Кандидат бырагырааматын билсэргэ ыҥырдылар

Кулун тутар 18 күнүгэр буолар дойду Президенин быыбарыгар хомуньуустар Москва аннынааҕы Ленин аатынан сопхуос дириэктэрэ Павел Грудинин кандидатуратын өйүүллэрин иһитиннэрдилэр. Биллэрин курдук, РФКП ХVII съеһигэр кинини дойду аҕа баһылыгын быыбарыгар кандидат быһыытынан туруорбуттара. РФКП Саха сиринээҕи салаатын рескомун бастакы сэкирэтээрэ Виктор Губарев суруналыыстарга ити быһаарыы өссө сыл иннинэ ылыллыбытын иһитиннэрдэ. Тустаах партия рескомун бюротун чилиэнэ Артур Алексеев Российскай Федерация Президенин быыбарыгар кандидаттар элбэхтэрин бэлиэтээтэ. Кини суруналыыстары тустаах кандидат «Павел Грудинин 20 хардыыта» диэн быыбар иннинээҕи бырагырааматын кытта билсэрбитигэр ыҥырда.
Суруналыыстар миэстэтигэр быыбарга тэрээһин үлэтэ-хамнаһа хайдах ыытылларын интэриэһиргээтилэр. Ыччат тустаах политическай партия кэккэтигэр төһө киирэрин туоһуластылар.