Өрөспүүбүлүкэ Күнэ

Ытыктабыллаах Саха сирин олохтоохторо! 

Эһигини Саха Өрөспүүбүлүкэтин Ил Түмэнин аатыттан Саха Өрөс­пүүбүлүкэтин күнүнэн уонна Россия Федерациятын парламентаризмын күнүнэн эҕэрдэлиибин!

Историябытыгар бэлиэ күн үгүс, олортон муус устар 27 күнүгэр би­һиги үс улахан суолталаах түгэни – Өрөспүүбүлүкэбит төрүттэммитин, Саха Өрөспүүбүлүкэтин саҥа Төрүт сокуона олоххо киирбитин уонна Россия парламентаризмын күнүн бэлиэтиибит.
РСФСР Киин Ситэриилээх Кэмитиэтэ 1922 сыл муус устар 27 күнүгэр Cаха Автономиятын олохтуур туһунан Декрети ылыммыта. Саха Өрөспүүбүлүкэтэ тэриллэн, социальнай, экономическай, култуурунай сайдыыбытыгар сүҥкэн уларыйыылар тахсыбыттара. Иккис бэлиэ түгэнинэн 1992 сыл муус устар 27 күнүгэр ХII ыҥырыылаах Саха АССР Үрдүкү Сэбиэтэ Саха сирин Төрүт сокуонун ылыммыта буолар. Саха Өрөспүүбүлүкэтэ Россия Федерациятын тэҥ бырааптаах субъегын быһыытынан бэйэтин историятыгар саҥа аартыгы арыйбыта. 2012 сылтан муус устар 27 күнүгэр Россия Федерациятын Парламентаризмын күнэ бэлиэтэнэр.
Ил Түмэн Россия Федеральнай Мунньаҕын кытта бииргэ дьон-сэргэ итэ­ҕэлигэр тирэнэн, Саха сирин социальнай-экономическай туруга, нэһи­лиэнньэтин олоҕо-дьаһаҕа сокуон өттүттэн көмүскэллээх буолуутун хааччыйарга үлэлэһэр. 2017 сыл ахсынньы 26 күнүгэр Россия Федерациятын Федеральнай Мунньаҕын Федерация Сэбиэтэ «Саха Өрөспүүбүлүкэтин социальнай-экономическай сайдыытын судаарыстыбаннай өйөбүлүн туһунан» ФС-626 №-дээх уурааҕы ылыммыта. Бу уураах хас биирдии хайысхаларын олоххо киллэрии үлэтэ Саха сирин парламенын тус хонтуруолунан барар.
Билиҥҥи уустук кэмҥэ Россия Федерациятын бары норуоттара төрөөбүт дойдубут көмүскэллээх, эйэлээх, сайдыылаах буоларын туһугар биир сомоҕо түмсэллэр.
Күндү Сахам сирин дьоно! Эһиэхэ чэгиэн туругу, дьаныардаах үлэни, инникигэ эрэллээх буолууну баҕарабын. Иллээх-эйэлээх олохтоох, сайдыылаах, кэскиллээх буолуҥ!

Саха Өрөспүүбүлүкэтин
Ил Түмэнин Бэрэссэдээтэлэ Александр Жирков.