Сахалар ааттарыттан

 Олимпийскай чемпиону, аан дойду үс төгүллээх чемпионун эҕэрдэлии Саха Өрөспүүбүлүкэтин Ил Түмэнин Бэрэссэдээтэлэ Александр Жирков, Саха Өрөспүүбүлүкэтин Бырабыыталыстыбатын Бэрэссэдээтэлин солбуйааччы Михаил Гуляев, Павел Пинигин тренерэ, Украина уонна ССРС үтүөлээх тренерэ Георгий Бураков, Ил Түмэн сис кэмитиэттэрин бэрэссэдээтэллэрэ Александр Уаров, Юрий Баишев, Алексей Еремеев, Дмитрий Саввин, Елена Голомарева, Ил Түмэн депутаттара Иван Макаров, Алексей Филиппов, Константин Борисов, Саха Өрөспүүбүлүкэтин спордун миниистирэ Георгий Балакшин, Саха Өрөспүүбүлүкэтин тустууга федерациятын президенэ, Ил Түмэн депутата Семен Березин, Чурапчы улууһун баһылыга Андрей Ноговицын, улуус депутаттарын Сэбиэтин бэрэссэдээтэлэ Яков Оконешников, 1976 сыллаахха Монреальга ыытыллыбыт олимпийскай оонньуу үрүҥ көмүс мэтээлин хаһаайына, ССРС спордун үтүөлээх маастара Александр Иванов, “Үтүө санаа оонньууларын” кыайыылааҕа, ССРС спордун үтүөлээх маастара Василий Гоголев, Саха Өрөспүүбүлүкэтин Бырабыыталыстыбатын чилиэннэрэ, Уус Алдан, Мэҥэ Хаҥалас, Усуйаана, Таатта, Амма, Сунтаар, Анаабыр улуустарын баһылыктара, Павел Пинигин биир дойдулаахтара, доҕотторо, Саха Өрөспүүбүлүкэтин спордун бэтэрээннэрэ уонна спорду таптааччылар кэллилэр.

“Хайа баҕарар омук атын омугу кытта алтыһарыгар бэйэтэ күөн туттардаах, утары уунардаах, уратылаах. Биһиги, сахалар, киэн туттуубут, уратыбыт – биһиги төрөөбүт дойдубут киэҥэ-куоҥа, Өлүөнэ, Бүлүү, Алдан, Халыма, Индигир, Дьааҥы, Өлөөн, Анаабыр курдук улахан өрүстэрбит, сис хайаларбыт, аар тайҕабыт, айылҕабыт. Саха олоҥхотун 2005 сыллаахха ЮНЕСКО киһи аймах бастыҥ уус-уран айымньытынан билиммитэ. Саха хомуһа космос куйаарыгар тахсан дьүрүһүйбүтэ, саха оһуохайа үгүс киһини бииргэ түмэ тардар кыахтааҕынан бүтүн аан дойдуга биһирэннэ”, – диэтэ Ил Түмэн спикерэ Александр Жирков.

“Алексей Елисеевич Кулаковскай – Өксөкүлээх Өлөксөй нэһилиэстибэтэ аан дойду таһымыгар тахсыбыта, учуонайдар Георгий Прокопьевич Башарин, Авксентий Егорович Мординов, Владимир Петрович Ларионов аан дойду наукатын эйгэтигэр билиниини ылбыттара. Василий Васильевич Никифоров – Күлүмнүүр XIX-XX үйэлэр икки ардыларыгар либеральнай-демократическай өй-санаа сайдыытыгар аан бастаан, урутаан испит көрүүлээх киһи быһыытынан бүтүн Россия үрдүнэн биллэр. Максим Кирович Аммосов билигин атын государство буолан олорор Киргизияҕа тиийэн государственноһы олохтообута уонна онно бастакы салайааччынан үлэлээбитэ. Кини аата кыргыз норуотугар күн бүгүҥҥэ диэри ытыктабыллаахтык ааттанар”, — диэн эттэ Ил Түмэн спикерэ.

Александр Жирков: “Аҕыйах сыл ааһыаҕа, аан дойду бастыҥ түһүлгэлэригэр, Олимпиада пьедесталларыгар биһиги бөҕөстөрбүт тахсыахтара”, – диэн 1960-с сыллардаахха Саха сиригэр көҥүл тустууну төрүттээччи Николай Николаевич Тарскай эппитэ. Кини ити хорсун билгэлээһинин саха спортсменнара чиэстээхтик толорбуттара. Биһигиннээҕэр хас эмэ уонунан төгүл элбэх ахсааннаах омуктар Олимпиадаҕа кыттыбат даҕаны кэмнэригэр биһиги бөҕөстөрбүт Роман Дмитриев, Павел Пинигин, Александр Иванов саха бөҕөстөрүн таһыма бу баар диэн аан дойдуга көрдөрбүттэрэ”, – диэн бэлиэтээтэ.

Ил Түмэн спикерэ: “Биһиги бастакы олимпиецтарбыт ааттара норуоту бөҕөхсүтэр, ыччат санаатын кынаттыыр, кинилэргэ үрдүк холобур буолан сөхтөрө, ыҥыра, суол тэлэ туруоҕа”, – диэн бэйэтин эҕэрдэ тылын түмүктээтэ. Александр Жирков олимпийскай чемпиоҥҥа, Ил Түмэн депутатыгар Павел Пинигиҥҥэ истиҥ баҕа санааларын тириэртэ.

Маны таһынан Ил Түмэн Бэрэссэдээтэлэ Павел Пинигин тренерэ, Украина уонна ССРС үтүөлээх тренерэ Георгий Бураков Чурапчыга кэлбитин чорботон бэлиэтээтэ. “Георгий Анатольевич саха бөҕөстөрө үрдүкү пьедесталга тахсалларыгар биир сүрүн тулааһын, көмө буолбут киһи, кини бүгүн Украинаттан анаан-минээн иитиллээччитэ Павел Пинигины чиэстиир тэрээһиҥҥэ кыттаары уонна аан дойду, Олимпиада таһымыгар саха бөҕөстөрүн таһаарбыт Дмитрий Петрович Коркиҥҥа ытыктабылын биллэрээри кэллэ”, – диэн туран Георгий Бураковка Саха Өрөспүүбүлүкэтин Ил Түмэнин Бэрэссэдээтэлин Махтал суругун туттарда.