Бүлүү бөлөх улуустарыттан – алмаас үлэтигэр

«Мииринэй оройуонугар Удачнай куораттан 160 км тэйиччи баар Үөһээ Муунатааҕы алмаас үөскээбит сиригэр үлэҕэ анаан хампаанньа 598 үлэ миэстэтин испииһэгин билиһиннэриэҕэ, олорго бастакынан Саха сирин олохтоохторо үлэҕэ киириэхтэрэ», — диэн иһитиннэриигэ этиллэр.
Үөһээ Муунатааҕы алмаас үөскээбит сиригэр кадрдары талыы олунньу 12 күнүгэр Бүлүү бөлөх улуустартан саҕаланыаҕа. СӨ Нэһилиэнньэ дьарыктаах буолуутугар Судаарыстыбаннай кэмитиэтин исписэлиистэрэ Удачнайдааҕы ГОК бэрэстэбиитэллэрин кытта резюмелары көрүөхтэрэ уонна Үөһээ Бүлүү, Бүлүү, Ньурба уонна Сунтаар улуустарын олохтоохторун кытта кэпсэтиилэри ыытыахтара.
Бастакынан хайа рудатын бырамыысыланнаһыгар туһааннаах үөрэҕи ылбыт уонна идэтигэр бэлэмнээх дьону үлэҕэ ылыахтара. Салгыы дьарыктаах буолуу кииннэригэр учуокка турар дьарыга, үлэтэ суох гражданнарга квалификацияны үрдэтэр куурустар тэриллиэхтэрэ.
«Маннык сүрүн оробуочай идэлэригэр кадрга наадыйыы баар: С, Д, Е категориялаах суоппардар, бульдозер машиниһа, токарьдар, слесарьдар, куруусчуттар, кыладыапсыктар, плотниктар, аккумуляторщиктар, автогрейдер машинистара, ыраастыыр тутууларга оператордар. Үлэ вахта ньыматынан тэриллэр, хамнас 30-тан 100 тыһ. солк. диэри», — диэн иһитиннэриигэ бэлиэтэнэр.
«Олохтоох кадрдары – бырамыысыланнаска» өрөспүүбүлүкэтээҕи бырайыак үлэһиттэр ахсааннарыгар тэҥэ суох быһыы-майгы баарын быһаарар сыалтан саҕаламмыта. Болҕомто бастакынан үлэтэ суохтары хат үөрэтиигэ, үрдүк уонна орто анал үөрэҕи бүтэрээччилэри үлэҕэ олохтооһуҥҥа, итиэннэ тыа сирин олохтоохторун үлэҕэ тардыыны тэрийиигэ ууруллар.