580
08 февраля 2019 в 11:47
Томторго сөмөлүөтүнэн айанныыр кыах көстүөҕэ
Соторутааҕыта “Полярные авиалинии” хампаанньа Өймөкөөн оройуонун салалтатын кытта көрсүһүүтүгэр Томтор сэлиэнньэтигэр туристары тиэйиигэ коммерческай рейстэри тэрийии боппуруоһа көтөҕүлүннэ. Ону сэргэ оройуон киинигэр – Уус-Ньараҕа “полярниктар” кассаларын аһыы туһунан кэпсэтии таҕыста. Ити туһунан тиэйээччи хампаанньа пресс-сулууспатыгар иһитиннэрдилэр.
Авиахампаанньа генеральнай директора Семен Винокуров маннык тиэйиилэри номнуо кулун тутартан саҕалыырга бэлэмнэрин иһитиннэрдэ. «Туристар уонна оройуон дьаһалтатын өттүлэриттэн улахан интэриэс баарын учуоттаан, биһиги Томторго коммерческай тиэйиилэри Л-410 салгын аалынан номнуо кулун тутартан саҕалыырга бэлэммит, — диэн бэлиэтээтэ кини. – Ити боппуруоһу ымпыктаан-чымпыктаан дьүүллэһэр итиэннэ экономическай өттүнэн толкуйдаан тарибы олохтуур наада».
Авиахампаанньаҕа бэлиэтээбиттэринэн, наадыйыы баар буоллаҕына, рейс нэдиэлэҕэ иккитэ толоруллуон сөп.
Өймөкөөн улууһун баһылыга Михаил Захаров эмиэ “Тымныы Полюһа” туристическай маршруту иһитиннэриигэ-биллэриигэ болҕомтону туһаайда. «Биһиги сыл устатыгар, бастатан туран, омук дойдуларын туристарын өттүттэн, наадыйыы баар буолуоҕун сабаҕалыыбыт. Быһа сибээс аһылыннаҕына, Өймөкөөн оройуонугар дьон сылдьыыта улаатыаҕа, үгүстэр итинник суоҕуттан аккаастаналлар, — диэтэ оройуон баһылыга. — Бу улахан соруктар, олору олоххо киллэриигэ авиахампаанньалар ыйааһыннаах оруолу ылыахтара».
Хас биирдии сезоҥҥа туспа бырагыраамалар оҥоһуллубуттар, билигин кыттыһан сөмөлүөт көтүүтүн расписаниетын оҥорон бигэргэтиэхтээхтэр.
Түмүккэ “Полярные авиалинии” агентство авиакассатын оройуон киинигэр – Уус-Ньараҕа аһар кыах дьүүллэһилиннэ.
