Эр киһини тургутар олох оскуолата

Үөһээ Бүлүү Кэнтигиттэн Улуус депутата Василий Алексеев — Бааһынай Баһылай:
— Мин 1971 сыллаахха ыам ыйын 9 күнүгэр бырааһынньык күн ыҥырыллан барбытым. Дойдубуттан барарбар хомуньуус партиятыгар талыллар хандьыдаат этим. Приморьеҕа тааҥкалары, ракеталары тиэйэр “тягач” диэн техниканы ыытарга алта ыйдаах кууруска үөрэппиттэрэ. Онтон Амурскай уобалас Циолковскай куоратыгар буомбаттан хорҕойор сир буолар диэн туттарбыттара. Билигин санаатахпына, космодром буолуохтаах сирин бэлэмнээбит эбиппит. Аармыйаҕа сулууспалыыр сылларбар партия чилиэнинэн буолбутум. Хомсомуол актыбыыһа этим, аны хомсомуол тэрилтэтигэр сэкирэтээринэн талыллыбытым. Буруйу оҥорбуттары партия суутугар көрөрбүт. Онно төһөлөөх элбэх офицеры быыһаан ылбытым буолуой. Хомуньуус куолаһа ол курдук ыйааһыннаах этэ. Онтон Хабаровскайга ракетаны тутуу куурсугар үөрэммитим. Ол барыта сулууспалыырым кэмигэр. 2 ый үөрэнэн младшай лейтенант буолбутум. Дембелим кэлбитигэр, хамандыырым Ленинградка байыаннай үөрэххэ бар диэн аҕытаассыйалыы сатаабыта да, дойдубар тардыһарым бэрт буолан, аккаастаммытым. Дойдубар кэлбиппэр, аармыйаҕа сулууспалыы сылдьан үөрэммит куурустарым олус туһалаабыттара – суоппар эксээмэнин кэбэҕэстик туттаран, улахан техниканы ыытар категорияламмытым. Сопхуоска биригэдьиирдээбитим, райкомҥа да үлэлии сылдьыбытым. Онон аармыйаҕа сулууспалааһын мин инники олохпор суол тэлбитэ диэххэ сөп. Ыччаттарга этиэм этэ, эр киһини тургутан көрөр аармыйа сулууспатыттан куотунумаҥ. Эр киһилии бигэ буоллаххытына, көмөлөһүөҕэ эрэ.

Таатта улууһун Харбалаах нэһилиэгин депутата Семен Васильев:
— Мин 2000 сыллаахха оскуоланы бүтэрэн, орто үөрэх кы­һатыгар үөрэнэ сылдьан аармыйаҕа ыҥы­рыллыбытым. 2001-2003 сс. сулууспалаабытым. Курильскай­га Кунашир арыыга баар байыаннай чаас мобильнай батальонун тааҥка ротатыгар түбэспитим. Ротабар взвод хамандыырын солбуйааччыта буолбутум. Сулууспалаабыт сылларбын олус үчүгэйдик ахтабын. Оччолорго төһө да аармыйаҕа баар хабыр сыһыаннар туһунан сурах тарҕаммытын иһин, биһиги ротабытыгар барыта үчүгэй этэ. Оскуолаҕа алын сүһүөх байыаннай бэлэмнэнии диэн уруок баара. Онно үчүгэйдик үөрэтэллэрэ. Миэхэ аармыйаҕа сулууспам олохпор бигэ суолу буларбар көмөлөспүтэ диэххэ сөп. Сулууспалыам иннинэ уһуну-киэҥи толкуйдуу сатаабакка сылдьар эбит буоллахпына, кэлэн баран олохпун анаарар, тугу эрэ оҥоруом иннинэ толкуйдуур буолбутум. Эппит тылбар туруохтаахпын, эппиэтинэстээх буолуохтаахпын диэн өйдүүрүм. Аармыйа режимэ, устааба хомуллуулаах буоларга үөрэппитэ. Онон, эдэр дьон, аармыйаттан куотунумаҥ диэн этиэм этэ. Эр киһини киһи оҥорор олох оскуолатын ааһыҥ.