301
26 октября 2018 в 17:43
Идэлээх сойуус лидерин кытта көрсүһүү
Алтынньы 22 к. өрөспүүбүлүкэ Судаарыстыбаннай Мунньаҕын (Ил Түмэн) Бэрэссэдээтэлэ Петр Гоголев Саха сирин идэлээх сойуустарын Федерациятын бэрэссэдээтэлэ Николай Дегтяреву кытта көрсүһүүтэ буолла. Профсоюз лидерэ парламент спикерин үрдүк дуоһунаска талыллыбытынан эҕэрдэлээтэ итиэннэ өрөспүүбүлүкэ үлэлээн иитиллээччилэрин интэриэстэригэр парламены кытта салгыы таһаарыылаахтык бииргэ үлэлииргэ эрэлин биллэрдэ.
Көрсүһүү кэмигэр Николай Дегтярев өрүттэр хардарыта бииргэ үлэлээһиннэригэр тутаах суолтаны ылар боппуруостары иһитиннэрдэ. Чуолаан, профсоюз өрүтэ Судаарыстыбаннай Мунньах уонна идэлээх сойуустар Федерацияларын икки ардыларыгар бииргэ үлэлээһин туһунан 2016 сыл ахсынньы 2 к. түһэрсиллибит Сөбүлэһии толору олоххо киирэригэр, Ил Түмэн Экспердэрин сэбиэтин үлэтин сөргүтүүгэ уонна ол үлэҕэ идэлээх сойуустар Федерацияларын бэрэстэбиитэллэрин тардыыга интэриэстээх. Ону таһынан, Николай Дегтярев федеральнай сокуоннарга уларытыылары, эбиилэри киллэриигэ идэлээх сойуустар Федерацияларын сокуону оҥорууга көҕүлээһиннэрин хамсатыыга Петра Гоголевтан көмөнү көрдөстө. Салгыы өрүттэр бюджет эйгэтин үлэһиттэригэр социальнай мэктиэлэргэ итиэннэ өрөспүүбүлүкэҕэ санаторий-куруорт тэрилтэлэрин өйөөһүҥҥэ сыһыаннаах боппуруостары таарыйдылар. Профсоюз салайааччыта иһитиннэрбит биир боппуруоһунан өрөспүүбүлүкэҕэ үлэ дьоруойдуу ис хоһоонноох политикатын ыытыы буолла. Николай Дегтярев бу туһаайыыга соруктары олоххо киллэриигэ Судаарыстыбаннай Мунньах туора туран хаалбатыгар эрэнэрин биллэрдэ.
Ил Түмэн Бэрэссэдээтэлэ Петр Гоголев регион 200-чэ тыһыынча олохтоохторун интэриэстэрин туруулаһар өрөспүүбүлүкэ идэлээх сойуустарын Федерациятын кытта үлэлииргэ бэлэмнэрин туһунан иһитиннэрдэ, көтөҕүллүбүт боппуруостары үөрэтэ ылла. Петр Васильевич этэринэн, өрүттэр бииргэ үлэлээһиннэригэр бастакы хардыынан “2019 сылга уонна 2020-2021 сс. былааннаммыт кэмҥэ СӨ судаарыстыбаннай бюджетын туһунан” Сокуон барылын “нулевой ааҕыыга” көрүүгэ профсоюз өрүтэ кыттыыта буолуохтаах.
СӨ идэлээх сойуустарын Федерациятын пресс-сулууспата.
