Аан дойду барыта өйдүүр

Сэрии хонуутугар өлбүт буойуннары кэриэстээри уонна сэрии, тыыл бэтэрээннэригэр ытыктабылы биллэрээри Саха Өрөспүүбүлүкэтин Ил Дархана Егор Борисов, Судаарыстыбаннай Мунньах (Ил Түмэн) Бэрэссэдээтэлэ Александр Жирков, СӨ судаарыстыбаннай сүбэһитэ Андрей Борисов, СӨ Бырабыыталыстыбатын Бэрэссэдээтэлэ Евгений Чекин, СӨ Конституционнай суутун бэрэссэдээтэлэ Александр Ким-Кимэн, Дьокуускай куорат мэрэ Айсен Николаев, архиепископ владыка Роман, уо.д.а. өрөспүүбүлүкэ салайааччылара, Аҕа дойду Улуу сэриитин уонна тыыл бэтэрээннэрэ, норуот дьокутааттара, уопсастыбаннас, политическай партиялар бэрэстэбиитэллэрэ кэлбиттэр.

Бу сиэр-туом Улуу Кыайыы сырдык күнүгэр диэри тиийбэтэх, кыргыһыы хонуутугар өлбүт, сураҕа суох сүппүт буойуннары, бэйэни харыстаммакка үлэлээбит тыыл бэтэрээннэрин кэриэстиир саҥата суох туруу мүнүүтэтиттэн саҕаланна.

Өрөспүүбүлүкэ Баһы­лыга Егор Борисов болуоссакка мустубут дьону эҕэрдэлииригэр, Са­ха сирин дьоно, атын өрөспүүбүлүкэлэр бэрэстэбиитэллэрин кытта тэҥҥэ сэрии ыарахаттарын санныларыгар сүкпүттэрин, бары улуу кыргыһыыларга кыттыбыттарын уонна Германияҕа тиийэ өстөөҕү урусхалласпыттарын бэлиэтээтэ. Кини өстөөҕү үлтүрүтүүгэ тыыл бэтэрээннэрэ кыаллары барытын оҥорбуттарын иһин ураты махталы биллэрдэ.

Ил Түмэн Бэрэссэдээтэлэ Александр Жирков, сэрии уонна тыыл бэтэрээннэригэр, Улуу Кыайыыны уһансыбыт дьоруойдар сыдьааннарыгар туһаайан: “Кэм-кэрдии дьулусханнык иннин диэки устар, эргэ баастар оһоллор, сорох өйдөбүллэри бириэмэ суурайар. Ол эрээри биир сүрүн өйдөбүл хаалар – бу элбэх омуктартан турар сэбиэскэй норуот сир үрдүгэр саамай улуу хара дьайы кыайыыта. Сыл-хонук аастаҕын аайы киһи аймах Кыайыы улуу суолтатын өйдүүрэ дириҥээн иһиэҕэ. Кинилэр аан дойдуга бу Кыайыыны аҕалбыт норуокка махтаныахтара. Ити кыайбыт норуот – биһиги, Ийэ сирбит элбэх омуктаах норуота”.

Саха сирин парламенын спикерэ бу күн Кыайыы болуоссатынан “Өлбөт үйэлээх полка” ааһыахтааҕын санатан туран, дойдубут хас биирдии дьиэ кэргэнигэр Улуу Кыайыы туһунан өйдөбүл умнуллуо суоҕун уонна мэлдьи кыайбыттар албан ааттарын санатыаҕын бэлиэтээтэ.

«Дьокуускай куорат олохтоохторо уонна ыалдьыттара, миэхэ, Аҕа дойду Улуу сэриитин кыттыылааҕар, эһигини улуу бырааһынньыгынан – Кыайыы 73 сыла туолбутунан эҕэрдэлиирбин көҥүллээҥ. Мин Ийэ дойдум иһин 2 сыл уонна 8 ый сэриигэ кыттыбытым. Дьиэ кэргэммиттэн уонна аймахтарбыттан 6 саллаат фроҥҥа аттаммыта. Бу түөрт сыл устатыгар барбыт сэрии хас биирдии дьиэ кэргэҥҥэ улахан сүтүгү аҕалбыта. Төһөтүн да иһин, биһиги, буойуннар, Ийэ сирбит чэчириирин туһугар кыаллары барытын оҥорбуппут», — диэтэ Аҕа дойду сэриитин кыттыылааҕа, Аҕа дойду сэриитин 2-с истиэпэннээх уордьанын кавалера, СӨ норуотун хаһаайыстыбатын үтүөлээх үлэһитэ Михаил Попов.

Бэтэрээн болуоссакка баар сэрии кыттыылаахтарыгар махталы тиэртэ, кинилэргэ кытаанах доруобуйаны уонна дьолу баҕарда.

Ити кэнниттэн бэтэрээннэргэ баҕа санааларын уонна махталларын Дьокуускай баһылыга Айсен Николаев, киин куорат Думатын бэрэссэдээтэлэ Александр Саввинов уонна волонтер, 31 №-дээх оскуола 10-с кылааһын үөрэнээччитэ Евгений Амбросьев эттилэр.

Миитин кэнниттэн байыаннай-патриотическай парадка интернационалист-буойуннар, Хотугу Кавказ регионугар байыаннай дьайыылар кыттыылаахтара уонна бэтэрээннэрэ, 14129 №-дээх байыаннай чаас кээмэйдиир пуунун байыаннай сулууспалаахтара, ИДьМ сотрудниктара, Национальнай гвардия федеральнай сулууспатын управлениетын байыастара, үөрэнээччилэр, кинологтар кулууптарын чилиэннэрэ уо.д.а. кытыннылар.

Парад кэнниттэн тута “Өлбөт үйэлээх полка” тыһыынчанан кыттыылаахтара чугас дьоннорун, Улуу Кыайыыны уһансыбыт Сэбиэскэй Аармыйа саллааттарын, сэрии ыардарын санныларыгар сүкпүт тыыл үлэһиттэрин, партизаннар этэрээттэригэр өстөөҕү утары кыргыс­пыт дьон хаартыскаларын илдьэ Кыа­йыы болуоссатынан аастылар.

Кыайбыт көлүөнэ сыдьааннарын халыҥ кэккэтигэр бэйэлэрин саамай чугас дьоннорун, бэтэрээннэр мэтириэттэрин илдьэ Ил Түмэн Бэрэссэдээтэлэ Александр Жирков, Ил Түмэн Бэрэссэдээтэлин солбуйааччы Ольга Балабкина, парламент судаарыстыбаннай тутууга уонна сокуону оҥорууга сис кэмитиэтин бэрэссэдээтэлэ Алексей Еремеев, наукаҕа, үөрэххэ, култуураҕа, сонуну киэҥник тарҕатар ситимнэргэ уонна уопсастыбаннай тэрилтэлэр дьыалаларыгар сис кэмитиэт бэрэссэдээтэлэ Антонина Григорьева, норуот депутата Дмитрий Семенов, о.д.а. хаамтылар.

Василий КОНОНОВ хаартыскаҕа түһэриилэрэ.