“Аһаҕас ааны тоҥсуйар наадата суох”

От ыйын 24 к. Россия КБХ (ЦИК) уочараттаах 214-с мунньаҕар хамыыһыйа бэрэссэдээтэлэ Элла Памфилова Москва куорат сэттис ыҥырыылаах Думатын быыбарыгар хандьыдааттары кытта көрсүһүү түмүктэрин таһаарда.

«Демократия сыаннастарын тарҕатар дьон биһигини сокуоннай процедуралары аахайбаппытыгар уонна бары хандьыдааттары регистрациялааһыҥҥа административнай салайыыны туттарбытыгар ыҥыралларыттан дьиктиргиибит, – диэтэ хандьыдааттары кытта көрсүһүү туһунан кэпсииригэр КБХ Бэрэссэдээтэлэ. – Биһиги итини ылыммаппыт, хас биирдии түгэни сокуоҥҥа сөп түбэһиннэрэн көрөр санаалаахпыт. Хандьыдаат быыбар сокуоннарын ирдэбиллэрин тутуһуохтаах уонна бары наадалаах процедуралары ааһыахтаах, олохтоммут процедуралары тутуһуу – демократия төрдө, ол барыларыгар булгуччулаах».
Элла Памфилова Хамыыһыйаҕа киирбит бары докумуоннары уонна матырыйааллары Россия КБХ көрөргө бэлэмин бэлиэтээтэ: «Биһиги, бастатан туран, быыбардааччылар бырааптарын туруулаһабыт, ол иһигэр регистрацияланалларыгар аккаастаммыт хандьыдааттар иһин илии баттаабыт дьон бырааптарын. Биһиги кэпсэтиигэ бэлэммит, онон аһаҕас ааны тоҥсуйар наадата суох».
Санкт-Петербург муниципалитеттарыгар быыбар хампаанньатын сытыы боппуруостарыгар ураты болҕомто уурулунна.
Элла Памфилова бэлиэтээбитинэн, Санкт-Петербургдааҕы быыбар хамыыһыйата да, Россия КБХ да бүгүҥҥү күҥҥэ диэри быраабы харыстыыр уорганнарга туһаайан этиилэригэр харданы ыла иликтэр.
Россия КБХ Бэрэссэдээтэлэ РФ Үрдүкү суутугар уонна РФ Генеральнай прокуратуратыгар, ону сэргэ РФ Силиэстийэлиир кэмитиэтин салалтатыгар олохсуйбут быһыыны-майгыны суһаллык быһааралларыгар көрдөһөн сурук бэлэмниир былааннаах.
«Хамыыһыйалары ыһыыга уонна бэрэссэдээтэллэри уһулууга тиийэ буруйдаахтары кытаанахтык накаастыахха наада, – диэн бэлиэтээтэ Элла Памфилова, Санкт-Петербургдааҕы быыбар хамыыһыйатын салайааччыларыгар туһаайан. – Эһиэхэ быһаччы эппиэтинэс сытар. Быыбар хампаанньатыгар эрэл сүтүө суохтаах. Эһиги сэрэтэр дьаһалларгытыгар туох табыллыбатын сиһилии ырытан көрүөхтээххит. Онтон атын үҥсүүлэр элбии туруохтара».
Бүттүүн куоластааһын күнүгэр бэлэмнэнии хаамыытын туһунан видеоконференция режиминэн Санкт-Петербургдааҕы быыбар хамыыһыйатын бэрэссэдээтэлэ Виктор Миненко, Карачаево-Черкесскэй Өрөспүүбүлүкэ БХ бэрэссэдээтэлэ Лариса Абазалиева уонна Амур уобалаһын БХ бэрэссэдээтэлэ Елена Воробьева иһитиннэрдилэр.
Элла Памфилова регионнарга быыбар хампаанньатын хаамыытын туһунан уопсай иһитиннэриини билиһиннэрдэ. Чуолаан, сэттис ыҥырыылаах Госдума депутаттарын эбии быыбардарыгар биир мандааттаах уокуруктарынан 23 хандьыдаат регистрацияламмыт, 1 киһиэхэ аккаастаммыт итиэннэ 13 хандьыдаат докумуоннара көрүүгэ сылдьаллар.
«Россия Федерациятын субъектарын үрдүкү сололоох сирэйдэрин быыбардарыгар 163 хандьыдаат туруорулунна, 48 – бэйэни туруорунуу бэрээдэгинэн уонна 31 партияттан 115 хандьыдаат», – диэн КБХ Бэрэссэдээтэлэ кэпсээтэ.
«РФ субъектарын сокуону таһаарар (бэрэстэбиитэллээх) уорганнарын депутаттарын быыбарыгар 6406 хандьыдаат туруорулунна, ол иһигэр 566 – бэйэлэрин туруоруммуттар уонна 5840 – политическай партиялартан хандьыдааттар», – диэтэ кини.
Итини сэргэ 2019 с. балаҕан ыйын 8 к. Россия субъектарын 3 административнай киинигэр – Улан-Удэҕа (Бурятия), Новосибирскайга (Новосибирскай уобалас) уонна Анадырьга (Чукотка автономнай уокуруга) баһылыгы быһаччы куоластааһын ыытыллыаҕа.
РФ субъектарын административнай кииннэригэр муниципальнай тэриллиилэр бэрэстэбиитэллээх уорганнарын депутаттарын быһаччы быыбардара Россия 21 субъегар буолуохтара.

Иһитиннэриини бэлэмнээһиҥҥэ Россия КБХ матырыйааллара туһанылыннылар