Хандьыдааттары туруоруу сүнньүнэн түмүктэннэ

От ыйын 29 к. Саха сиригэр араас таһымнаах быыбардарга хандьыдааттары туруоруу түмүктэннэ. Быйыл бүттүүн куоластааһын күнэ өрөспүүбүлүкэ 25 оройуонугар уонна “Жатай бөһүөлэгэ” куорат уокуругар ыытыллыаҕа, региоҥҥа барыта 57 быыбар хампаанньата буолуохтаах, диэн СИА иһитиннэрдэ.

Оройуоннар таһымнарыгар сүрүн быыбардар 4 муниципальнай тэриллиигэ барыахтара. Ол курдук, баһылыктары Аллайыаха, Өлүөхүмэ, Аллараа Халыма оройуоннарыгар уонна Жатай бөһүөлэгэр талыахтара. Аллайыаха, Өлүөхүмэ оройуоннарыгар уонна Жатайга ону сэргэ сэбиэттэр депутаттарын талыахтара. Сорох уокуруктарга оройуон таһымнаах депутаттары эбии быыбардааһын Үөһээ Дьааҥы, Мэҥэ-Хаҥалас уонна Уус-Маайа оройуоннарыгар, хаттаан – Нерюнгри оройуонугар ыытыллыаҕа.

Итини сэргэ балаҕан ыйын 8 к. Булуҥ, Үөһээ Бүлүү, Ленскэй, Мэҥэ-Хаҥалас, Нам, Ньурба, Өлүөхүмэ, Орто Халыма, Сунтаар, Таатта уонна Уус-Маайа оройуоннарыгар нэһилиэк уонна поселение 18 баһылыга талыллыаҕа.

От ыйын 27 к. БКХ (ЦИК) дааннайдарынан, оройуоннар баһылыктарыгар 24 хандьыдаат турда, кинилэртэн 11-рэ эрэ партиялар бэрэстэбиитэллэрэ буолаллар, онтон атыттара – бэйэлэрин туруорунааччылар. Бэйэлэрин хандьыдааттарын “Биир ньыгыл Россия”, “Сиэрдээх Россия”, РЛДП уонна РФКП туруордулар.

Аллайыаха улууһун баһылыгын солотугар “Биир ньыгыл Россияттан” Яков Елисеев, Егор Уваров РФКП-тан уонна  бэйэтин туруоруммут Виталий Слепцов күрэстэһиэхтэрэ. Бүгүҥҥү күҥҥэ кинилэртэн официальнай регистрацияны ким да ааһа илик.

Жатай бөһүөлэгэр баһылык солотугар 6 хандьыдаат турда. Кинилэртэн сорохторо ааспыт сыллааҕы киин куорат мэрин быыбарыгар кыттыбыттара. Ол курдук, быйыл эмиэ Микаэл Заболотнай (РФКП) уонна Владислав Теппор (РЛДП) баһылык буолар санаалаахтарын көрдөрдүлэр – ааспыт сылга иккиэн мэр дуоһунаһыгар турбуттара, ол саҕана Заболотнай «Партия Роста» хандьыдаата этэ. «Биир ньыгыл Россия» Жатай баһылыгын ДьУоКХ боппуруостарыгар солбуйааччыта Владислав Гладышевы туруорда, оттон “Сиэрдээх Россияттан” Мичил Николаев киирсэр. Итини тэҥэ быыбарга 2 бэйэлэрин туруорунааччы быыбарга кыттар санаалаахтар – Дьокуускайдааҕы аэрогеодезическай тэрилтэттэн МТО начальнига Анатолий Ощепков уонна социальнай боппуруостарга уокурук баһылыгын бастакы солбуйааччыта Елизавета Исаева.

Билигин 6 хандьыдааттан 2 киһи – Владислав Теппор уонна Владислав Гладышев регистрацияны ааспыттар.

Аллараа Халыма оройуонун салайыан баҕалаах 8 хандьыдаат баар. Эмиэ бу иннинээҕи түгэннэргэ курдук, кинилэртэн үгүстэрэ бэйэлэрин туруоруммут дьон. Бу быстах кэмҥэ үлэлээбэт Владислав Бандеров, оройуон сэбиэтин депутата Альбина Винокурова, оройуон баһылыгын бастакы солбуйааччыта Катерина Дмитриева, пенсионер Дмитрий Золотуев уонна адвокат Сергей Трусов.

