Олохтоохтор туруорсуулара — болҕомтоҕо

Суоттуга

Тиһэх чуораан чугдаарар тэрээһинэ оскуола оҕолоругар, учууталларга, төрөппүттэргэ олус долгутуулаах, улахан суолталаах. Кинилэртэн ордук бу күҥҥэ оскуола үөрэҕин түмүктээн, олох киэҥ аартыгар үктэнэр оҕолор долгуйаллар. Тоҕо диэтэр, кинилэр 11 сылы быһа бииргэ үөрэммит доҕотторун, уһуйбут учууталларын, үөрэммит оскуолаларын кытта арахсар бэлиэ күннэрэ.
Бу үөрүүлээх тэрээһиҥҥэ Суот­ту орто оскуолатыгар Ил Түмэн Бэрэссэдээтэлэ Александр Жирков, Саха Өрөспүү­бүлүкэтин үөрэҕин уонна наукатын миниистирэ Владимир Егоров, Уус Алдан улууһун баһылыгын солбуйааччы Михаил Борисов уонна улуустааҕы үөрэх управлениетын салайааччыта Ирина Тарская буолан ыалдьыттаатылар.

Оскуоланы бүтэрии, бу киһи олоҕор олус улахан суолталаах түгэн диэн Александр Жирков бэлиэтээтэ уонна бүгүҥҥү выпускниктар олох суолунан оҥорор хас биирдии хардыылара барыта ситиһиилээх, сөптөөх буоллун диэн алгыс тылын анаата. Ил Түмэн спикерэ хас биирдии оскуола аартыгын атыллаан тахсаары, олох суолугар хардыылаары турар оҕо ханна да тиийдэр, тугу даҕаны үлэлээтэр, хайдах да олордор оскуолатын, биир дойдулаахтарын, төрөппүттэрин иннигэр эппиэтинэстээҕин умнуо суохтаах уонна кинилэр эрэллэрин хаһан даҕаны түһэн биэриэ суохтаах диэн бэлиэтээтэ. Александр Николаевич Ил Түмэҥҥэ үлэлии кэлиэҕиттэн төрөөбүт улууһун хас да оскуолатыгар бэйэтин выпускниктарга аналлаах стипендиятын олохтообута. Бу үөрүүлээх түгэҥҥэ спикер стипендияны Суотту орто оскуолатын 11 кылааһын үөрэнээччитэ Арина Алексееваҕа туттарда.

Хоноҕорго

Салгыы спикер уонна миниистир Владимир Егоров, улуус баһылыгын солбуйааччы Михаил Борисов, үөрэх управлениетын салайааччы Ирина Тарская буолан Уус Алдан техникумугар сырыттылар, техникум эбийиэктэрин көрдүлэр, педколлективы кытта көрүстүлэр.
Дириэктэр Андрей Стре­каловскай техникумҥа 162 устудьуон тутуу мааста­ра, повар-кондитер, тыа хаһаайыс­тыбатын бородууксуйатын технолога, механизатор, ыксаллаах быһыы-майгы үлэһитэ идэлэргэ үөрэнэллэрин туһунан кэпсээтэ. Үөрэнэр оҕолор уопсай ахсааннарыттан аҥардара Уус Алдан оҕолоро. Выпускниктар үлэ булууларын таһыма билигин 64% тиийэн турар. Техникум уопсайа 51 үлэһиттээх, олортон 26-та преподаватель.

Мунньах кыттыылаахтара техникум эбийиэктэрэ эргэрбиттэрин бэлиэтээтилэр, техникум бэйэтин күүһүнэн оҥорон таһаарбыт оҥоһуктарын батарарга уустуктар баалларын туһунан кэпсээтилэр.
Дьон санаатын истэн Алек­­сандр Жирков бу курдук үллэһиннэ: «Улуустарынан үлэлиир үгүс орто анал үөрэх тэрилтэлэрин үөрэтэр хайысхалара улахан тэрилтэлэргэ ирдэнэр исписээлнэстэргэ сөп түбэспэт буолан, биһиги оҕолорбут кыайан республика тутаах тэрилтэлэригэр үлэлиир кыахтара суох. Онон саҥа хайысхалары көрдөөн, үөрэххитин сайыннаран республика экономикатыгар тоҕоостоох кадрдары иитиигэ үлэлэһиҥ».

Арыы Тииккэ

Ити кэннэ, Александр Николаевич Бороҕон нэһилиэгин Арыы Тиит бөһүөлэгин олохтоохторун кытта көрүстэ. Нэһилиэк баһылыга Василий Алексеев этэринэн, бөһүөлэккэ 152 киһи олорор, бөһүөлэк таһыгар 47 үлэһиттээх нефтебаза үлэлиир. Маны таһынан Василий Петрович: “Оскуолабытыгар 7 үөрэнээччилээхпит, оҕо саадыгар 10 иитиллээччилээхпит, олортон биирдэстэрэ бу күһүн оскуолаҕа киирэр”, — диэн сырдатта. Оскуола саалатыгар мустубут нэһилиэк олохтоохторо Александр Жирков 2013 сыллаахха бөһүөлэги бүтүннүү уу былдьаан, ыаллар сир-халлаан икки ардыгар олордохторуна улахан көмөнү оҥорбута хаһан даҕаны умнуллубатын бэлиэтээтилэр уонна Ил Түмэҥҥэ, улуус дьаһалтатыгар куруук тумнубакка, умнубакка өйдүү, өйүү сылдьалларыгар улахан махталларын биллэрдилэр. Онтон, тирээн турар кыһалҕалары ырытыһыыга киирэн, олохтоохтор бөһүөлэккэ сынньанар, аралдьыйар миэстэ — култуура киинэ, спортзал суоҕун бэлиэтээтилэр. Маны таһынан саас ахсын уу кэлиитигэр ууга барар кутталлаахтар, онтон быыһанарга биэрэккэ дамба туттарар баҕаларын үллэһиннилэр.

Саһылыкааҥҥа

Онтон спикер Суотту нэһилиэгин баһылыга Василий Иванову кытта Саһылыкааҥҥа тиийэн олохтоохтору кытта көрүстэ. Олохтоохтор бөһүө­лэккэ сибээс суоҕун, уот ситимэ эргэрэн, туһаттан тахсара чугаһаабытын туһунан кэпсээтилэр.

Дэриэбинэҕэ олорор киһи ахсаана аҕыйах буолан, суотабай сибээс тэрилтэлэрэ манна вышка туруоралларыгар табыгаһа суох буолан суотабай телефон сибээһэ суох эбит. Маннык балаһыанньаны кытта билсэн баран, спикер Александр Жирков нэһилиэк уонна улуус салалталарыгар социальнай эбийиэктэри өрөмүөннээһини, сибээс киллэрээһини, уот ситимин оҥорооһуну быһаарарга үлэлээҥ диэн сүбэлээтэ. Итиэннэ, хаарбах туруктаах оскуоланы, оҕо саадын уонна кулуубу көрөн, соһуйан, түргэн соҕустук өрөмүөн үлэтин ыытар тоҕоостооҕун өссө төгүл чопчулаата.

Иван НИКИТИН.