ГРЭС-2 үлэтин саҕалаата

«Ирбэт тоҥ зонатыгар сытар дойдубут саамай бөдөҥ регионугар маннык улахан тутуулар 60-с сыллартан саҕалаан суохтара. Онон, бэриллибит кыаҕынан туһанан, теплоэлектростанцияны туппут “Русгидро” үлэһиттэрин, энергетиктэри, тутууга кыттыспыт тэрилтэлэри, бэдэрээтчиттэри барыларын, Саха сирин бары олохтоохторун бу улахан суолталаах түгэнинэн эҕэрдэлиибин. Бу аныгы станцияны үлэҕэ киллэрии өрөспүүбүлүкэҕэ тыын суолталаах», — диэн бэлиэтээтэ Россия Бырабыыталыстыбатын Бэрэссэдээтэлэ Дмитрий Медведев.

Бырабыыталыстыба баһылыга санаппытынан, регион киин өттө уонна киин куората Россия энергетикатын бүттүүн ситимигэр холбоммотохторо. «Онон 40-тан тахса сыл үлэлиир соҕотох ГРЭС итиэннэ оннооҕор да эргэ Дьокуускайдааҕы ТЭЦ кыамталарыгар суоттанар бүгүҥҥү күҥҥэ сатаммат. Маннык тыйыс климат усулуобуйаларыгар энергиянан хааччыйыы эрэллээх резервэтэ булгуччу баар буолуохтаах. Билигин регион энергетика өттүнэн куттала суох буолуутун хааччыйар кыах үөскээтэ. Дьон бытархан тымныыларга кыһаллыбакка холкутук олоруохтарын уонна үлэлиэхтэрин сөп. Саҥа станция – бу сырдык, бары дьиэлэргэ, оҕо саадтарыгар, оскуолаларга, балыыһаларга сылаас буолуутун мэктиэтэ. Бу, саарбаҕа суох, куораттар уонна бөһүөлэктэр уулуссаларын сырдатыы. Уонна, биллэн турар, регион бэйэтин сайдыытыгар боччумнаах хардыы. Манна бөдөҥ инвестиция бырайыактарын олоххо киллэриигэ, саҥа оҥорон таһаарыыны үөскэтиигэ уонна үлэ миэстэлэрин таһаарыыга саҥа кыахтар үөскүөхтэрэ, ол эбэтэр итиннэ барытыгар энергия наадалаах», — диэтэ Дмитрий Медведев.
Премьер ГРЭС-2 Экология сылыгар аһыллара бэлиэ буоларын эттэ. «Станцияҕа саамай аныгы газотурбиннай технологиялар киирдилэр. Уматык быһыытынан айылҕа гааһа туһаныллар. Ону таһынан, станция баар буолуутун түмүгэр туһанааччылары киин ититиигэ көһөрүү, кыра көдьүүстээх уонна экологияҕа буортулаах котельнайдар улахан өттүлэрин сабар, региоҥҥа экологическай быһыыны-майгыны тупсарар кыаллыаҕа»,— диэн салгыы бэлиэтээтэ кини.
Дьокуускайдааҕы ГРЭС-2 (бастакы уочарата) электрическэй кыамтата 193,5 МВт тэҥ, итиини биэрэр кыамтата — 469 Гкал/чаас. Сыл бүтүөр диэри станция бэйэтин ититэр кыамтатын 1/3 туһанан үлэлиэҕэ. Кэлэр сылга ГРЭС-2 бэйэтин кыамтатын 50%-гар тахсара былааннанар. Уматыкка айылҕа гааһа туһаныллыаҕа.
Дьокуускайдааҕы ГРЭС-2 үлэҕэ киириитэ өрөспүүбүлүкэҕэ Киин энергооройуону, ол иһигэр киин куораты уотунан эрэллээхтик хааччыйыыны тупсарыаҕа.
Билиҥҥи кэмҥэ Дьокуускайдааҕы ГРЭС 9 киин улуус электроэнергиятын 90% уонна Дьокуускай куорат итиини туһаныытын аҥаарыттан ордугун хааччыйар.

РФ Уһук Илин сайдыытыгар
министиэристибэтин официальнай
сайтыттан.