Партиялартан 3 хандьыдаат быыбарга кыттар баҕаларын биллэрдилэр – оройуон сэбиэтин депутата Рамиль Алимов (РФКП), Госдума депутата Селезнев Саха сиригэр көмөлөһөөччүтэ Евгений Рябченко (РЛДП), итиэннэ быстах кэмҥэ үлэлээбэт Валерий Сентяков («Биир ньыгыл Россия»).

Бүгүҥҥү күҥҥэ 8 хандьыдааттан БКХ 3 киһини регистрациялаата – Дмитриеваны, Алимовы уонна Бандеровы.

Өлүөхүмэ улууһугар быыбар хампаанньата эмиэ итинтэн итэҕэһэ суох интэриэһинэйдик барара күүтүллэр. Манна баһылык солотун иһин 7 хандьыдаат күрэстэһэр баҕалаах. Икки киһи быыбарга партиялартан тураллар – Михаил Еникеев (РЛДП) уонна билигин Ил Түмэн депутатынан буолар Сулустаана Мыраан («Сиэрдээх Россия»).

Онтон атын 5 киһи – бэйэлэрин туруорунааччылар: быстах кэмҥэ үлэтэ суох Илларион Авелев, “Өлүөхүмэ кыладабыайа” генеральнай директора Николай Ефимов-Владимиров, киин куоракка “Куорат баанньыктара” МУП директора Василий Поскачин уонна Хоту сир физико-техническэй проблемаларыгар институт научнай үлэһитэ Николай Харбин. Бэйэтин туруорунааччы  Константин Шестаковка Өлүөхүмэ улууһунааҕы быыбар хамыыһыйата регистрациялыыртан аккаастаабыт. Бүгүҥҥү күҥҥэ регистрацияны соҕотох хандьыдаат — Василий Поскачин ааспыт.

Оройуон таһымнаах депутаттарга хандьыдааттары 5 партия туруорда: «Биир ньыгыл Россия», «Сиэрдээх Россия», РФКП, РЛДП уонна «Партия Возрождения России». От ыйын 27 к. 96 хандьыдаат сайабылыанньата киирдэ, ол иһигэр 22 — бэйэлэрин туруорунааччылар. Кинилэр 61 мандаат иһин охсуһуохтара. Бэлиэтээн эттэххэ, Аллайыаха уонна Өлүөхүмэ оройуоннарыгар былаас бэрэстэбиитэллээх уорганнарыгар быыбардар булкаас системанан барыахтара (партия испииһэгэ+биир мандааттаахтар), атыттарга — мажоритарнай системанан эрэ.

«Биир ньыгыл Россия» Өлүөхүмэттэн ураты бары оройуоннарга хандьыдааттарын туруорда, РФКП-тан хандьыдааттар Үөһээ Дьааҥы, Өлүөхүмэ уонна Уус-Маайа оройуоннарыгар суохтар. «Сиэрдээх Россия» Үөһээ Дьааҥы, Нерюнгри уонна Мэҥэ-Хаҥалас оройуоннарын сэбиэттэригэр бэрэстэбиитэллэрин киллэрэр иһин охсуһар санаалаах, РЛДП – Нерюнгри оройуонугар уонна “Жатай бөһүөлэгэ” КУо, «Партия Возрождения России» — Өлүөхүмэҕэ уонна Аллайыахаҕа.

Бу быыбар иннинээҕи балаһыанньа өссө уларыйыан сөп. Хандьыдааттары туруоруу от ыйын 29 к. киэһэ 18.00 түмүктэнэр. Хандьыдааттар бүтэһиктээх испииһэктэрин Саха сиринээҕи КБХ атырдьах ыйын 9 к. иһитиннэриэҕэ, ити кэмҥэ муниципальнай тэриллиилэр быыбардыыр хамыыһыйалара бэрэбиэркэни уонна туруоруллубут бары хандьыдааттары регистрациялааһыны түмүктүөхтэрэ.