02 июня 2017 в 11:06

Саха сиригэр аан бастаан — кохлеарнай имплантация

Доруобуйа харыстабылын министиэристибэтин пресс-сулууспата иһитиннэрбитинэн, сотору кэминэн 1№-дээх балыыһа – Медицина национальнай киинин төрүтүгэр Саха сиригэр аан бастаан кохлеарнай имплантация оҥоһуллуоҕа. Ол курдук, бэс ыйын 13 к. Оториноларингология федеральнай научнай-клиническэй киинин сүрүн үлэһиттэрэ кыттыыларынан бастакы эпэрээссийэлэри оҥоруу былааннанна.

Бу бырагыраама РФ Доруобуйа харыстабылыгар министиэристибэтин штаты таһынан кылаабынай оториноларинголога, профессор, медицинскэй наука доктора, Оториноларингология федеральнай научнай-клиническэй киинин директора Николай Дайхес өйөбүлүнэн саҕаланна. Кохлеарнай имплантацияны — кулгаах протеһын туруорууга эпэрээссийэни үөһэ этиллэр киин кулгаах ыарыыларыгар отделениетын салайааччыта, медицинскэй наука доктора, Россияҕа бүтүннүүтүгэр уонна чугас омук дойдуларыгар барыта 3000-тан тахса итинник эпэрээссийэни оҥорбут уһулуччулаах хирург Хассан Диаб ыытыаҕа. Аудиология, кулгаах протеһын уонна киһи истэр, саҥарар кыаҕын чөлүгэр түһэриигэ научнай-клиническэй отделение салайааччыта, врач-оториноларинголог-сурдолог, медицина наукаларын кандидата Антон Мачалов эпэрээссийэ кэнниттэн чөлүгэр түһэрэр үлэ түһүмэҕин толоруоҕа. Москваттан кэлэр исписэлиистэр хамаандаларыгар СӨ Педиатрическай киинин оториноларингология отделениетын сэбиэдиссэйэ Иннокентий Гоголев уонна сурдолог быраас, медицинскэй наука кандидата Эльвира Федотова ассистенынан буолуохтара.
Эпэрээссийэҕэ анаан Мэҥэ-Хаҥалас, Таатта, Уус-Алдан, Чурапчы, Нам улуустарыттан 1-2 саастаах оҕолор талыллан бэлэмнэниини аастылар. Кырачаан пациеннарга Neurelec (Oticon Medical) хампаанньа оҥорон таһаарбыт кохлеарнай имплантация системалара туруоруллуохтара.

Ыспыраапка

Кохлеарнай имплантант — биллэр улахан эбэтэр ыарахан истиэпэннээх нейросенсорнай (сенсоневральнай) ыарыылаах дөйүҥү пациеннарга истэр кыахтарын сүтэрбиттэрин солбуйар протез.