Судаарыстыбаннаһы төрүттээбит саха норуотун уһулуччулаах уолаттарыгар сүгүрүйэн

Саха сирин бар дьонун депутаттара муус устар 27 к. өрөспүүбүлүкэ судаарыстыбаннаһын төрүттээбит уһулуччулаах политическай диэйэтэллэр пааматынньыктарыгар сибэккини ууруу сиэригэр-туомугар кытыннылар.

Ил Түмэн Бэрэссэдээтэлэ Петр Гоголев, судаарыс­тыбаннай тутууга уонна сокуону оҥорууга сис кэмитиэт бэрэссэдээтэлэ Алексей Еремеев, наукаҕа, үөрэххэ, култуураҕа, сонуну киэҥник тарҕатар ситимнэргэ уонна уопсастыбаннай тэрилтэлэр дьыалаларыгар сис кэмитиэт бэрэссэдээтэлэ Феодосия Габышева, норуот депутаттара Иван Слепцов, Сулустаана Мыраан уонна да атыттар Максим Аммосов пааматынньыгарбуолбут миитиҥҥэ кыттыыны ыллылар.

Парламент бастакы вице-спикерэ Александр Жирков, олохтоох салайыныы боппуруостарыгар сис кэмитиэт бэрэссэдээтэлэ Василий Местников, предпринимательствоҕа, туризмҥа уонна инфраструктура сайдыытыгар сис кэмитиэт бэрэссэдээтэлэ Игорь Григорьев, норуот депутаттара Владимир Богданов, Олег Пискунов, Софрон Афанасьев Василий Никифоров – Күлүмнүүр пааматынньыгар сибэкки уурдулар.
Судаарыстыбаннай Мунньах бэрэссэдээтэлин солбуйааччы Антонина Григорьева, тутууга, ДьУоКХ уонна энергетикаҕа сис кэмитиэт бэрэссэдээтэлэ Яков Ефимов, норуот депутаттара Сергей Никонов уонна Родион Зорин Өксөкүлээх Өлөксөй пааматынньын аттыгар бэлиэ тэрээһиҥҥэ кытыннылар.

Орджоникидзе болуоссатыгар Былатыан Ойуунускай пааматынньыгар сибэккини Хонтуруоллуур кэмитиэт бэрэссэдээтэлэ Евгений Перфильев, мандаат уонна регламент хамыыһыйатын бэрэссэдээтэлэ Андрей Николаев, норуот депутаттара Виктор Лебедев, Павел Ксенофонтов, Любовь Явловская уурдулар.
Бу күн иннинэ парламентарий Павел Ксенофонтов Дьокуускай куорат 20 №-дээх оскуолатын 6 кылааһын оҕолоругар гражданственность уонна патриотизм уруогун ыытта. «Хас биирдии патриот иэһэ — ааспыт суолталаах түгэннэри кэпсээһин, өрөспүүбүлүкэбит сайдыытыгар, дьылҕатыгар төрүт быһаарыылары ылбыт дьон туһунан иһитиннэрии», — диир депутат. Кини оскуола оҕолоругар Семен Борисов уонна Александр Габышев, өрөспүүбүлүкэҕэ бырамыысыланнас сайдыытын кэрдиис кэмнэрин уонна онно олохтоох дьон кыттыытын туһунан кэпсээтэ.
Судаарыстыбаннай Мунньах вице-спикерэ Виктор Губарев, норуот депутаттара Евгений Кожухов, Роза Солнышкина Эргэ куоракка баар Максим Аммосов бюһун аттыгар уһулуччулаах киһи кэриэһин ытыктаан турдулар.

Исидор Барахов пааматынньыгар дьиэ кэргэн уонна оҕо аймах дьыалаларыгар сис кэмитиэт бэрэссэдээтэлэ Алена Атласова, бюджекка, үпкэ, нолуок уонна сыана политикатыгар, бас билии уонна приватизация боппуруостарыгар сис кэмитиэт бэрэссэдээтэлэ Юрий Николаев уонна парламентарий Мичил Николаев сибэккилэри уурууга кытыннылар.
Сэбиэскэй дойдуга кыһыл көмүһү хостуур бы­рамыысыланнас уонна ыарахан индустрия үөскээһинин төрүтүгэр турбут Степан Васильевы ытыктаан, Өрөспүүбүлүкэ Күнүгэр сир сыһыаннаһыыларыгар, айылҕа ресурсаларыгар уонна экологияҕа сис кэмитиэт бэрэссэдээтэлэ Владимир Прокопьев, депутат Валерий Лютый кэриэстээн аастылар.
Саха сиригэр Сэбиэскэй былаас олохтонуутун кыттыылааҕа, автономнай Саха сирин төрүттэспит дьонтон биирдэстэрэ, Саха АССР народнай комиссардарын Сэбиэтин бэрэссэдээтэлэ Степан Аржаков өйдөбүнньүк дуоскатын аттыгар миитиҥҥэ аграрнай политикаҕа уонна тыа сиригэр сис кэмитиэт бэрэссэдээтэлэ Андрей Находкин, норуот депутата Нюргуяна Захарова кыттыыны ыллылар.