Күндү Сахабыт сирин күн күбэй ийэлэрэ!

Ийэ иэримэ дьиэни ара­ҥаччылыыр, чугас дьонун көрөр-истэр, дьиэ кэргэн дьоллоох олоҕун түстүүр аналлаах. Кини оҕону иитиигэ болҕомтолоох сы­һыаныттан, тапталыттан, бар дьоҥҥо эйэҕэс сыһыаныттан, кө­мө-ама буолар амарах сүрэҕиттэн бүтүн уопсастыба кэскилэ түстэнэр. Билиҥҥитэ тэтимнээхтик сайдар олоххо бэйэ-бэйэҕэ истиҥ сыһыаны, өйөбүлү, сомоҕолоһууну, өйдөһүүнү ийэ иилиир-саҕалыыр, сириэдитэр. Оҕо дэгиттэр сайдыылаах, норуотугар, дойдутугар туһалаах, үтүөҕэ тардыһар үрдүк ыралаах буоларын туһугар ийэ барахсан кыһамньытын, иитиитин-такайыытын олук уурар. Күн сирин сырдыгын көрдөрөр баар-суох саамай чугас киһибитигэр олохпут тухары махтанар ытык иэстээхпит.
Российскай Федерацияҕа, Саха Өрөспүүбүлүкэтигэр дьиэ кэргэн, ийэ, оҕо боппуруостарыгар, сокуонунан көмүскэллээх буолууларыгар улахан болҕомто ууруллар. «Ийэ хапытаала» бырагырааманан үбүлээһин көрүллэр, элбэх оҕолоохтор сир учаастагынан, олорор дьиэнэн хааччыллалларын ситиһэргэ улахан үлэ ыытыллар. Дойду президенин ыйааҕар олоҕурдахха, 2024 сылга диэри оҕо төрөөһүнүн элбэтэр, итиннэ сыһыаннаан демография көрдөрүүлэрин тупсарар сыал-сорук турар. Маныаха ийэлэр уонна оҕолор доруобуйаларын харыстааһыҥҥа, элбэх оҕолоох уонна оҕо иитэр ыаллары өйөөһүҥҥэ, уһуйааннарынан хааччыйыыны тупсарыыга билиҥҥитэ туһааннаах үлэ тэтимнээхтик барар. Саха сирин парламена бу хайысхаҕа сөптөөх дьаһаллары ылыныыга салгыы туруорсуоҕа.
Сахабыт сирин ийэлэригэр ахсаабат кыһамньыгыт, уҕараабат тапталгыт, бэриниигит, сылаас сыһыаҥҥыт иһин махтанабыт. Күндү ийэлэргэ чэгиэн-чэбдик туругу, сир үрдүгэр баар саамай сырдыгы, ырааһы, кэрэни баҕарабыт!

Саха Өрөспүүбүлүкэтин Ил Түмэнин бэрэссэдээтэлэ П.В.Гоголев.