727
26 мая 2017 в 09:23
Дьабарыкы-Хайаттан оттук тиэйиллэр
Сайыҥҥы уу суола аһыллыбытынан сибээстээн «Якутуголь» ХК АУо Дьабарыкы-Хайа таас чоҕун тиэйиини саҕалаата. Навигацияҕа бэлэмнэнэн хампаанньа бириистэҥҥэ үлэ ыытыллар сирин өрөмүөннээн бүтэрдэ. Ити сыалга 10 мөл. солк. кэриҥэ харчы ороскуоттанна.
Сайыҥҥы уу суолунан сырыы саҕаланыытыгар эрдэттэн бэлэмнэммиттэрэ. Дьабарыкы-Хайатааҕы ыскылааттарга баар таас чох кээмэйэ 360 тыһ. тоннаны аһарар, онон алтынньыга диэри наадыйааччылары толору хааччыйар кыахтаахтар.
Хотугу тиэйиини хааччыйыыга анаан өрөспүүбүлүкэ судаарыстыбаннай сакааһын толорууга 350 тыһыынча тонна кэриҥэ оттугу туһанааччыларга тиэрдэргэ былаанныыллар. Дьабарыкы-Хайатааҕы таас чохтоох сиргэ хостонор чоҕу сүрүн атыылаһааччыларынан өрөспүүбүлүкэ хотугу уонна киин оройуоннарын дьиэ-уот коммунальнай хаһаайыстыбалара буолаллар. Олор ортолоругар – Үөһээ Бүлүү, Үөһээ Дьааҥы, Эдьигээн, Ньурба, Өлүөхүмэ, Таатта, Томпо, уо.д.а. улуустар.
OLYMPUS DIGITAL CAMERA
Ыам ыйа бүтүөр диэри 43 тыһыынча тонна таас чох тиэйиллиэхтээх. Аан бастакынан Амма, Ньурба уонна Сунтаар улуустара хааччыллыахтара, кинилэргэ халаан кэмигэр уу хаатыгар туолан турдаҕына эрэ таһаҕаһы тиэрдиллэр. Хампаанньа пресс-сулууспата иһитиннэрбитинэн, уу суолунан таас чоҕу график быһыытынан тиэйиэхтэрэ.
