Ис дьыала уорганнарын үбүлүөйдээх ыһыаҕар

РФ ис дьыалаларга миниистирэ, РФ полициятын генерала Владимир Колокольцев бу түгэнинэн эҕэрдэтин ыытта. СӨ Бырабыыталыстыбатын Бэрэссэдээтэлин э.т. Владимир Солодов, СӨ ис дьыалаларга миниистирэ Владимир Прокопенко, СӨ Конституционнай суутун Бэрэссэдээтэлэ Александр Ким-Кимэн уонна бочуоттаах ыалдьыт, полиция ветерана, Саха сирин Силиэстийэлиир управлениетын 1976-1981 сс. салайааччыта Петр Волков эҕэрдэ тылы эттилэр.

СӨ Судаарыстыбаннай Мунньаҕын (Ил Түмэн) Бэрэссэдээтэлэ Александр Жирков бэйэтин этиитигэр Саха сирин ис дьыалаларга уорганнарын үбүлүөйдээх тэрээһинэ Саха норуота үөскээбит историческай миэстэтигэр – Үс Хатыҥҥа буолара “бу түбэһиэх буолбатах, чуолаан бу миэстэҕэ биһиги бүгүн судаарыстыбаннас уонна бэрээдэги хааччыйыы харысхалыгар турар өрөспүүбүлүкэбит ис дьыалаларга уорганнарын 100 сылын бэлиэтиибит. Саха сирин полициятын үбүлүөйэ Россия полициятын 300 сылын кытта сөп түбэспитэ эмиэ бэлиэ түгэн. Бу «Полиция» диэн термини аан бастаан 1718 сыллаахха Петр Великэй уопсастыбаҕа бэрээдэги кэтээн көрөр анал сулууспаны тэрийиигэ киллэрбитэ” диэн бэлиэтээтэ.

Александр Николаевич өрөспүүбүлүкэ ис дьыалаҕа уорганнарын урукку уонна билиҥҥи көлүөнэлэрин икки ардыларыгар быстыспат историческай ситим, күннээҕи дьыалаларга уонна уопсастыбаҕа бэрээдэги итиэннэ конституционнай тутулу араҥаччылааһыны хааччыйыыга сүрүн соруктары быһаарыыга утумнааһын баарын бэлиэтээтэ.  “Ис дьыала уорганнарыгар сулууспалааһын – бу, саарбаҕа суох, ураты анал. Үгүстэргэ полиция кэккэтигэр сулууспалааһын – бу олохторун майгыта уонна идэ эрэ буолбатах, бу – дьылҕа. Полиция кэккэтигэр турунарга, сокуоннары туйгуннук билиини таһынан, эр санаалаах, бэриниилээх буолуу, көмүскэлгэ наадыйар дьоҥҥо көмөҕө кэлэргэ бэлэм буолуу, атыттарга холобур буолуу курдук хаачыстыбалар ирдэнэллэр.

Ис дьыала уорганнарын сотрудниктара үгүс сыллар тухары гражданнар конституционнай бырааптарын уонна көҥүллэрин тутуһууну хааччыйаллар, Саха сирин экономиката уонна социальнай олоҕо туруктаныытыгар тирэх буолаллар. Өрөспүүбүлүкэ олохтоохторо полицияҕа саамай күндүнү – олохторун уонна доруобуйаларын, куттала суох, нус-хас олохторун итэҕэйэллэр.

Бүгүн биһиги бэйэлэрин дьайыыларынан, дьыалаларынан уонна хорсун быһыыларынан ис дьыала уорганнарын летопиһын үөскэппит ветераннарга ытыктабылы этэбит. Бу – биһиги уопсай нэһилиэстибэбит. Үгүс өттүгэр чуолаан бу билигин да ис дьыала уорганнарыгар гражданнар ытыктабыллаах сыһыаннарын быһаарар. Ол биир  туоһута – Дьокуускайга Саха сирин дьонуттан биир бастакы милиция  генерал-майора Виталий Измеров аатынан уулуссаны уонна өйдөбүнньүк дуосканы аһыы.

Бу өрөгөйдөөх быраа­һынньык күнүгэр үлэҕитигэр хорсун быһыыгыт, бөҕө тулуургут, күүстээх эр санааҕыт иһин эһиэхэ истиҥ уонна дириҥ махтал тыллары этэбин. Чэпчэкитэ суох, ол эрээри суолталаах уонна наадалаах үлэҕитигэр ситиһиилэри уонна таһаарыылаах үлэни баҕарабын. Уруй-Айхал!”, — диэн этиитин түмүктээтэ Александр Жирков.

Өрөспүүбүлүкэ социальнай-экономическай эйгэтигэр өр сыллаах таһаарыылаах үлэлэрин иһин үрүҥ көмүс бэлиэни туттаран туран, Ил Түмэн Бэрэссэдээтэлин Махтала “СӨ-гэр ИДьМ хаһаайыстыбаннай уонна сервиһинэн хааччыйыыга киинэ” ФКУ атыыны тэрийиигэ отделениетын маркетиҥҥа исписэлииһэ Майя Слепцоваҕа уонна ис сулууспа старшай лейтенана, ИДьМ иһитиннэриигэ уонна уопсастыбаннай сибээстэргэ старшай референэ Артем Егоровка биллэрилиннэ.

Саха Өрөспүүбүлүкэтин судаарыстыбаннаһын бөҕөр­гөтүүгэ кылаатын иһин кыһыл көмүс чаһыны туттаран туран, Ил Түмэн Бочуотунай грамотатынан СӨ-гэр ИДьМ экономикаҕа куттал суох буолуутугар уонна коррупцияны утары охсуһууга Управлениетын коррупцияны утары  отделын начальнига Михаил Кулачиков наҕараадаланна.