Дмитрий Медведев алтыс дакылаата

Санкциялар

Бырабыыталыстыба Бэрэссэдээтэлэ Дмитрий Медведев ааҕарынан, дойду АХШ-рын саҥа санкцияларын ыгыытыгар бэриммэккэ, олору бэйэ экономикатын туһатыгар уларытыаҕа. Кини Россия Федерацията 6 сыл устатыгар, атын дойдулар санкцията да суох уонунан сыллары ыытар суолларын ааспытын бэлиэтээтэ.

Бырабыыталыстыба баһы­лыга эппитинэн, АХШ санкцияларыгар Россия харда дьаһаллара дойдуга хоромньуну аҕалыа суохтаахтар.

Президент  ыам ыйынааҕы ыйаахтарын  туһунан

Ыам ыйынааҕы ыйаахтарга быһаарыллыбытын курдук, бюджет үлэһиттэрин хамнаһын экономикаҕа орто баайыылаах регионнар таһымнарыгар тиэрдэр кыа­лынна, диэн бэлиэтээтэ Медведев. 2018 сылга бюджет үлэһиттэрин хамнаһын үрдэтиигэ эбии 136 млрд солк. аһарар үп ананыаҕа.

Ыам ыйын 7 к. президент инау­гурациятын кэнниттэн саҥа бырабыыталыстыба киэҥ далааһыннаах бырайыактары салгыаҕа.

Экономика сайдыыта

Медведев ааҕарынан, Россия экономиката кэнники сылларга араас тургутууну (стресс-тест) дьоһуннук туораата итиэннэ аныгы кэм ирдэбиллэригэр хардарарга бэлэмнэнэр. Кризиһи утары чопчу дьаһалларынан балаһыанньаны туруктаах оҥорор, ону ааһан оҥорон таһаарар салаалары уонна үп систематын саҥа усулуобуйаларга сөп түбэһиннэрэр, дьону, ордук кыһалҕалаах сирдэри, салаалары, тэрилтэлэри өйүүр кыалынна.

Дойдуга аграрнай держава статуһа төннөрүлүннэ, оттон бырамыысыланнас бородуук­суйатыгар билигин “Россияҕа оҥоһулунна” диэн үгүстүк суруллар.

Тутаах салаалар 6 сыл уста­тыгар уонунан бырыһыан үүнүүлээхтэр. Чуолаан, оборона бырамыысыланнаһын  комплексыгар экспорга сакаастар түһэрсиллибит сөбүлэһиилэрин суумата оннооҕор санкциялар усулуобуйаларыгар 45 млрд доллартан аллараа түспэт, оттон металлургия салаата бэйэтин фондаларын саҥардара уонна саҥа бородууксуйаны оҥорууну баһылыыра кыалынна.

Билигин уһун болдьох­тоох соруктартан биирдэстэринэн таһыттан киирэр бырамыысыланнай бородууксуйаны Россия күрэстэһэр кыахтаах бородууксуйатынан солбуйуу буолар.

Медведев нолуок прогрессивнай шкалатын киллэриэх иннинэ, үтүө, мөлтөх өрүттэри ыараҥнатан көрөр наадатын бэлиэтээтэ.

Олох  таһыма уонна  демография политиката

Миниистирдэр кабинеттарын баһылыга дойдуга дьадайыы кыайтара илигин бэлиэтээтэ. Ол эрээри 2013 сылтан хамнас алын кээмэйэ 2 төгүл кэриҥэ үрдээбитин, оттон ыам ыйын 1 күнүттэн 11 163 солк. тэҥнэһиэҕин эттэ.

Кини оҕолорун 1,5 сааста­рыгар диэри көрөн декретнэй уоппускаҕа олорор дьахтал­ларга толуйуу хаттаан көрүллүөх­тээҕин ыйда.

Премьер-миниистир ааҕа­рынан, пенсияҕа тахсар сааһы үрдэтии боппуруоһун быһаарар уолдьаста, ол эрээри манна быһымахтык быһаарыллыа суохтаах.

Үөрэх

Нуучча тылыгар үөрэх стандартын Үөрэх уонна наука министиэристибэтэ оҥорор, ол аныгылыы, ити эрээри билиҥҥи үөрэнээччилэр бэлэмнэрин таһы­мын учуоттуур буолуохтаах.

Премьер-миниистир үөрэх цифровой көрүҥнэрэ бары та­һымҥа сайдыахтаахтарыгар бол­ҕомтону туһаайда.

Аармыйа  уонна космос

Алта сыл устатыгар РФ Сэбилэниилээх күүстэригэр 58 тыһ. единица араас система уонна комплекс хааччылынна, ол түмүгэр 800 байыаннай чаас уонна салаа саҥардылынна.

Медведев кэнники сылларга космоска көтүүлэри кытта сибээстээх проблемалары быһаарсар наадатын ыйда.

Туризм  уонна экология

Премьер-миниистир иһи­тин­нэрбитинэн, Россияҕа туризм 2017 сылга 56,5 мөл. айаны аһарда, авиация ис тиэйиилэрэ 2 төгүл улаатта, оттон салааҕа угуллубут хас биирдии солкуобай 5 солк. барыһы аҕалар.

Олорор дьиэ фондатыгар чааһынай гостиницалары тэрийиини бобор туһунан сокуон алтынньы 1 күнүттэн үлэлиэхтээх.

Медведев этэринэн, эколо­гияҕа хоромньуну суох оҥоруу туспа салаанан буолуохтаах, ол аныгы технологияларга уонна оборудованиеҕа наадыйыыны үөскэтиэҕэ.

Спорт  туһунан

Дмитрий Медведев Пхёнч­хаҥҥа буолбут Олимпиадаттан туоратыллыбыт Россия атлеттара бэйэлэрин бырааптарын спортивнай сууттарга туруорсуунан эрэ хааччахтамматтарыгар, омук дойдуларыгар уонна Россияҕа баар уопсай юрисдикция сууттарыгар ирдэбили эмиэ ыыталларыгар ыҥырда.

Медведев Россияҕа спортивнай тутуу ахсаана 10 сыл устатыгар хас эмэ төгүл улааппытын бэлиэтээтэ.