Спикер сэрии бэтэрээннэригэр махталы биллэрдэ

Александр Жирков бастаан Роман Романович Охлопковка тиийэ сырытта. Роман Романович аармыйаҕа 1943 сылга ыҥырыллан, Монголияҕа 846-с штурмовой авиаполкаҕа радио маастарынан сулууспалаабыта, Япония милитаристарын утары бойобуой дьайыыларга кыттыбыта. Кини Аҕа дойду сэриитин II истиэпэннээх уордьанынан, “Японияны кыайыы иһин”, “Шанхайы көмүскээһин иһин”, «1941-1945 сс. үлэҕэ килбиэнин иһин» мэтээллэринэн наҕараадаламмыта. 1950 сыллаахха аармыйаттан старшай лейтенант званиелаах төннүбүтэ. Роман Охлопков өрөспүүбүлүкэ сибээһин сайдыытыгар олоҕун анаабыта, Дьокуускайдааҕы радио киинигэр старшай инженеринэн, 1960-1997 сс. Сибээс министиэристибэтигэр араас дуоһунастарга үлэлээбитэ.
Бэтэрээн 93 саастаах, ону аахсыбакка, уокурук, куорат уопсастыбаннай олоҕор актыыбынайдык кыттар. Александр Жирков киниэхэ уһун сылларга чэгиэн доруобуйаны, этэҥҥэ сылдьарыгар баҕарда.
Салгыы ыалдьыттар Николай Петрович Олесовка тиийдилэр. Ис дьыала уорганнарын бэтэрээнэ – Япония милитаристарын утары сэрии кыттыылааҕа кинилэри толору таҥнан-симэнэн, мэтээллэрин иилинэн көрүстэ.
Николай Петрович Олесов – астаапкаҕа тахсыбыт милиция полковнига. 1945-1951 сс. Кыһыл Аармыйа артиллериятын сэриилэригэр сулууспалаабыта, онтон салгыы 1952-1980 сс. ис дьыала уорганнарыгар милиция учаастактааҕы боломуочунайын дуоһунаһыттан Саха сирин ИДьМ холуобунай ирдэбилгэ начальнигын солбуйааччыга диэри үүммүтэ. Кини «Японияны кыайыы иһин», «Аҕа дойду Улуу сэриитигэр килбиэннээх үлэтин иһин», «Эҥкилэ суох сулууспа иһин» мэтээллэрдээх, Аҕа дойду сэриитин II истиэпэннээх уордьанын кавалера. Милиция туйгуна.
Александр Николаевич бэтэрээн дьиэ кэргэнин Улуу Кыайыы күнүнэн истиҥник эҕэрдэлээтэ, кинилэргэ кытаанах доруобуйаны, уһун үйэни баҕарда.
Ыам ыйын 9 к. Николай Пет­рович хос сиэнэ Семен Семенов Москваҕа Кыһыл болуоссакка буолбут парадка Кантемировскай тааҥка дивизиятын састаабыгар кытынна.
Ил Түмэн спикерэ Николай Петрович Олесовка уонна Роман Романович Охлопковка кинилэр Улуу Кыайыыга, сэрии кэннинээҕи олоҕу чөлүгэр түһэриигэ, кэскилгэ тус кылааттарын иһин махтанарын биллэрдэ.
Бэтэрээннэр Ил Түмэн спикеригэр болҕомтотун иһин махтаннылар уонна өрөспүүбүлүкэ уйгутун туһугар таһаарыылаах үлэни баҕардылар.