Айсен Николаев Баһылык дуоһунаһыгар киирдэ    

Бу номнуо үйэ чиэппэрин устатыгар ыытыллар сиэргэ-туомҥа үгэс курдук Ил Түмэн депутаттара, өрөспүүбүлүкэ Бырабыыталыстыбатын чилиэннэрэ, Конституционнай, Үрдүкү, Арбитражнай сууттар судьуйалара, өрөспүүбүлүкэ прокурора уонна ыҥырыллыбыт бочуоттаах ыалдьыттар бааллар.

Бу күн Дьокуускайга Айсен Николаев инаугурациятыгар РФ Бырабыыталыстыбатын Бэрэссэдээтэлин солбуйааччы – Уһук Илиҥҥэ президент боломуочунайа Юрий Трутнев, Саха сирин 2002-2010 сс. баһылыга Вячеслав Штыров, о.д.а.  кэлбиттэр.

Дуоһунаска киирии сиэрэ-туома Саха сирин Киин быыбардыыр хамыыһыйатын бэрэссэдээтэлэ Алексей Ефимов өрөспүүбүлүкэ баһылыгын быыбардарын түмүгүн иһитиннэрииттэн саҕаланар.

Кини Айсен Николаевы норуот үрдүк итэҕэлин ылбытынан эҕэрдэлээтэ уонна Саха сирин Баһы­лыгынан талыллыбытын туһунан дастабырыанньаны туттарда.

Ити кэнниттэн Айсен Николаев икки судаарыстыбаннай тылы­нан өрөспүүбүлүкэ Баһылыгын эбээһинэстэрин үтүө суобастаахтык толорорго, РФ Конституциятын уонна федеральнай сокуоннары тутуһарга, өрөспүүбүлүкэ национальнай-судаарыстыбаннай статуһун уонна кини элбэх омуктаах норуотун интэриэстэрин көмүскүүргэ, киһи уонна гражданин бырааптарын ытыктыырга бирисээгэ биэрдэ.

Конституционнай суут бэрэссэдээтэлэ Александр Ким-Кимэн Айсен Нико­лаевы Саха сирин Баһылыгын дуоһунаһыгар киирбитинэн эҕэрдэ­лээтэ. Бу түгэнтэн Айсен Николаев дуоһунаһыгар официальнайдык киирдэ.

Саха сирин саҥа Баһылыгар ураты сиэр-туом бэлиэтин өрөспүүбүлүкэ бастакы президенэ Михаил Николаев туттарда.

“Ытыктабыллаах Саха сирин олохтоохторо, улаханнык долгуйан туран мин эһиэхэ тыл этэбин. Олоҕум саҥа түһүмэҕэ саҕаланна. Миэхэ бирисээгэни биэрии саҥа эппиэтинэһи сүктэрэр. Инники диэки барарбар миэхэ күүс-уох эппит бары дьон иннигэр улахан эппиэтинэһи сүгэбин”, — диэн Саха сирин баһылыга этиитин саҕалаата.

Айсен Николаев дуоһунаһыгар киирээт да, бастакы Ыйааҕынан өрөспүүбүлүкэ экологията үтүө туруктаныытыгар сыһыаннаах ыйаах буолуоҕун иһитиннэрдэ.

Бэйэбит корр.