858
16 июня 2017 в 12:36
Поликлиникаҕын, бырааскын уларытыаххын сөп
— Мин поликлиникам үлэтин сөбүлээбэккэ, атын поликлиникаҕа көһүөхпүн баҕарабын. Ити быһаарыныым кыаллыан сөптөөх дуо? Николай Сергеев, Дьокуускай. — Биллэрин курдук, 2011 сыллаахха сэтинньи 21 күнүгэр «Российскай Федерация гражданнарын доруобуйаларын харыстааһын төрүттэрин туһунан» 323 №-дээх федеральнай сокуон ылыллыбыта. Тустаах сокуон быраас уонна пациент икки ардыларыгар сыһыаннаһыыга саҥа быраап төрүттэрин үөскэтиигэ туһуламмыта. Кистэл буолбатах, элбэхтик хаһыаттарга суруйалларынан уонна күөх экраҥҥа көрдөрөллөрүнэн, кэлиҥҥи кэмҥэ эмчит уонна пациент икки ардыларыгар өйдөспөт буолуу, хаҕыс сыһыан үксээбитэ. Үлэҕэ аахайымтыата, эппиэтинэһэ суох сыһыантан пациеннар өттүлэриттэн үҥсүү-харсыы да элбээбитэ. Маннык көстүү ордук улахан куораттарга бэлиэтэнэрэ. Николай, ити сокуоҥҥа этиллэринэн, поликлиникаҕын уларытарыҥ - бэйэҥ быраабыҥ. Маны таһынан эн поликлиникаҕын эрэ буолбакка, эмтиир бырааскын, страховой хампаанньаҕын эмиэ талыаххын сөп. Тустаах сокуон итини көҥүллүүр. Судаарыстыбаннай поликлиниканы эрэ буолбакка, булгуччулаах медицинскэй страховкалааһын систиэмэтигэр киирсэр чааһынай поликлиниканы талар эмиэ бырааптааххын. Маны таһынан бэйэҥ олорор куораккар эрэ буолбакка, дойду хайа баҕарар муннугар баар поликлиникаҕа эмтэнэр эмиэ кыахтааххын. Итиннэ эйигиттэн прописка ирдэммэт. Итинник уларытыы сылга биирдэ көҥүллэнэр.
