Хас да оруолу дьүөрэлээн…

Иван Гоголев — Кындыл хоһооннорун сөбүлээн ааҕабын

Бүлүү куоратын депутаттарын Сэбиэтин бэрэссэдээтэлэ Софья Саввинова:

— Мин улааппыт оҕолордоох, сиэннэрдээх киһибин. Сойуус саҕаттан салайар үлэҕэ сылдьабын. Икки болдьоххо нэһилиэккэ баһылыктаабытым. Муниципальнай тэриллии олохтонорун саҕана сокуону, нормативнай акталары оҥорууга кыттыспытым. Сүрдээх үлэлээх, тыҥааһыннаах кэмнэр этэ. Онно хатарыллыбытым, элбэҕи билбитим-көрбүтүм. Нэһилиэнньэм миигин депутат буоларбар итэҕэйбитэ. Куорат сэбиэтин 2,3 ыҥырыылаах мунньаҕын депутатынан, былырыын балаҕан ыйыгар бэрэссэдээтэлинэн талыллан үлэлии сылдьабын. Бэйэм учуутал идэлээхпин, баһылыктыы сылдьан Менеджмент үрдүкү оскуолатыгар үөрэммитим, эбии юрист идэтин баһылаабытым. Пенсияҕа тахсыбытым, Бүлүү куоратын депутаттарын куорпуһун салайабын. Дьахтар алаһа дьиэ сылааһын харыстааччы эбээһинэһин уонна бу курдук эппиэтинэстээх үлэтин хайдах тэҥинэн илдьэ сылдьарый диэн ыйытаҕын. Кырдьык, тыа сиригэр уустук этэ. Маһынан оттуллар оһох, сүөһү көрүүтэ, уу-хаар таһыыта. Тыа киһитин үлэтэ баһаам. Маныаха кэргэним миэхэ улахан көмөлөөх этэ. Кини өйөбүлүнэн мин үрдүк ситиһиилэммитим. Оҕолорум кыраларыттан үлэҕэ убананнар, үтүө дьон буола улааттылар дии саныыбын. Үлэ киһини буорту оҥорбот. Биллэн турар, букатын үлэбинэн олорор этим диэбэппин. Алаһа дьиэбэр сылаас эйгэни, оҕолору, кэргэммин кытары истиҥ сыһыаны олохтуурга кыһаллааччыбын. Сайын аайы сир астаан,оттоон, бары биир күүстээх ситимнээх дьиэ кэргэн буоларбытын билэрбит. Билигин, оҕолор улааппыттарын кэннэ, иллэҥ кэммэр дьиэҕэ олорбоппун. Айылҕаны олус таптыыбын. Мин төрөөбүт нэһилиэгим Чочуттан төрөөн-үөскээн сириэдийбит дьонтон биирдэстэринэн Иван Гоголев – Кындыл буолар. Мин Кындыл айар үлэтин сүгүрүйээччитинэн буолабын. Иван Гоголев дьахтарга таптал туһунан саамай элбэх хоһоонноох бэйиэт буолар, быһыыта. Киниэхэ сүгүрүйээччилэр суруйааччы Ытык сиригэр оскуола оҕолорун илдьэ тахсан, киниэхэ анаммыт тэрээһиннэри ыытабыт. Хоһооннорун ааҕабыт, сэһэргэһэбит. Бу күннэрбин олус сөбүлүүбүн, кэтэһэбин.

Киһи хараҕа мэлдьи уоттаах буолуохтаах

Анаабыр национальнай (долган-эбэҥки) улууһун депутаттарын Сэбиэтин бэрэссэдээтэлэ Алексеева Галина:

— Миигин депутат үлэ­тигэр дьылҕам аҕалбыта диэххэ сөп. Бэйэм төһө да лидер буола сатаабатаҕым иһин, тулалыыр дьон миигин оннук көрөллөрө. Оҕо саадыттан саҕалаан, оскуолаҕа, университекка, үлэбэр. Мин учуутал идэтин баһылаан, Өймөкөөн бириискэтин сэлиэнньэтигэр ананан, история учуутала кыыһы кытары тиийэн үлэлээбиппит. Коллегам нэһиилэ биир сылы тулуйан баран, дойдулаабыта. Мин, үчүгэйдик нууччалыы да саҥарбат киһи, нууччалар, кэлии омуктар быыстарыгар хаалан үлэлээбитим. Онно миигин идэлээх сойуус бэрэссэдээтэлинэн талбыттара. Онтон аны 32 саастаахпар оскуола дириэктэринэн үлэлииргэ этиилээх тахсыбыттара. Ол курдук, салайар үлэҕэ кэлбитим. Ити кэннэ дьылҕам Үрүҥ Хайаҕа аҕалбыта. Онно оскуола дириэктэринэн үлэлээбитим. Онтон 2012 сыллаахха Сааскылаах орто оскуолатыгар дириэктэрдээ диэн ыҥырбыттара. 2013 сыллаахха улуус депутата буоларга этии киирбитигэр, сөбүлэһэн быыбарга кыттыбытым. Бу санаатахха, бэйэбин тургутан көрөөрүбүн, харса суох ылсан испиппин. Миигиттэн дьиэ-уот үлэтин уонна оскуолаҕа үлэҕин, уопсастыбаннай ноҕуруускаҕын хайдах дьүөрэлээн толоро сылдьаҕын диэн ыйыталлар. Оттон мин маннык этиэм этэ – кылаабынайа, оҥорор дьыалаҕын таптыаххын, ис сүрэххиттэн оҥоруоххун наада. Оччоҕо олохтон дуоһуйуу кэлэр.
Эдэр сылдьан хайыһардьыт этим. Үлэбиттэн көҥүл кэммэр дьиэлээхтэри минньигэс аһынан күндүлүүрбүн сөбүлүүбүн. Биир кыыс оҕолоохпун, кэргэним, хомойуох иһин, аҕыйах сыллааҕыта суох буолбута. Кыыһым – мин саамай чугас киһим, эрэлим. Кыратыттан бииргэ илдьэ сылдьарым, онон дьоҥҥо сыһыаммын көрө улааппыта. Оскуоланы кыһыл дипломунан бүтэрэн, Санкт-Петербургдааҕы гражданскай университеты бүтэрэн, билигин “Аэрофлот” хампаанньаҕа үлэлии сылдьар. Ыал буолан, кыыс оҕоломмута. Сиэним Анечка – баарым-суоҕум. Бу сотору эбэтигэр күүлэйдии кэлиэхтээх. Мин санаабар, дьахтар быһыытынан олоҕум суолунан сөпкө баран иһэбин. Дьол­лоох ийэбин, эбээбин, үлэбин таптыыбын. Эдэрдэргэ сүбэм диэн, хаһан да харчы туһугар санааҕыт сыппат дьыалатынан дьарыктанымаҥ. Киһи хараҕа мэлдьи уоттаах буолуохтаах.

