630
16 февраля 2018 в 14:57
Алмааһы хостооһуҥҥа үлэлиэн баҕалаах элбэх
Үөһээ Муунатааҕы алмаас хостонор сиригэр “АЛРОСА” АК олохтоохтортон 600-чэ киһини үлэҕэ ыларга бэлэм. Үлэ дьаарбаҥката олунньу 12-16 күннэригэр Бүлүү бөлөх улуустарыгар ыытылла турар.
Бэҕэһээ Үөһээ Бүлүү улууһугар үс нэһилиэгинэн СӨ Нэһилиэнньэ дьарыктаах буолуутугар судаарыстыбаннай кэмитиэтэ, Удачнайдааҕы хайаҕа байытар комбинат бэрэстэбиитэллэрэ Үөһээ Бүлүү дьарыктаах буолуутун киинин кытары олохтоохтортон докумуон туппуттар. Ол туһунан киин инспектора Туяра Кириллина иһитиннэрдэ:
— Үөһээ Муунаҕа олохтоох кадрдары үлэҕэ ылары тэрийэр оробуочай бөлөх бүгүн улуус үс сэлиэнньэтигэр — Намҥа, Хороҕо, Үөһээ Бүлүүгэ үлэлээтэ. Үлэлиэн баҕалаах уопсайа 216 киһи кэлэн барда. Докумуоннарын туттардылар. Сорохторо бырамыысыланнас салаатыгар идэлээхтэр, үлэлээбит уопуттаахтар, сорохтор идэни ылбыттар эрээри, үөрүйэҕэ суохтар. Ордук улахан техникаҕа үлэлиир “Е” категориялаах суоппардар, сварщиктар наадалар эбит. Ол курдук, хампаанньа 52 киһи докумуонун салгыы үөрэтэргэ ылла, 79 киһини идэҕэ үөрэтэр куурустарга ыытарга, 28 киһини стажировкаҕа, 57 киһини атын бырамыысыланнай хампаанньаларга үлэҕэ ыларга хамыыһыйа барыллаан быһаарда. Түмүк быһаарыыларын муус устар бастакы күнүгэр биллэрэллэр.
