Күндү Саха сирин дьахталлара!

Норуоппутугар “Ыал – ийэтинэн” диэн бэргэн этии баар. Ийэ барахсан төрүүр оҕону төлкөлүүр,  аал уоту араҥаччылыыр, сырдыгы эрэ ыралыыр. Кини оҕолорун сүрэҕин сылааһыгар, истиҥ тапталыгар бигээн улаатыннаран уопсастыбаҕа көччөх гынан көтүтэр. Кэргэнигэр, олоҕун аргыһыгар өйөбүл, күүс-көмө буолар. Ийэ тула ыраас санаа саҕыллар, күн күлүмнүү оонньуур.
Былыр-былыргыттан саха дьахтарын мындыр өйө, толкуйа, талба талаана уос номоҕор кэпсэнэр. Сэрии, уот-кураан сылларыгар саха дьахтара сылайары билбэккэ түүннэри-күнүстэри фроҥҥа бэргэһэ, үтүлүк, сылаас таҥас тикпитэ, тымныыттан чаҕыйбакка бултаан, балыктаан ыыппыта. Кини айылҕаттан бэриллибит тулуура, дьулуура, киэҥ көҕүһэ, амарах санаата дойду сайдыытыгар бигэ тирэх буолбута.
Аныгы кэм дьахтара олох бары эйгэтигэр: бизнескэ, үөрэххэ, спортка, наукаҕа, култуураҕа, политикаҕа көхтөөхтүк кыттар, үлэлэһэр. Аан дойду омуктарын кытта тэҥҥэ хардыылаан олоҕу түстэһэр, Сахатын сирин ааттатар. Биһиги кинилэр кыайыыларынан, ситиһиилэринэн киэн туттабыт, астынабыт.
Ил Түмэн дьиэ кэргэни, ийэ буолууну уонна оҕо аймаҕы сокуон өттүнэн араҥаччылыырга туһуламмыт дьаһал­лары ылынар, кинилэр бырааптарын уонна интэриэстэрин көмүскүүргэ сүрүн болҕомтотун уурар. Парламент демография бэлиитикэтигэр сокуону оҥорууга, сайыннарыыга үлэтин салгыы ыытар.

Күндү Саха сирин дьахталлара! Эһиэ­хэ чэгиэн доруобуйаны, үлэҕитигэр, үөрэххитигэр ситиһиилэри, дьолу-соргуну, дьиэ кэргэҥҥитигэр этэҥҥэ буолууну баҕарабыт!