“Мин туйгун норуотум — айар күүс кыһата”

Суорун Омоллоон аатынан Судаарыстыбаннай Опера уонна балет тыйаатырыгар Былатыан Ойуунускай төрөөбүтэ 125 сылыгар аналлаах «Мин туйгун норуотум  — айар күүс кыһата» дьоро киэһэ буолла.

Тэрээһин бастакы чааһыгар Бы­латыан Ойуунускай аатынан Тааттатааҕы народнай театр артыыстара Д.К. Сивцев – Суорун Омоллоон «Лоокуут уонна Ньургуһун» либреттотынан музыкальнай драма көрдөрдүлэр.

Таат­та улууһун баһылыга Михаил Соров биир дойдулаахтарын, ыалдьыттары истиҥник эҕэрдэлээтэ. Улууска ыытыллар үлэ-хамнас, үбүлүөйдээх тэрээһин туһунан сырдатта. «Улуу убайбыт Былатыан Ойуунускай төрөөбүтэ 125 сылыгар анаан Саха Өрөспүүбүлүкэтин Аҕа баһылыга Егор Борисов Бырабыыталыстыба бэрэссэдээтэлэ Евгений Чекин салайааччылаах анал хамыыһыйа тэрийбитэ. Бу хамыыһыйа улууспутугар тахсан иккитэ мунньахтаата. Туһааннаах докумуоҥҥа илии баттаата, ол чэрчитинэн улуус салалтата үлэни ыытан саҕалаабыта», — диэн иһитиннэрдэ.

Улуус баһылыга төрөөбүт тө­рүт түөлбэлэригэр күүс-көмө, сүбэ-ама буолар биир дойдулаахтарыгар махтанна. Норуот билиниитинэн «Гордость Якутии» күрэххэ «Култуура диэйэтэлэ» номинация­ны ылбыт, үгүс ыччаты кэрэҕэ уһуйбут ытык-мааны Августина Федоровна Клакиноваҕа махтал бэлиэтин сибэкки дьөрбөтүн бэлэхтээтилэр.

Михаил Соров Таатта улууһун Бочуоттаах олохтооҕо ааты Өрөспүүбүлүкэтээҕи 2№ балыыһа трамватологияҕа салаатын сэбиэдиссэйигэр Степан Тордуиҥҥа, «Таатта улууһугар үөрэхтээһин сайдыытыгар кылаатын иһин» анал бэлиэни Саха Өрөспүүбүлүкэтин наукаҕа уонна үөрэхтээһиҥҥэ миниистирин солбуйааччытыгар Андрей Поповка туттарда.

Саха Өрөспүүбүлүкэтин Ил Түмэнин Бэрэссэдээтэлэ Александр Жирков ытык дьонноох Таатта улууһун дьонун-сэргэтин дьоро киэһэнэн өрөспүүбүлүкэ парламенын уонна тус бэйэтин аатыттан истиҥник эҕэрдэлээтэ.

Саха норуота былыр-былыргыттан тимир ууһун быһыытынан биллэрин, бэйэтин күннээҕи олоҕор туттар малын-салын мындырдык оҥостон олорбутун, ол оҥоһуктар күн бүгүн музейдарга ууруллан сыталларын аҕынна. Биир кэмҥэ Емельян Ярославскай аатынан кыраайы үөрэтэр музей бу оҥоһуктары түмэ сатаабытын, ол эрээри улуустар бэйэлэрин сүрүн экспонаттарын биэриэхтэрин баҕарбаттарын, харахтарын харатын курдук харыстыылларын эттэ. Спикер салгыы Баайаҕаҕа Борис Неустроев — Мандар Уус уонна Николай Егоров – Баайаҕыын сүбэлэһэн, үөрэппит уустарын тылларыгар киллэрэннэр, сорудах биэрэннэр, ол дьон сорук оҥостоннор Саха сирин музейдарын кэрийэ сылдьан тимиринэн оҥоһуллубут сэби-сэбиргэли хайдах баарынан ойуутугар-дьарҕаатыгар, тимиригэр, маһыгар, ону ааһан ыйааһыныгар, тимирин састаабыгар тиийэ үтүгүннэрэн оҥор­бут­тарын, саха уустара ааспыт үйэлэргэ хаалларбыт маллара диэн, норуокка көрдөрөөрү үлэлии сылдьалларын, аҕыйах хонуктааҕыта Дьокуускайга быыстапка туруорбуттарын кэпсээбитин мустубут дьон сэргээтэ. «Тааттаттан төрүттээх уус дьон баҕа өттүлэринэн уопсайа дьоһуннаах, улахан 91 оҥоһугу оҥорбуттар. Урукку өттүгэр биһиэхэ итинник көстүү суоҕа. Кинилэр Баайаҕаҕа урук­ку оскуолаларын сөргүтэн, саха уустарын бастыҥ оҥоһуктарын музейа оҥорор ыра санаалаахтар. Бу үлэлэри онно туруорар былааннаахтар. Ол ыра санаалара туоларыгар, олоххо киирэригэр баҕарабын», — диэн түмүктээтэ.

Александр Жирков ытык-мааны Таатта дьонугар үөрэххэ, үлэҕэ ситиһиини баҕаран туран, өрөспүүбүлүкэ социальнай-экономическай сайдыытыгар кылаатын иһин Саха Өрөспүүбүлүкэтин Ил Түмэнин Бочуотунай Грамотатын Николай Егоров — Баайаҕыыҥҥа, Саха Өрөспүүбүлүкэтин үөрэ­ҕириитин салаатыгар өр сыллаах үлэтин иһин Ил Түмэн Бэрэссэдээтэлин Махтал суругун Екатерина Чехордунаҕа уонна Саха Өрөспүүбүлүкэтин култууратыгар кылаатын иһин Ил Түмэн Бэрэссэдээтэлин Махтал суругун Станислав Луковцевка туттартаата.

Саха Өрөспүүбүлүкэтин Бы­ра­быыталыстыбатын Бэрэссэдээтэлин солбуйааччы Алексей Дьячковскай биир дойдулаахтарын Таатта улууһун күннэринэн эҕэрдэлээтэ уонна Саха Өрөспүүбүлүкэтин Ил Дарханын аатыттан эҕэрдэ суругу улуус баһылыгар Михаил Соровка туттарда. «Улуу убайбыт Былатыан Ойуунускай олоҕун, үлэтин Саха сирин кэскилин туһугар анаабыта. Кини судаарыстыбаннаһы олохтоспута, бүтүн киһи аймах олоҕун анаарар улуу айымньылары хаалларбыта, өрөспүүбүлүкэҕэ тыл науката сайдарын түстээбитэ. Тааттаттан силистээх-мутуктаах дьон улуу убайбытынан киэн туттабыт», — диэн эттэ.

Салгыы улуус уус-уран са­модеятельноһын кыттыылаах­тарын кэнсиэрэ дохсун ытыс тыа­һынан доҕуһуолланна. Алаас ахтылҕаннаах ырыата-тойуга, үҥкүүтэ-битиитэ, үс саха үөрүүтэ-көтүүтэ, түөрт саха кэтит кэскилэ олохтонно.