буоллахха, эрдэ Арктика састаабыгар Анаабыр, Булуҥ, Усуйаана, Аллайыаха, Үөһээ Халыма улуустара киирэр эбит буоллахтарына, ыам ыйын 13 күнүттэн Абый, Дьааҥы, Эдьигээн, Муома, Аллараа Халыма, Өлөөн, Орто Халыма, Эбээн Бытантай улуустара киирдилэр. Онон инники сылларга Арктика биир эрэ хайысхата буолбакка, бары салаата кэлимник сайдыахтаах уонна тустаах дьаһаллар олохтоох дьон дьарыктаах буоларыгар, олоҕо-дьаһаҕа саҥа таһымҥа тахсарыгар олук буолуохтаах.
“Бу бэлиэ күн дойду үрдүнэн 2013 сылтан биэлиэтэнэр, Арктика эргин хоту олорор, үлэлиир уонна сайдыыга олук киллэрэр араас дьонун сомоҕолуур.
Маны таһынан, Полярник күнэ Арктика арыйыы­тын бастакы кирбиилэригэр кыттыспыт дьоҥҥо убаастабыллаах сыһыаны олохтуур. Билигин Арктика регионнарын сайдыытыгар араас үлэлэр, тэрээһиннэр ыытыллаллар, итини тэҥэ Уһук Илиҥҥи сайдыы министиэристибэтигэр дойду Президена В.В Путин быһаарыытынан, Арктика сайдыытыгар тустаах сокуоннары ылыныыга уонна үлэни ыытарга боломуочуйаны сыһыарбыта. Ол курдук, Арктика сайдыытыгар регионнарынан бигэргэммит Стратегия күүстээхтик үлэлиир, саҥа федеральнай сокуон барыла оҥоһуллар. Сүдү кыайыы­быт — Арктика састаабыгар Саха сирин 8 улууһа киирбитэ буолар. Онон инники өттүгэр былааннар уонна соруктар үгүстэр”, — диэн СӨ Бырабыыталыстыбатын бэрэсээдээтэлин солбуйааччыта Денис Белозеров эҕэрдэлээтэ.

Абый, Дьааҥы, Эдьигээн, Муома, Аллараа Халыма, Өлөөн, Орто Халыма, Эбээн Бытантай улуус­тарын олохтоох дьаһалталар бэрэстэбиитэллэригэр өйдөбүнньүк Арктика карталарын үөрүүлээх быһыыга-майгыга туттардылар.

Василий ПРОКОПЬЕВ
СИА хаартыскаҕа түһэриилэрэ