Саха телевидениетэ төрүттэммитэ 55 сылын туолла

«Саха» НКИХ араадьыйа уонна телевидение биэриитин эйгэтигэр Россия регионнарыттан биир инники күөҥҥэ сылдьар бөдөҥ хампаанньа буолар. Хампаанньа Саха сирин Президенин 1992 с. кулун тутар 3 күнүнээҕи Уурааҕынан тэриллибитэ, араадьыйа уонна телевидение биэриитин эйгэтигэр Саха АССР Судаа­рыстыбаннай кэмитиэтин үлэтин утумнааччы.
Өрөспүүбүлүкэ үрдүнэн соҕотох регионнааҕы телевидение уонна араадьыйа хампаанньата Саха сиригэр көрдөрөр-иһитиннэрэр социальнай суолталаах бырайыактара: уопсастыба уонна политика, социальнай эйгэ уонна экономика, култуура уонна духуобунас, үөрэхтээһин, оҕоҕо сыһыаннаах бырагыраамалар уо.д.а. Билиҥҥи туругунан «Саха» НКИХ Россия үрдүнэн биэс бастыҥ араадьыйа уонна телевидение биэриитин HD форматынан көрдөрөр хампаанньалар ортолоругар киирэр, ол курдук 2018 с. от ыйын 1 күнүттэн «Саха» НКИХ үрдүк хаачыстыбалаах HD форматынан көрдөрөр.

Кылгас кэм иһигэр баар ирдэбиллэргэ толору эппиэттиир үс ханаа­лы үлэлэтэр буолла: «Якутия 24», «Саха» НКИХ уонна «Мамонт». «Якутия 24» ханаал бы­йыл олунньу 1 күнүттэн үлэлиир. Ону таһынан икки араадьыйа биэриитин ыытар: Дьокуускай куорат иһинээҕи «Радио Саха — Саха араадьыйата» уонна өрөспүүбүлүкэтээҕи «Тэтим — Саха сирин араадьыйата – Тэтим – Радио Республики Саха».
Кэлэктиип айар уонна техническай ис кыаҕынан спутнигынан биэриини олоххо киллэрэн, дьаныардаахтык үлэлиир. Хампаанньа барыта 526 үлэһиттээх, өрөспүүбүлүкэ үрдүнэн 23 улууска филиал­лаах. Маны таһынан хампаанньа филиал­лара Москва, Санкт-Петербург уонна Хабаровскай куораттарга үлэлииллэр.
Саха» НКИХ бүгүҥҥү күҥҥэ үлэтин сыаллара: көрөөччү ахсаанын элбэтии, өрөспүүбүлүкэ олоҕун толору сырдатыы, ону таһынан хампаанньа бэйэ оҥорон таһаарар бородууксуйатын элбэтии уонна тарҕатыы.
Түгэнинэн туһанан, хаһыат редакция­тын үлэһит­тэрин аатыттан хампаанньа кэлэктиибигэр интэриэ­һинэй үлэни, бэриниилээх көрөөччүлэри, саҥа, айар саҕалаа­һыннаргытыгар ситиһиилэри баҕарабыт!

Хаартыскалар СИА сайтыттан туһанылыннылар.