Күндү Нам улууһун олохтоохторо, ытыктабыллаах ыалдьыттар!

Саха Өрөспүүбүлүкэтин Ил Түмэнин аатыттан уонна тус бэйэм эһигини барыгытын Улуу тунах ыһыаҕынан эҕэр­дэлиибин!
Биһиги норуоппут уһун кыһыны этэҥҥэ туораан, күөххэ үктэнэн, тапталлаах Сахабыт сиригэр самаан сайын эргиллэн кэлбитин айхаллыы көрсөр өбүгэбит ытык үгэһин үтүмэн үйэлэр тухары энчирэппэккэ илдьэ кэллэ.
1991 сыллаахха Саха АССР Үрдүкү Сэбиэтин Президиумун Ыйааҕынан Ыһыах Саха Өрөспүүбүлүкэтин судаарыстыбаннай бырааһынньыгынан биллэриллибитэ. Ол кэмтэн ыла сылтан-сыл аайы бу бэлиэ күн суолтата үрдээн иһэрэ биһигини үөрдэр. Аламаҕай, ыалдьытымсах саха омуга өбүгэ үгэһин, баай историятын, культуратын, дьоҕурун ыраахха сөхтөрө көрдөрөр.
Улуу тунах ыһыах сүдү баайбыт, киэн туттуубут буолан, саха уратытын торумнуур, улуу олоҥхобутун, оһуохайбытын аар-саарга ааттатар. Үрдүк айыыларга сүгүрүйэр, айгыр-силик айылҕабытын кытта алтыһар ытык-мааны күммүтүгэр норуоппут өйө-санаата түмүллэр, үс кута бөҕөргүүр, өрөгөй ырыата сатарыыр.
Былырыын Олоҥхо ыһыаҕа үгүс омук түөлбэлфээн олорор көмүстээх Алдаҥҥа хайдах курдук үрдүк таһымнаахтык, уратытык хатыламматтык уонна өрө көтөҕүллүүлээхтик ааспытын бэлиэтиир тоҕоостоох. Тэрийээччилэр Олоҥхо ыһыаҕын хас биирдии сиэригэр-туомугар, тэрээһинигэр ураты болҕомтолоохтук сыһыаннаспыттара биһигини барыбытын астыннарбыта.
Быйылгы XIIІ Олоҥхо ыһыаҕа Нам ытык сиригэр, уһулуччулаах судаарыстыбаннай, политическай деятеллэр Максим Аммосов уонна Илья Винокуров, норуот ырыаһыта, олоҥхоһута Петр Ядрихинскай – Бэдьээлэ, Егор Охлопков – Буоратай, биллиилээх поэттар Ефрем Сивцев – Таллан Бүрэ, Илья Винокуров – Чаҕылҕан, Николай Рыкунов уонна да атын биһиги өрөспүүбүлүкэбит, бүтүн дойду үрдүнэн биллибит үгүс-элбэх дьон чулуулара төрөөбүт-үөскээбит сирдэригэр ыытыллар. Өбүгэ ытык үгэһэ умнуллубатын, ыһыах алгыһа хас биирдиибитин, бэйэбитин, кэнчээри ыччаппытын алгылыы, араҥаччылыы туруохтун!
Күндү Саха сирин олохтоохторо, ытыктабыллаах ыалдьыттар! Ийэ айылҕабыт торҕо күөҕүнэн тупсан-киэркэйэн, бэлиэ күн тыынын өрө көтөҕөр кэмигэр эһиэхэ хас биирдиигитигэр чөл туруктаах олоҕу, этэҥҥэ буолууну баҕарабын. Сахабыт сирэ сайда, силигилии турдун, дьоммут-сэргэбит дьоллоох-тускулаах буоллун! Саргыбыт салалыннын, кэскилбит тэнийдин!

Петр Гоголев,
Саха Өрөспүүбүлүкэтин Ил Түмэнин Бэрэссэдээтэлэ