763
13 апреля 2018 в 12:41
90 саастаах ытык кырдьаҕаһы чиэстээһин
Салгыы Мүрү нэһилиэгэр Бороҕоҥҥо Александр Жирков Уус Алдан улууһун, Мүрү, Хоро нэһилиэктэрин бочуоттаах олохтооҕо, Саха Өрөспүүбүлүкэтин бочуоттаах бэтэрээнэ, олохтоох суолталаах персональнай пенсионер, «1941-1945 cc. Аҕа дойду сэриитигэр килбиэннээх үлэтин иһин” мэтээллээх Аҕа дойду сэриитин бэтэрээнэ, “Партийнай килбиэн” уордьан, “Гражданскай килбиэн” бэлиэ хаһаайката, ытык олоҕу олорбут, олоҕун үлэҕэ анаабыт Анна Пухова 90 cаастаах үбүлүөйүнэн истиҥ эҕэрдэтин тиэртэ.
Анна Пухова туһунан Александр Николаевич маннык аҕынна: “Биһиги Бэйдиҥэҕэ маҥнайгы кылааска үөрэнэ киирэрбитигэр Анна Ивановна завуч этэ. Кини дьиэ кэргэнинээн биһигиттэн биир уулуссаҕа икки дьиэ нөҥүө олорбута. Онон оҕо эрдэхпиттэн билэбин, ытыктыыбын. Маны сэргэ биир түгэни хайаан да ахтан ааһыым. Анна Ивановна 60-c сс. Уус Алдаҥҥа үлэлии сырыттаҕына, оройуон салалтата “Саха АССР үтүөлээх учуутала” наҕараадаҕа түһэрбит эбит. Ол кэмҥэ Уус Алдан уонна Нам холбоһон Среднеленскэй буолбуттара. Икки оройуон холбоһор кэмигэр ол докумуон мунан хаалбыт. Куопуйата Анна Ивановнаҕа баар эбит. Ол гынан баран наҕараадалыыр хамыыһыйаҕа киирбэккэ, билиммэтэхтэр. Кэлин бу умнууга хаалбыта. 90 саас диэн ылбычча киһи тиийбэт сааһа. Дьоллоох, дьоһуннаах саас. Аймахха, дьоҥҥо-сэргэҕэ, бүтүн омукка да холобур буолар сэдэх көстүү. Маннык үрдүк сааска тиийии, сүһүөх үрдүгэр, өйү-санааны ыһыктыбакка илдьэ сылдьыы чахчы ураты. Анна Ивановна билигин да тылын-өһүн уотун-күөһүн умулуннара илик, ылыннарар кыахтаах, туруорсар дьулуурун сүтэрэ илик киһи. Уһун сыллар усталарыгар үөрэҕирии сайдыытыгар, ыччаты иитиигэ, саха дьоно бэйэлэрин туруктаах санааларын туруорсууларыгар киллэрбит кылаатыҥ, уҕараабат эрчимиҥ, дьулууруҥ иһин Саха Өрөспүүбүлүкэтин үрдүкү наҕараадатын — «Саха Өрөспүүбүлүкэтин үөрэҕириитин үтүөлээх үлэһитэ” аат туоһу докумуонун уонна Ил Түмэн Махтал суругун туттарарбын көҥүллээҥ. Бу Саха Өрөспүүбүлүкэтин историятыгар бэлиэ түгэн – 90 сааска маннык үрдүк аат кимиэхэ да иҥэриллэ илик этэ”, — диэн Александр Николаевич бэлиэтээн эттэ.
Анна Ивановна үрдүк наҕарааданы үөрэнээччититтэн тутан, үөрэн сэгэс гынна, бэл уйадыйан хараҕын уутун сотунна. Мустубут аймах-билэ дьоно, нэһилиэк салалтата, ыалдьыттар өрөгөйдөөн ытыс таһынан, Анна Ивановнаны өссө төгүл долгуттулар.
