От ыйын 1 күнүттэн сыана үрдүүр

СИА иһитиннэрбитинэн, быйыл от ыйын 1 күнүттэн Саха сирин олохтоохторугар олорор дьиэлэрин төлөбүрэ эмиэ үрдүүр. Өрөспүүбүлүкэ сыана политикатыгар Судаарыстыбаннай кэмитиэтин бэрэссэдээтэлэ Антонина Винокурова эрэннэрбитинэн, түмүгэр үрдээһин 4,8% аһарыа суоҕа.

Өрөспүүбүлүкэ үрдүнэн «ком­муналкаҕа» үүнүү тэтимэ ортотунан 2,4% тэҥнэһиэҕэ, оттон биирдиилээн туспа дьиэҕэ төлөбүр үүнүүтүн муҥутуур индексэ — 4,8%. Винокурова этэринэн, маныаха араастаһыы биллэ улахана хас биирдии дьиэ хаһаайыстыбатыгар хааччыллыы көрүҥүттэн уонна коммунальнай өҥөлөр набордарыттан тутулуктаах. Туһааннааҕынан хас биирдии өҥө көрүҥэр тарифтар араастар.
«Өрөспүүбүлүкэ үрдүнэн биир тарифтар электро­энергияҕа, гаас­ка, киин уонна уотунан ититиигэ, сылаас ууга уонна ууну түһэриигэ олохтоноллор. Оттон тымныы ууга, убатыллыбыт гааска уонна кытаанах оттукка сыаналар өҥөнү оҥорооччуттан тутулуктаналлар», — диэн кэпсээтэ бэрэссэдээтэл.
Тохсунньу 1 күнүттэн бигэргэтиллибит кытаанах коммунальнай тобохторго тарифтар эрэ 2020 сыл от ыйын 1 к. диэри уларыйыахтара суоҕа.
Дьокуускайга тарифтар ордук биллэрдик тымныы уунан хааччыллыыга уларыйыахтара — кинилэр ортотунан 8,5% улаатыахтара, итиэннэ уотунан сылытыыга – 5,2%. Тымныы ууга тарифтар үүнүүлэрин «Водоканал» АУо тариф таһыма намыһаҕынан быһаарар, мантан инньэ ол 57,07 солк./м³ буолуоҕа.
“Коммунальнай өҥөлөр иһин төлөбүрдэр истэригэр тымныы уунан хааччыйыы ылар өлүүтэ 12% эрэ бырыһыан, оттон ититиигэ ороскуоттар квартплата аҥаарын кэриҥин ылаллар. Счетчиктар баар буоллахтарына, дьиэ кэргэн төлөбүрэ ааҕыллар нормативнай кээмэйтэн туһаныллар уу кээмэйэ хас да төгүл намыһаҕын учуоттааҥ”, — диэтэ Винокурова.
Коммунальнай өҥөлөр атын көрүҥнэригэр тарифтар өрөс­пүүбүлүкэ үрдүнэн ортотунан маннык улаатыахтара:

◆ Ититии — 0,8%
◆ Сылаас уунан хааччыйыы — 0,8%;
◆ Ууну түһэрии — 2,2%;
◆ Кытаанах оттук — 3,1%;
◆ Электроэнергия — 3,1%;
◆ Гааһынан ититии — 2,3%.

Холобур, 3 киһиттэн турар, Дьокуус­кайга 63 кв. м иэннээх толору хааччыллыылаах, гаастаммыт квартираҕа олорор дьиэ кэргэн квартира иһин төлөбүрэ ыйга 207 солк. улаатыаҕа, эбэтэр 2,4%.
Сыана судаарыстыбаннай кэмитиэтигэр нэһилиэнньэҕэ аадырыстаах көмө дьаһалларын туһунан санаттылар. Саха сиригэр ДьУоКХ өҥөлөрүн иһин биир да дьиэ кэргэн уопсай дохуотуттан 15% элбэҕи төлүө суохтаах, оттон Россия стандартынан ити таһым 22% тэҥ. Ону таһынан, соҕотоҕун уонна туспа олорор үлэлээбэт пенсионердар уонна элбэх оҕолоох дьиэ кэргэттэр ДьУоКХ иһин 0-тан 15% диэри “уста сылдьар” шкаланан төлүүр кыахтаахтар. Субсидиялары ааҕыы биирдиилээн дьоҥҥо Субсидия агентствотын салааларыгар уонна “Мои документы” МФЦ оҥоһуллар.
Кэмитиэт салайааччыта ааҕа­рынан, Саха сиригэр дотация үрдүгүн суотугар тарифтар үстэн бииригэр эрэ диэри толуйуллаллар. Соҕотох ититиигэ ороскуот сорох өттө субсидиялартан толуйуллар – ол 17 млрд солк. кэриҥэ.
Өрөспүүбүлүкэҕэ олорор дьиэ иһин төлөбүр Уһук Илиҥҥэ саамай намыһахтартан биирдэстэрэ. Приморьеҕа эрэ Саха сирин олохтоохторуттан кыраны төлүүллэр.