Эмп тэрилтэлэрэ сабыллыа суохтара

Миниистир Елена Борисова тыа сиригэр эмп тэрилтэлэр сабыллыа суохтара диэн суруналыыстарга иһитиннэрдэ.

Атырдьах ыйын 20 күнүгэр СӨ доруобуйа харыстабылын миниистирэ Елена Борисова суруналыыстарга  ыыппыт пресс-кэмпэ­риэнсийэтигэр 8 ыйдаах үлэтин түмүк­тэрин, былааннары билиһиннэрдэ уонна суруналыыстар ыйытыыларыгар хоруйдаата.

– Суруналыыс­тар билиҥҥи кэмҥэ саа­май тыҥаабыт боппуруоһу — биэлсэр-акушер пуун­нарын (ФАП), учаас­тактааҕы балыы­һалары сарбыйыы, сабыы  туһунан ыйыттылар. Миниистир Елена Борисова ыытыллар үлэ үлэ миэстэтин сарбыйыы буолбатаҕын ыйда. Кини медицинскэй көмөнү оҥоруу хаачыстыбатын тупсарыыга соруктаах үлэ барарын туһунан эттэ. Доруобуйа харыстабылын салаата урусхалланна диэн өйдөөмөҥ.  “Доруобуйа харыстабылын тиһигэр нормативнай базалар уларыйаллар.  Биһиги ыйаахтарга, стандартарга, бирикээстэргэ олоҕуран үлэлиибит. Федеральнай сокуону көҕүлээһиннэргэ уонна икки сүрүн сокуоҥҥа  суукканы быһа эмтиир балыыһалар, күнүскү балыыһалар уо.д.а. тустарынан чопчу ыйыллар. Бу федеральнай сокуоннарга этиллэринэн,  2012 сылтан ыла үгүс регионнар сокуоҥҥа сөп түбэспэккэ үлэлии олороллор. Чуолаан, учаастактааҕы балыыһалар. Билигин сокуон тылынан, “учаастактааҕы балыыһа” диэн суох. Ол иһин, биһиги эмиэ соккуоҥҥа сөп түбэһиэхтээхпит. Ол эбэтэр нэһилиэнньэлээх оройуоннарга  биир да биэлсэр пуунун, балыыһаны саппаппыт, төттөрүтүн, хаһан да медицинскэй көмө оҥоһуллубатах  оройуоннарыгар саҥа эмтиир тэрилтэлэри арыллыахтара”, — диэтэ.

Сардаана Кузьмина