Күндү үөрэнээччилэр, төрөппүттэр уонна учууталлар!

Саха Өрөспүүбүлүкэтин Ил Түмэнин уонна тус бэйэм ааппыт­тан саҥа үөрэх дьыла саҕалам­мытынан – Билии күнүнэн истиҥник эҕэрдэлиибин!
Балаҕан ыйын 1 күнэ – барыбытыгар уһулуччу суолталаах үтүө бырааһынньык, оттон оскуола боруогун аан бастаан атыллыыр кырачааннарга ураты долгутуулаах күн. Маҥнайгы чуораан лыҥкынас тыаһа кинилэргэ саҥа суолу, киэҥ аартыгы тэлэн, саҥа үөрэнээччилэр букубаары кыбынан, үөрэх-билии умсулҕаннаах айаныгар аттаныахтара. Бу күн хас биирдии үөрэнээччигэ үөрүүлээх түгэни бэлэхтээн, оскуолатааҕы сыллара дьоллоох уонна кэрэхсэбиллээх буоллуннар!
Үрдүкү кылаас үөрэнээч­чи­лэригэр бу күн – сайын устатыгар ахтыспыт доҕотторун, бииргэ үөрэнэр оҕолорун, учууталларын кытта үөрэ-көтө көрсөр сырдык, күндү түгэн.
Кэскиллээҕи баһылаан, саҥат­тан саҥа үрдэллэри дабайан, кыайыыга кынаттыыр, ситиһиигэ сирдиир үөрэх-билии күнүн төрөппүттэр эмиэ долгуйа күүтэллэр.
Биһиги оҕолорбутун үөрэтэр, иитэр үтүө аналлаах күндү педагогтарбытыгар ураты махталбын уонна эҕэрдэбин тиэрдэбин. Ытыктабыллаах учууталлар! Саҥаны айааччы Стив Джобс эппитин курдук, «үөрэххэ саамай сүрүнэ – хас биирдиибитигэр билэр-көрөр, кэрэхсиир баҕаны уһугуннарар, күөдьүтэр, күөттүүр киһи – учуутал». Эһиэхэ кытаанах доруобуйаны, дьиэ кэргэҥҥитигэр или-эйэни уонна айымньылаах үлэни баҕарабын. Үтүө үлэҕит, үүнэр көлүөнэни иитиигэ киллэрэр сүҥкэн кылааккыт, тулуургут, уустук уонна дьоһун суолталаах идэҕэ бэриниигит иһин махтанабын.
Билии күнүнэн итиитик-ис­тиҥник эҕэрдэлиибин! Бары үөрэ­нээччилэргэ дьаныардаах үөрэҕи, ситиһиини, туйгун сыананы, эрэллээх доҕоттору баҕарабын. Саҥа үүммүт үөрэх дьыла үгүс элбэх үөрүүлээх түгэннэри бэлэхтээтин, саҥа саҕахтары арыйдын!

Саха Өрөспүүбүлүкэтин
Ил Түмэнин Бэрэссэдээтэлэ
П.В. Гоголев