Лабораторията суох чинчийии кыаллыбат

ИДьМ наркотигы эргитиини хонтуруоллааһыҥҥа Управлениетын 3 №-дээх отделын начальнига, полиция майора Ольга Скрябина, 2012-2019 сс. өрөспүүбүлүкэҕэ наркотигы утары политикаҕа судаарыстыбаннай бырагырааманы олоххо киллэриигэ аналлаах бырабыыталыстыба чааһыгар тыл этэригэр, наркотигы туһанааччылары булууга уонна диспансер учуотугар турааччы дьон ахсааныгар көрдөрүүлэр тоҕо араастаһалларын быһаарда. Ол курдук, киһини диспансер учуотугар туруорарга кини баҕа өттүнэн суругунан сөбүлэҥэ ирдэнэр. Оттон итини, быраабыла курдук, кэһээччилэр олоххо тутуспаттар. Ити иһин сыыппараларга араастаһыы тахсар.
Холобур, наркотигы кытта сибээстээх буруйдары арыйыы бырыһыана мэлдьи үрдүк Ленскэй оройуонугар ааспыт сылга наркотигы туһаныы туһунан биир да боротокуол оҥоһуллубатах.

Онуоха төрүөтэ, Ольга Евгеньевна быһаарбытынан, туһааннаах лаборатория суоҕар сытар. Чуолаан, доруобуйа харыстабылын тэрилтэлэригэр туттулла сылдьыбыт стандартнай экспресс-ньыма өрөспүүбүлүкэҕэ саамай тэнийбит наркотик көрүҥүн – табах булкадаһыктарын туһаныы чахчытын булан ылбат эбит. 2014 сыл бүтүүтэ Саха сирин Доруобуйа харыстабылыгар министиэристибэтэ саамай аныгы лабораторияны атыыласпыта. Ол түмүгэр наркотиктар бары көрүҥнэрин, ол иһигэр киһи этигэр-хааныгар баалларын-суохтарын билэргэ олус уустук спайстары туһаныы чахчытын булан ылар. Ити эрээри маннык лаборатория өрөспүүбүлүкэ үрдүнэн соҕотох, ону да Дьокуускайга эрэ баар. Соторутааҥҥа диэри министиэристибэ ыйга 12 чинчийиини оҥорууга лимити олохтообута. Оттон, дьиҥэр, итинник тыһыынчанан чинчийии ыытыллыахтаах. Ону таһынан, өрөспүүбүлүкэҕэ бөрүкүтэ суох суут практиката тэнийдэ — бу түгэҥҥэ суут сокуону кэһээччилэри, наркотигы туһанааччылары административнай эппиэтинэскэ тардыбат. Ол курдук, РФ Доруобуйа харыстабылыгар министиэристибэтин бирикээһинэн, 2016 с. бэс ыйыттан итирик туруктаах киһини медицинскэй туоһулааһын саҥа бэрээдэгэ күүһүгэр киирбитэ. Бирикээс ирдииринэн, икки булгуччулаах чинчийии ыытыллыах тустаах: барыллааһын уонна бастакы чинчийии бигэргэтэр түгэнигэр — химико-токсикологическай. Ити чинчийиилэр үөһэ этиллибит лабораторияҕа оҥоһуллаллар. Туһааннааҕынан, барыллааһын медицинскэй чинчийии суолунан ылыллыбыт медицинскэй туоһулааһын аакталара суукка ханнык да юридическай күүһэ суохтар. Манан сибээстээн оройуоннар киин балыыһаларын барыларын итинник лабораториянан хааччыйыы сытыытык тирээтэ. Бастатан туран, бырамыысыланнастаах Мииринэй, Ленскэй, Нерюнгри, Ньурба оройуоннарын. Биир итинник лабо­ра­тория сыаната 5 мөл. солк. тэҥ.

Ил Түмэн судаарыстыбаннай тутууга уонна сокуону оҥорууга сис кэмитиэтин баһылыга Алексей Еремеев туһааннаах кэмитиэт чилиэннэрэ гражданскай уопсастыба институттарын сайыннарыыга министиэристибэни уонна наркотигы туһаныыны хонтуруоллааһыҥҥа управлениены кытары быйыл ахсынньы 8 к. диэри болдьоххо, өрөспүүбүлүкэ бюджетын иккис ааҕыы режимигэр уларыытыны киллэртэрэр туһуттан судаарыстыбаннай бырагыраамаҕа көннөрүүлэри киллэрэллэригэр эттэ. Алексей Ильич лабораториялар ханнык оройуоннарга бастаан атыылаһыллыахтарын, муниципальнай тэриллии үбүн суотугар тэрили бэйэлэрэ атыылаһар кыахтарын, маннык лабораториялары туһааннаах исписэлиистэринэн хааччыйыы боппуруостарын толкуйдуурга сорудахтаата.