614
27 января 2018 в 12:09
Варвара Устинова — Путин итэҕэллээх киһитэ
Дойду президенин быыбарыгар Владимир Путин итэҕэллээх үһүс киһитинэн Саха сиригэр Россия Үлэҕэ Геройа Варвара Устинова ананна. Ол аата кини хандьыдаат регионнааҕы быыбарга штабын хос бэрэссэдээтэлинэн буолла.
Бэлиэтээн эттэххэ, РФ президенин быыбарыгар Владимир Путин 259 итэҕэллээх дьонун испииһэгин Россия КБХ (ЦИК) тохсунньу 12 к. регистрациялаабыта. Кинилэр ахсааннарыгар Саха сириттэн икки киһи – “Анаабыр алмаастара” хампаанньа генеральнай директора Павел Маринычев уонна Эстрада театрын директора Алексей Егоров киирбиттэрэ.
Варвара Устинова Лисинскэйдээҕи үөрэтэр лесничествоны бүтэрбитэ. 1979 сылтан Халыматааҕы лесхоз Орто Халыматааҕы лесничествотыгар учаастактааҕы технигинэн үлэлээбитэ. 1984 сылга Сибиирдээҕи технологическай институт ойуур хаһаайыстыбатыгар факультетын бүтэрбитин кэннэ Таатта лесхоһун кылаабынай лесничэйинэн анаммыта.
2003 сылтан «Хаҥалас лесничествота» тэрилтэни салайар, кинилэр 2817,9 тыһ. гектар иэннээх ойууру көрөллөр-истэллэр. Бу ойуур сиригэр-уотугар Өлүөнэ очуостара айылҕа пааматынньыга баар. Салайааччы үлэтин түмүгэр Саха сирин атын маннык тэрилтэлэрин кытта тэҥнээтэххэ, лесничествоҕа ойуур баһаара ылар бырыһыана 5 төгүл кыра.
Варвара Устинова 2011 сылтан “Саха Өрөспүүбүлүкэтин лесоводтарын уопсастыбата” уопсастыбаннай тэрилтэ Бырабылыанньатын састаабыгар баар.
Россия президенин 2017 с. муус устар 25 к. 182 №-дээх Ыйааҕынан киниэхэ судаарыстыба уонна норуот иннигэр үлэҕэ ураты үтүөлэрин иһин Россия Федерациятын Үлэ Геройун аата иҥэриллибитэ.
Айал Яковлев, СИА.
