Анна Жиркова 97 сааһынан

Анна Жиркова 1920 сыллаахха Дүпсүн улууһун Өспөх нэһилиэгэр Ампаардаах диэн сиргэ төрөөбүтэ. Кини өрөбөлүүссүйэ иннинээҕи Россия бастыҥ университеттарыгар сахалартан биир бастакынан үрдүк үөрэҕи ылбыт дьонноох аатырбыт Афанасьевтар аҕа уустарын сыдьаана буолар. Анна Николаевна аҕатын кытта бииргэ төрөөбүт Иван Николаевич Жирков өрөспүүбүлүкэҕэ үөрэх наркомунан үлэлээбитэ. Анна Николаевна Дьокуускай куорат 2 №-дээх оскуолатын бүтэрбитэ, Саха сиринээҕи судаарыстыбаннай педагогическай институт естественнэй факультетын бастакы бүтэрээччилэриттэн биирдэстэрэ. Кини олоҕун талбыт идэтигэр анаабыта, үгүс көлүөнэ ыччат тапталлаах учууталынан, эдэр коллегаларыгар сүбэһитинэн-амаһытынан буолара.
Анна Жиркова  — саха литературатын төрүттээччилэртэн биирдэстэрин, бэйэтин аҕатын бастыҥ доҕоро Анемподист Софроновы — Алампаны чугастык билэр, кинини кытта алтыспыт, билигин баар дьонтон соҕотох киһи буолар.

Саха сирин парламенын Бэрэссэдээтэлэ Александр Жирков Анна Николаевнаны күн сирин көрбүт күнүнэн эҕэрдэлээтэ, сибэкки туттаран, бөҕө доруобуйаны баҕарда.
Спикер: «Анна Николаевнаны кытта хас көрүстэҕим аайы бу муударай, сырдык киһиттэн сөҕөрбүттэн салгыбаппын. Кини – сэрии иннинээҕи интеллигенция чаҕылхай кэрэһитэ. Улахан буукубаттан Учуутал. Кини ис дууһатыттан дьону тардар дьикти сылааһынан илгийэр», — диэтэ.
«Үгүс биллиилээх дьону кытта билсибит Анна Николаевна ахтыыларыттан кини эт хараҕынан көрбүт историческай түгэннэрэ тиллэн кэлэллэр, хас сырыы аайы бэйэҕэр үгүс саҥаны арыйаҕын. Төһө да ытык саастаах буоллар, Анна Николаевна бэйэтин кэпсээннэригэр ол быдан дьыллар түгэннэрин ымпыктаан-чымпыктаан, умнубакка өйдүүрэ дьикти», – диэтэ Александр Жирков.
Анна Жиркова бэйэтин чугас дьонун, аймахтарын туһунан ахтан ылла уонна киниэхэ тулалыыр дьон кыһамньыта олоҕун уһатарын бэлиэтээтэ. Анна Николаевна сылаас сыһыанын иһин Ил Түмэн спикеригэр махтанарын биллэрдэ уонна норуот уйгутун туһугар таһаарыылаах үлэни баҕарда.