Тыа сиригэр — телемедициналаах балыыһа

Горнай улууһугар судаарыстыбаннай-чааһынай бииргэ үлэлээһин бырагырааматынан тутуллубут уочараттаах эмтиир тэрилтэ ыарыһахтарга аанын аста.
«Инвестордарга, тутааччыларга, Доруобуйа харыстабылын министиэристибэтигэр, өрөспүүбүлүкэ салалтатыгар уонна оройуон дьаһалтатыгар маннык сыаналаах бэлэх – саҥа балыыһа иһин махтанабыт!» — диэн Ааһыма сэлиэньэтин кырдьаҕас олохтооҕо, алгысчыт Степан Терентьев уопсай санааны тиэртэ.
Бу саҥа тутуу аныгы уонна бары өттүнэн куттала суох матырыйаалларынан, ыарыһахтарга табыгастаахтык толкуйдаммытынан, киһиэхэ эйэҕэс уонна харыстабыллаах сыһыаннаах, доруобуйа харыстабылын бары каноннарыгар эппиэттиир үрдүк технологиялаах медицинскэй тэриллэринэн эрэ буолбакка, бэйэтигэр телемедицина точката баарынан уратылаах.

«Билигин мин онлайн режимигэр Дьокуускай куорат сүрүн клиникаларыттан ханнык баҕарар анал идэлээх исписэлиистэртэн суһал телемедицина сүбэтин ылар кыахтанным. Аныгы технологиялар чопчу диагноз түргэнник туруорулларыгар, кэмигэр сөптөөх эмтээһини саҕалыырга, наада буоллаҕына, ыарыһахтары суһаллык тиэрдиигэ көмөлөһүөхтэрэ. Ону таһынан, миэхэ уонна коллегаларбар быстыбат үөрэхтээһини ылыыга саҥа саҕахтар арыллаллар. Биһиги ХИФУ Медицинскэй институтун профессордарын, оннооҕор дойду сүрүн вузтарын академиктарын видеоуруоктарыгар сылдьыахпытын сөп», – диэн быраас амбулаториятын сэбиэдиссэйэ Зинаида Федорова үөрүүтүн үллэһиннэ.
Балыыһа кэлэктиибэ инвестор Василий Народов илиититтэн күлүүһү тутта, Саха сирин Доруобуйа харыстабылыгар министиэристибэтэ 200 тыһ. солк. суумалаах оргтехникаҕа сертификат, улуус дьаһалтата, улуус киин балыыһата уонна өрөспүүбүлүкэ балыыһалара туһалаах бэлэхтэри туттардылар.
Горнай улууһун киин балыыһатын кылаабынай бырааһа Геннадий Егоров өрөспүүбүлүкэ, доруобуйа харыстабылын салайааччыларыгар өйөөбүттэрин иһин махтанна уонна маннык, балыыһалары саҥардыы үлэтэ салҕаныаҕар эрэнэрин биллэрдэ.
Судаарыстыбаннай-чааһынай бииргэ үлэлээһин бырагырааматынан бэрт кылгас кэмҥэ Горнай улууһун түгэх бөһүөлэктэригэр икки аныгы балыыһа тутулунна. Бу бырагыраама регион бары оройуоннарыгар ситиһиилээхтик олоххо киирэр.