Александр Жирков опера маастарын эҕэрдэлээтэ

Анегина Егоровна Ильина-Дмитриева  — уһулуччулаах опера ырыаһыта, сэбиэскэй кэм, Россия опернай искусствотын бөдөҥ бэрэстэбиитэллэрин ортотугар бочуоттаах миэстэни ылар.
Кини Саха сирин вокалистарыттан бастакынан Бүтүн Сойуустааҕы уонна норуоттар икки ардыларынааҕы вокальнай куонкурустарга чаҕылхай кыайыылары ситиспитэ, онон төрөөбүт өрөспүүбүлүкэтин музыкальнай култууратын эрэ буолбакка, бүтүн Россия вокальнай оскуолатын, сэбиэскэй искусство аатын-суолун өрө көтөхпүтэ.
Бу бэлиэ күн кини талааныгар үгүс ахсааннаах сүгү­рүйээччилэрэ, кэллиэгэлэрэ, үөрэнээччилэрэ, биир дойдулаахтара чиэстии кэллилэр.
СӨ Судаарыстыбаннай Мунньаҕын (Ил Түмэн) аатыттан юбиляры Бэрэссэдээтэл Александр Жирков эҕэрдэлээтэ.
Кини тыл этиитигэр манныгы бэлиэтээтэ: «Бүгүн Анегина Ильинаҕа-Дмитриеваҕа А.Е.Кулаковскай аатынан Судаарыстыбаннай бириэмийэ ананна – бу дьоһун наҕараада, Анегина Егоровна феноменын уопсастыба, өрөспүүбүлүкэ бары олохтоохторо билиниилэрэ. Артыыс төһө бэлэмнээҕиттэн, талааныттан, идэтигэр бэри­ниилээҕиттэн тутулуга суох көрөөччү иннигэр тахсыыта – бу долгутуулаах түгэн. Анегина Егоровна үйэ аҥаарыттан ордук кэмҥэ бэйэтин көрөөччүтүн иннигэр тахсар. Хас та­ҕыстаҕын аайы көрөөччүнү кытта көрсүһэриттэн долгуйар. Бүгүн төрөөбүт бэлиэ күнүгэр Анегина Егоровнаҕа саамай долгутуулаах түгэннэртэн биирдэстэрэ үүннэ».
Александр Жирков санаппытынан, Анегина Ильина 16 саастааҕар Норуоттар икки ардыларынааҕы вокальнай түһүлгэҕэ аан бастаан ыллаабыта. 1967 сылга ХХII норуоттар икки ардыларынааҕы “Пражская весна” фестивальга вокалистар куонкурустарын лауреатынан буолбута. Номоххо киирбит артыыстар Василий Местников уонна Дмитрий Ходулов кэннилэриттэн үһүс киһинэн Сэбиэскэй Сойуус народнай артыыскатын аатын ылбыта.
«Анегина Егоровна бэйэтин сүгүрүйээччилэрин салгыы үөрдэр, Россия, Саха сирин вокальнай оскуолатын чиэһин көмүскүүр. Ааспыт сыл ахсынньытыгар Москваҕа Улахан театрга киниэхэ Россия музыкальнай театрдарын Ассоциациятын “Легенда” бириэмийэтин туттарбыттара. Ити күннэргэ биһиги делегациябыт Москваҕа баара. Онно сылдьаммын ааттаах-суоллаах ырыаһыттар Анегина Ильина-Дмитриева саарбахтаммат талааныгар сүгүрүйэллэрин көрбүтүм. Олус үчүгэй ахтыы киэһэтэ буолан ааспыта», — диэн бэлиэтээтэ Ил Түмэн спикерэ.
Александр Жирков Анегина Егоровнаҕа уһун, айымньылаах олоҕу, үтүө доруобуйаны баҕарда итиэннэ Ил Түмэн Бочуотунай Грамотатын туттарда.
Юбиляры өрөспүүбүлүкэ Бырабыыталыстыбатын Бэрэссэдээтэлин солбуйааччы Михаил Гуляев, култуура, духуобунай сайдыы миниистирэ Владимир Тихонов, Опера уонна балет судаарыстыбаннай театрын директора Сергей Сюльскай уонна да атыттар эҕэрдэлээтилэр.
Анегина Егоровна Саха сирин операнай сценатыгар үйэ аҥаарын курдук кэми анаата, ол иһигэр 25 сыл устатыгар СӨ Музыка үрдүкү оскуолатын академическай ырыаҕа уонна опернай бэлэмҥэ кафедра сэбиэдиссэйинэн, профессорынан үлэлиир.
Кини аата өрөспүүбүлүкэ музыкальнай искусствотын көмүс фондатыгар үйэ-саас тухары киирбитэ, оттон ураты куолаһа саха норуотун киэн туттуутунан уонна сыаннаһынан буолла.