Бигэ тирэхтээх буоламмын

Ньурба улууһун депутата Валентина Николаевна Андреева:

— Миэхэ дьиэ кэргэним бигэ тирэх буолан, уопсастыбаннай уонна депутат үлэтинэн дьарыктанан кэллим. Уолум армияҕа, кыргыттарым ыал буоланнар, биһиэхэ 7 саамай күндү сиэни бэлэхтээбиттэрэ. Мин 2005 сылтан Ньурба улууһун Антоновка сэлиэнньэтин депутатынан талыллан үлэлээбитим. Онтон 2-с, 3-с ыҥырыыларга улуус депутатынан талыллыбытым. Улуус депутатынан буолбут сылбар бүддьүөт хамыыһыйатыгар бэрэссэдээтэллээбитим. Билигин бүддьүөт уонна тыа хаһаайыстыбатын боппуруостарыгар хамыыһыйа чилиэнинэн буолабын. Депутат үлэтэ – хамнаһа суох уопсастыбаннай ноҕурууска. Ону ол диэбэккэ, дьонугар-сэргэтигэр туһаны аҕалыан баҕарар киһи ылсан үлэлиир. Мин эмиэ оннук санаалаахпын. Ол иһин ыал ийэтэ да буолларбын, үлэбэр кыһамньылаахтык сыһыаннаһарым. Кэргэним Данил Дмитриевич миэхэ улахан өйөбүл буолан, ыал ийэтин уонна уопсастыбаннай үлэһит, депутат быһыытынан бэйэбин көрдөрдүм. Аҕабыт оҕолорбутун иитиигэ эмиэ өҥөтө улахан. Оҕолорум улаатан баран: “Ийэбит мэлдьи үлэлээн тахсааччы”, — дииллэр. Оннук өйдөөн хаалбыттар. Киэһэ сылайан-элэйэн кэлэрбэр дьиэ сылааһынан уонна минньигэс аһынан илгийэн көрсөөччү. Дьахтар буоларым быһыытынан, социальнай боппуруостары туруорсааччыбын —Герой-ийэ статуһун, социальнай эбийиэктэри тутууну, суолу-ииһи. Олохтоохтор итэҕэллэрин толоро сатыыбын.
Мин санаабар, уопсастыбаннай үлэҕэ киһи бэйэтэ ананан төрүүр. Сорох дьахталлар ийэ, алаһа дьиэ хаһаайкаларын быһыытынан бэйэлэрин үчүгэйдик көрдөрөллөр. Сорохтор үлэлэринэн өрө тахсаллар. Оттон мин кэргэним өйүүр, өйдүүр буолан, ыал ийэтин, тэрилтэ үлэһитэ уонна депутат быһыытынан бэйэбин көрдөрдүм. Бу үс оруолу тэҥҥэ дьүөрэлээн илдьэ сылдьабын. Онон дьоллоохпун. Кэргэним мин ис кыахпын утарылаһан, дьиэҕэ олордубута буоллар, тууйуллан, олохпор тугу эрэ ситэ оҥорбокко сылдьар курдук сананыам этэ. Онон, мин санаабар, дьахтар дьоло – өйдүүр, өйүүр киһитин көрсөрө. Кинилиин бэйэ-бэйэни таптаһан, ытыктаһан олороллоругар. Мин бэйэм кэргэммин эмиэ ханнык баҕарар түгэҥҥэ өйүүбүн. Уонна, ханнык баҕарар ыал курдук, дьиэбитигэр бэйэбит ис эйгэлээхпит. Төрөөбүт күннэри бэлиэтээһинтэн саҕалаан биир дьыаланан дьарыктаныы. Холобур, хаартыскаҕа түһэриинэн сөбүлээн дьарыктанабын.