Бурдуктаах Аммаҕа аны дьаабылыка үүнэр

Галина Пилипейнина Покровка олохтоохторун өссө да үөрдэ турар ыралаах

Ким көрдүүр, ол булар

Биһиги томороон тымныылаах, ирбэт тоҥноох сирбитигэр дьаабылыка хайдах ситиэй, үүнүөй диэн киһи сапсыйан эрэ кэбиһиэн сөп. Онтон билэр дьоммуттан сураһан, бу кэпсээн дьиҥ чахчытын билбитим. Дьэ, үүнэр эбит, буолаары буолан, итии дойдулар отоннорунааҕар итэҕэһэ суох бөдөҥ уонна мип-минньигэс амтаннаах.
Дьаабылыка үүннэрээччи кимин элбэх киһиттэн сураспытым. Үгүстэр Аммаҕа дьаабылыка үүннэрэллэрин билэллэр эрээри, чопчу кимнээх итинэн дьарыктаналларын билбэттэрэ. Ким көрдүүр, ол булар. Ол Амма улууһун Покровка бөһүөлэгин олохтооҕо Галина Пилипейнина дьаабылыка үүннэрэр эбит.

Сытыы-хотуу кыысчаан трактористаабыта

Галина киинэ түспүт сирэ — Амма. Орто оскуоланы эмиэ манна үөрэнэн бүтэрбитэ. Амарах аҕата Смоленскайтан, иһирэх ийэтэ Пермь куораттан төрүттээхтэр.
Сытыы-хотуу, хара үлэттэн иҥнэн-толлон турбат кыысчаан оскуола кэнниттэн Алтаннааҕы СПТУ-га тракторист идэтигэр үөрэнэ киирбитэ. Икки сыл устата талбыт идэтинэн үлэлээбитэ. Уйаара-кэйээрэ көстүбэт Амма киэҥ бааһыналарын тиэрдэрбитэ.
Ол кэнниттэн Галина Альбертовна Дьокуускайдааҕы салайар кадрдары бэлэмниир техникумҥа үөрэнэ киирбитэ. Манна үөрэнэн, агроном идэтин баһылаабыта. 1981 сыллаахха төрөөбүт-үөскээбит Покровкатыгар төннөн кэлэн, агрономунан үлэлээбитэ. Аммаҕа бурдугу үүннэриинэн дьарыктаммыта. Улуус кылаабынай агрономугар тиийэ үүммүтэ.
Билиигэ-көрүүгэ тар­дыһыылаах Галина үөрэҕин үрдэтинээри Дьокуускайдааҕы тыа хаһаайыстыбатын академиятыгар кэтэхтэн үөрэнэ киирбитэ. Үрдүк үөрэх кыһатын үөрэнэн бүтэрэн баран, оскуолаҕа үлэлии кэлбитэ.

Сайынын Галина тэлгэһэтэ, этэргэ дылы, Крым ыалларын тиэргэннэриттэн итэҕэһэ суох кэрэ буоларын үгүстэр бэлиэтии көрөллөр. Сатабыллаах хаһаайка тиэргэнигэр, үөһэ этэн аһарбытым курдук, соҕуруу дойду отоно дьаабылыка, оннооҕор вишня, рябина, арбуз, дыня, малина, клубника, моонньоҕон, хаптаҕас силигилии үүнэллэр.

Крым ыалын тиэргэниттэн итэҕэһэ суох

Сайынын Галина Альбертовна тэлгэһэтэ, этэргэ дылы, Крым ыалларын тиэргэннэриттэн итэҕэһэ суох кэрэ буоларын үгүстэр бэлиэтии көрөллөр. Сатабыллаах хаһаайка тиэргэнигэр, үөһэ этэн аһарбытым курдук, соҕуруу дойду отоно дьаабылыка, оннооҕор вишня, рябина, арбуз, дыня, малина, клубника, моонньоҕон, хаптаҕас силигилии үүнэллэр. Хаппыыста, оҕурсу, помидор туһунан этэ да барыллыбат.
Билигин Интернет сайдыбыт үйэтигэр киһи барыта хаартыскаҕа түһүүнэн дьарыктанар буолбутун ким мэлдьэһиэй? Аммалар Галина тэлгэһэтигэр кэлэннэр, хаартыскаҕа түһэн бараллар. Көрүөхтэн эриэккэс, сиэдэрэй көстүүнү көрөннөр оҕолуу үөрэллэр.
Оскуола үөрэнээччилэрэ кэлэн, эмиэ интэриэһиргээн көрөллөр-истэллэр. «Шаг в будущее» өрөспүүбүлүкэтээҕи куонкуруска кытталларыгар, Галина уопутун туһаналлар, кэтээн көрөллөр.

2009 сыллаахха Галинаҕа эмискэ дьаабылыка олордон боруобалаан көрбүт киһи диэн санаа төбөтүгэр көтөн түспүтэ. “Свердловка” диэн суорт сиэмэтин булан олордубута. Күммүт-дьылбыт уратыта мэһэйдээн, кэтэспит курдук, үүнүү түргэнник кэлбэтэҕэ. Тулуура суох киһи кэтэһэ сатаан баран, этэргэ дылы, туура тардан ылан, киэр элитиэх этэ.

Үүнүү — 3 сыл кэнниттэн эрэ

2009 сыллаахха Галина Альбертовнаҕа эмискэ дьаабылыка олордон, боруобалаан көрбүт киһи диэн санаа төбөтүгэр көтөн түспүтэ. “Свердловка” диэн суорт сиэмэтин булан олордубута. Күммүт-дьылбыт уратыта мэһэйдээн, кэтэспит курдук, үүнүү түргэнник кэлбэтэҕэ. Тулуура суох киһи кэтэһэ сатаан баран, этэргэ дылы, туура тардан ылан, киэр элитиэх этэ.
Оттон талан ылбыт идэтин ис сүрэҕиттэн сөбүлүүр Галина яблонятын кытта бодьуустаһарын, көрөрүн-харайарын тохтоппотоҕо. Үс сыл кэнниттэн эрэ күүтүүлээх-кэтэһиилээх бастакы үүнүүтүн хомуйбута. Дьаабылыкатын ыйааһына 2 кг 800 гр тэҥнэспитэ. Үлэтин түмүгэ көстүбүтүттэн Галина үөрүүтэ муҥура суоҕа. Нөҥүө сылыгар итинтэн арыый кыра үүнүүнү хомуйбута.
2017 сылга Галина дьаабылыката өлгөмнүк үүммүтэ. Ол курдук, аҕыс киилэ курдук үүнүүнү хомуйбута. Ааспыт сайын үүнүү уон киилэҕэ тэҥнэспитэ.
Билигин Галина Альбертовна «Бухатыыр» диэн дьаабылыка суордун Новосибирскайтан атыылаһан, иккис суордун үүннэрэр. Билиҥҥитэ бу суорт отонун биэрэ илик. Галина санаатын түһэрбэт, эрэнэ кэтэһэр. Кыһыннары-сайыннары яблоняларын кыһыл оҕолуу бүөбэйдиир, көрөр-истэр.
Маны таһынан Галина кэтэх хаһаайыстыбатыгар сибиинньэ, куурусса тутар. Кини былаана киэҥ. Галина Альбертовна саҥаттан саҥа үүнээйилэри үүннэрэн, Покровка олохтоохторун өссө да үөрдэ, санааларын көтөҕө турар ыра санаалаах.