Михаил Осипов сүрүн соруктарын быһаарда

СӨ Ил Дарханын уонна Бырабыыта­лыстыбатын пресс-сулууспата иһитиннэр­битинэн, Ил Түмэн туһааннаах кэмитиэтин мунньаҕар кини кандидатуратын көрүү түмүгүнэн Михаил Осипов сүрүн соруктарын иһитиннэрдэ.
Бастакы вице-премьер э.т. сыаналыырынан, чугастааҕы икки сылга регионнааҕы валовай бородуукта Саха сиригэр 1 трлн. солк. аһарыаҕа. Осипов бэлиэтииринэн, ити оҥорон таһаарыы үлэтин кэҥэтии (диверсификация) түмүгэр макроэкономикаҕа улахан ситиһии буолар. Бу салааҕа көдьүүстээх политика туоһутунан өрөспүүбүлүкэ сиригэр-уотугар дойду бөдөҥ предприятиеларын ситиһиилээх үлэтэ ааттанна. Кинилэр Саха сирин судаарыстыбаннай бюджетыгар нолуок киириитэ туруктаахтык улаатарын, ону сэргэ олохтоох нэһилиэнньэ, ол иһигэр эдэр кэскиллээх дьон дьарыктаах буолуутун хааччыйаллар. Михаил Осипов бу туһаайыыга үлэ салҕаныаҕын бэлиэтээтэ.
Кини бүгүҥҥү күҥҥэ өрөспүүбүлүкэҕэ саҥа күрэстэһэр кыахтаах, уһун технологическай тиһиктээх таҥастыыр оҥорон таһаарыыны үөскэтэр соруктар туралларын туһунан эттэ. Бу үлэҕэ, кини санаатынан, иһитиннэрии аһаҕас буолуута хааччыллыахтаах, аан дойдутааҕы экологическай уонна технологическай стандартар тутуһуллалларын туһунан дааннайдар арыллыахтаахтар.
«Өрөспүүбүлүкэ сиригэр-уотугар кэккэ оҥорон таһаарыыны тэрийэн эрэ биһиги нолуоктан харчы киириитэ салгыы үрдүүрүн ситиһиэхпит. Маныаха Саха сирин дьонун олохторун таһымын үрдэтии тирэҕирэр”, – диэн быһаарда Михаил Осипов.
Салгыы кини хотугу региоҥҥа 2000 сыллар бүтүүлэриттэн инвестиция инфраструктуратын үөскэтии саҕаламмытын, бүгүҥҥү күҥҥэ сүнньүнэн тэриллибитин бэлиэтээтэ. «Оттон, баҕар, сайдыы институттарын сорҕото соччо көдьүүһэ суох үлэлиирэ атын боппуруос. Өрөспүүбүлүкэҕэ кэлиэн баҕалаах инвестордарга үлэлииллэригэр наадалаах усулуобуйа барыта баар буоларыгар дьулуһабыт», – диэтэ Осипов.
Бастааҥҥы суолталаах соруктарын ортотугар бастакы вице-премьер э.т. аччыгый уонна орто предпринимательствоны кытта туһалаах сыһыаннары тэрийиини ааттаата. «Баһылык мин иннибэр предпринимателлэри үпкэ, бас билиигэ, нолуокка өйөөһүн чуолкай механизмнарын оҥорор соругу туруорда. Ол түмүгэр регионнааҕы валовай бородууктаҕа аччыгый уонна орто бизнес өлүүтэ улаатарын ситиһиэхтээхпит», – диэн бэлиэтээтэ Осипов. Кини чуолаан, предпринимателлэр үлэ миэстэтин таһааралларын, миэстэтигэр бюджет туруктаах буолуутун хааччыйалларын эбэн эттэ.
Бэлиэтээн эттэххэ, Ил Түмэн Михаил Осипов кандидатуратын бигэргэттэҕинэ, кинини бырабыыталыстыба бэрэссэдээтэлин бастакы солбуйааччы – экономика миниистирин дуоһунаһыгар аныыр туһунан ыйаахха Ил Дархан илии баттыаҕа.