Биһиги Өктөөп улуу знамятыгар бэриниилээхпит!

Ытыктабыллаах табаарыстар, доҕоттор уонна биир санаалаахтарым!

Сэбиэскэй судаарыстыба омук дойдуларын 14 буржуазнай судаарыстыбата тоҕо ааҥнаан киириитин утарсан хоппута, үөрэҕэ суох буолууну суох оҥорбута итиэннэ культурнай өрөбөлүүссүйэни олоххо киллэрбитэ, индустриализацияны уонна коллективизацияны ыыппыта. Тас өстөөхтөрү, фашизмы уонна дьоппуон милитаризмын үлтү сынньыбыт Оробуочай-бааһынай аймах Кыһыл Армията үөскээбитэ.
Киһи аймах историятыгар аан бастаан Сэбиэт дойдута 1936 сылга бэйэтин саҥа Конституциятыгар үлэҕэ уонна дьоһун хамнаска быраабы, олорор дьиэҕэ, үөрэххэ уонна доруобуйа харыстабылыгар, сынньалаҥҥа уонна пенсиянан хааччыйыыга быраабы бигэргэппитэ.

Өктөөп өрөбөлүүссүйэтин саамай суолталаах историческай түмүктэриттэн биирдэстэринэн Россия үгүс норуоттарыгар, ол иһигэр Саха сиригэр, автономнай өрөспүүбүлүкэ көрүҥүнэн судаарыстыбаннаһы биэрии буолбута. 1922 сылга Саха АССР тэриллибитэ.
Биһиги Саха АССР атаҕар туруутугар уонна сайдыытыгар Саха сирин уһулуччулаах уолаттара Максим Аммосов, Платон Ойуунускай, Исидор Барахов, Степан Аржаков, Степан Васильев тугунан да сыаналаммат кылааттарын өйдүүбүт уонна үрдүктүк сыаналыыбыт.
ССРС-ка социалистическай хаһаайыстыбаны күүрээннээхтик тутуу кэмигэр Саха сиригэр хайа бырамыысыланнаһа үөскээбитэ, Бүлүү ГЭС, Мииринэйдээҕи ГОК тутуллубуттара, саҥа Мииринэй, Нерюнгри, Алдан куораттар үүнэн тахсыбыттара. Сэбиэскэй былаас сылларыгар өрөспүүбүлүкэ ис валовай бородууктата 430 төгүл үрдээбитэ.
Бу күннэргэ биһиги өрөспүүбүлүкэ бары көлүөнэ олохтоохторун Ийэ дойдубут чэчирии сайдарын, кэнэҕэски көлүөнэлэр тустарыгар хорсун, бэйэни харыстаммат үлэлэрин иһин итиитик-истиҥник махтанабыт уонна эҕэрдэлиибит.
Ленин уонна Сталин ыйбыт суола бүгүҥҥү күҥҥэ суолтатын уонна кырдьыктааҕын сү­тэрбэтэ. ССРС үрэллиитэ дойдубутугар уонна планетаҕа бүтүннүүтүгэр ыарахан содулланна. Биһиги, Саха сирин хомуньуустара, социализм – бу Ийэ дойдубут кэскилэ буоларыгар бигэтик эрэнэбит. Көҥүл үлэҕэ, дьоһун олоххо, социальнай көмүскэлгэ бэйэтин быраабын норуот төннөрүөҕэ. Сэбиэскэй кэм бастыҥ ситиһиилэригэр олоҕуран эрэ Россияны быыһыахха сөп. Аан дойдуга саҥалыы олоҕу итинник эрэ хааччыйыахха сөп.
Эһиэхэ, чугас дьоҥҥутугар доруобуйаны баҕарабын! Биһиги Кыайыыбыт туһугар саҥа күүһү уонна эрчими! Биһиги Өктөөп улуу знамятыгар бэриниилээхпит. Биһиги – кыайбыт дойду оҕолоробут, биһиги – кыайбыт норуоппут. Улуу Өктөөп туругурдун! Биһиги кыайыылаах буолуохпут!

Виктор Губарев,
РФКП Саха сиринээҕи рескомун
бастакы сэкирэтээрэ.